“E Manga Kataia Riki Raina,” Rao, Turai 2024, 36–37.
E Manga Kataia Riki Raina
“Anne te kabanea n tai ae N na manga kataa te bwai ae boou,” e taku Raina.
E riki te karaki aei i USA.
E manga wareki taekan te katanoata n ana reirei Raina. Kauaaba n te Koro Karaki: E na karekea te mwananga nako New York City ae akea boona!
Bon te kauaaba ibukiia ataein te reirei n reirei aika a mwaiti n te aono. E iangoia i New York City Raina, ma taua aika a rangi n ririeta ni katobibiia ao te Boua ae Liberty ae uakaan. E tangiria ni kan nako!
“Ko bon riai ni karin,” e taku Sydney. “Ngkoe te kabanea ni bwakuaku irouia ara roro!”
E kaungaa nanon Raina ana taeka Sydney. E aki rang atatai ni korean te karaki. Ma e kan kataia.
I mwiin te reirei, e tekateka Raina n ana tetitke. Taebu, taebu, taebu. E karebwerebwea ana bentira i aon te beeba ngke e karioi ana iango. N tokina, e a waaki ni koroboki.
E bane ana wiiki Raina ni kabanea ana koroboki. Ma man ana ibuobuoki Tinana, e a namakina te tauraoi ni karina ana koro karaki.
A nako tabeua wiiki . E ingainga Raina ni kan nooria bwa antai ae moanna. Tao bon te tai ae tawe e na nako New York!
“E raka i aon tebubua ataei ake a karin,” Mr. Wright e taku mai moa n te kiraatiruum. “Kam bati n rabwa ngkami ni kabane ake kam a tia ni korei ami karaki.”
E bukibuki manawan Raina ma te ingainga.
“E ngae ngke akea irouia ara ataei ae moanna n te kauaaba, aran Raina ngaia temanna ibuakoia niiman ake a moan ara n te karinrin. Ara Katekeraoi nakoim, Raina,” E. taku Mr.Wright.
E moangare Raina ao a uboubo raona n reirei. Ma e rangi n un i nanona. Temanna ibuakoia ake niiman mai eta akea tamaroana nakon te moanna. A bua miina n kan noora New York.
Ngke e roko ni mweengana Raina, e tekateka ma akean ungan nanona i nanon te umwanikuua i rarikiia ana karo. “I konaaki n te kauaaba,” e taku. “Anne au kabanea n tai ni manga kata riki te bwai ae boou. N na ti karaoa te bwai ae I ataia ae I rabakau iai.” E rabuna atuna ni baina.
“I rawawata ngkai ko aki moanna. Ngai ma tinam ti uaia ni kakatonga iroum ngkai ko kataia,” e taku Tamana. E tekateka i rarikin Raina. “Ko uringnga ngke akea au mwakuri uoua te ririki n nako?”
E katoutoua atuna Raina.
“I kata rakeu ni mwakuri aika a mwaiti ao bon akea naba teuana ae butimwaeai.” e taku Tamana. “I bon namakina te bwarannano.”
E euta atuuna Raina. “Ko koaua raoi?”
E katoutoua atuuna Tamana. Ma e aki bwara nanou. I mwiin te tai ae maan, I a kunea te mwakuri ae bon bootau raoi. Ma e na bon aki kona n reke ngke arona bwa I katoka kataakina.”
E toroba nuukan Raina ni baina Tinana. “Ko ataia bwa iraua te rongorongo ae I kanakoa nakon maekatiin aika a kakaokoro?” e titiraki tinana. “Ao iraua aika a totokoaki? Ma I aki bwarannano ngkana I tangiria ni kan noora au mwakuri bwa e na boretiaki. E kakaawaki te koroboki irou, ngaia are I teimatoa ni kataia.”
E aki toki n iaiangoia n taainako Raina bwa ana karo a rang mwaatai ni bwaai ni kabane ake a karaoi. E aki ataia bwa ngaia a tia naba n aki butimwaeaki.
E bon teimatoa n nanokawaki, ma e tara n nanobaba ngkana e aki manga kata riki te bwai teuana ae boou. Anne ae aki tangiria Tamara are i Karawa ibukina. E baireia Raina bwa e na aki manga bwarannano. E kona ni karaoi bwai riki aika a mwaiti, riki bwaai ake e aki rang mwaatai iai ngkekei naba.
“I taku bwa N na manga kata riki te kauaaba n te ririki are i mwiina,” E taku Raina. Konaakina n te kauaaba e aki katoka karokoana ni miina.
E nakon ana taibora Raina ao e anaa ana bentira. E rangi ni kauna te koroboki. Taebu, taebu, taebu. Ngaia are tera riki ae boou are e na koreia i mwiina?
Kamataataan korotamnei iroun Vivian Mineker