“Te Kimwareirei n te Reirei,” Rao, Turai 2024, 32–33.
Te Rao nakon te Rao
Te Kimwareirei n te Reirei
Man te marooro n titiraki ma Olivia Kitterman ao Noelle Lambert Barrus.
I aki namakinna ae e na tamaroa reireiu ngkana I a ikawai. A bane ni wanawana ni kabane tariu ao mwaaneu. A bane n raraoi aia bwii. A anai kiraati aika a rang kangaanga. I teimatoa ni kata au kona ni kiraati aika matoatoa, ma I bon aki roko n te butimwaeaki. E bon rangi ni matoatoa te nuumera. Ngaia are I iango, “Eng, I taku bwa I bon aki wanawana.” Akea n au iang bwa e kona ni bitaki anne.
Teuana te ririki i mwiina e reke au tia reirei are e anganai te mweengaraoi are I kainnanoia. E noori riki taarena irou au tia reirei nakon are I ataia. E taku, “Clark, ko kona n riki bwa ataein te reirei ae tamaroa. Ko riai ni bon onimakiniko i bon iroum.”
Ngaia are I reitinako ni kataia. I a kakorakorai riki ni kamatebwai. I mwakuria naba bwa N na barongaaki riki. I reireinai arou ni kawakin mwiin au bwai n reirei ake I karaoi ni mweengau. E buokai kamatean te TV bwa N na kabanea riki au iango i aon au bwai n reirei. I mwiina, I a riki bwa ataein te reirei ae tamaroa riki. Ao e a rikirake onimakinau i bon irou.
Ao I a nako ni karaoa au mwakuri ni mitinare, I nooria bwa I aki reireinai i bon irou. I butiia Tamau are i Karawa ibukin buokau. Ao I kakauongo nakon te Tamnei ae Raoiroi. Ngke I mwakuri korakora, I kona n reireiniia ao ni buokiia aomata. Ngke I a okira mweengau man au mition, I nakon te reirei are i aona riki. I tataro ibukin buokau nakon te Atua n au kiraati ni kabane. I a moanna n riki bwa ataein te reirei ae tamaroa ao riki I a tatangira te numera!
I iangoia bwa ngkana ko wanawana nanona ko ataibwai ao e beebete. Anne akea koauana. Ngkana ko tauraoi ni karimoa te Uea i nanon am kamatebwai ao ko mwakuri korakora ni katamaroa riki, ngkanne ko wanawana!
Ngkana a kangaanga bwaai n te tai aei, uringnga bwa ngkoe bon natin te Atua. Iai am konabwai ae rang tamaroa. Ko kona ni karaoi bwaai aika a kangaanga. Ti teimatoa ni kataneiai ni karaoia. Bubutiia Tamam are i Karawa ibukin buokam. E tangiriko bwa ko na tokanikai. Ko kona ni karaoa aio!
E Kaunga te Reirei
Kakaei baeten ni bwain te reirei n te tamnei ae i nano. Tera ae ko reiakinna n te reirei?
Kamataataan te tamnei iroun Agnes Saccani