“Kawaraia Tibuu te Unaine ao te Unimwaane,” Rao, Turai 2024, 30–31.
Kawaraia Tibuu te Unaine ao te Unimwaane
E tangiria n tibwa te bwai are e reiakinna Ernesto n te Moanrinan.
E riki te karaki aei i Indonesia.
E karina te kabaraaki riki teuana Ernesto i nanon ana baeki. E tarataranako i nanon te ruu. Tera riki ae e riai n uotia? E noora ana Boki Moomon i aon te taibora. E aki kona ni mwaninga anne!
Bon tain te motirawa n te tiamwa. Ana utu Ernesto a na nako ni kawariia tibuna te Unaine ao te Unimwaane. E rang kukurei n kan nooria tibuna.
Ngke a roko Ernesto ma ana utu, e rabwatia Tibuna te Unimwaane n inga ma ngaia. “I rang kukurei ngkai ko a roko!”
“Tia rang kan nooriko!” E moangare Tibuna te Unaine ao e inga naba ma Ernesto.
“I a rang kaman tataninga te bong aei. Ti tangiria ni kan rooroko,” e taku Ernesto.
“Tia nako n rin,” e taku Tibuna te Unimwaane. “E na karaoi kanami Tibum te Unaine are ko tatangiria.”
E rinnako Ernesto i nanon aia auti Tibuna te Unaine ao te Unimwaane. E rang kukurei ni kabanea ana tai ma ngaiia.
Te ingabong are i mwiina, e uti Ernesto ni boin te raiti ae kuukanaki. E noriia tinana ao Tibuna te Unaine ni beku n te umwanikuuka. E aroka tabaia ni kauoman. I mwiina e birinako n otinako n te katawanang i tinaniku.
A tekateka ni maroro i tinaniku ni mooi man aia mwangko Tamana ao Tibuna te Unimwaane.
“Mauri n te ingabong aei. Ko kan mooi n te ii?” E anga ana mwangko Tibuna te Unimwaane nakon Ernesto.
E taraa te mwangko ni ii Ernesto ao e a manga taraa Tibuna te Unimwaane. E tangiria n tibwa te bwai are e a tia n reiakinna n te Moanrinan. “I aki, ko rabwa Tibuu te Unimwaane,” e taku. “I reiakinna n au ekaretia bwa te ii, kobee, ao te baeke a bon aki raoiroi ibukin rabwatara. I tangiria n ira te bwai are e tangiria Iesu bwa N na karaoia.”
E wingare tamana. “Ara utu a ongotaeka nakon Tuan te Mauri, ma e kaokoro ana koaua Tibuu te Unimwaane, ao e bon raoiroi anne.”
“Ko rabwa ibukin tibwaan te bwai ae ko kakoaua,” e taku Tibuna te Unimwaane nakon Ernesto. “Bon te ataeinimwaane ngkoe ae ko raoiroi. Ko kona ni karekea te ranibue n ai aron tamam.” E kabwaroa niman Ernesto n te mwangko man ana keetoro Tibuna te Unimwaane.
E temekia Ernesto. E namakina te kukurei i nanona ibukin rinean te eti.
N te katawanou, e amwarake ni kanana ae tatangiria Ernesto. E karaoa te nasi gorengtibuna te unaine, te amwarake ae karaoaki man te raiti, bunimoa, irikomaeu, ma uaanikai. E bon rangi ni kangkang. Ao e tatangiria ni marooro Ernesto ma Tibuna te Unaine ao te Unimwaane ngkana a amwarake.
N te bwakantaai, a ikotaki te utu n aia takakaro ae te ikaraaba. A iri naba Tibuna te Unimwaane ao te Unaine!
I nooriko i akuun te aroka anne, Ernesto!” E wewete tamana, ni biri ni kainetia. E ngarengare Ernesto ngke e kataia ni birinako. E rangi ni kaunga te takakaro ma ana utu.
N te tairiki anne, a tekateka ni kabane i rarikin Tibuna te Unimwaane ngke e karakini tabeua karaki. Ngke e bane ana karaki, e uringnga Ernesto are a tuai ni wareki koroboki aika a tabu.
E kibarake Ernesto. “I a manga oki.”
E birinako n anaa ana Boki Moomon. Ngke e oki, e titiraki, “Ti kona ni wareware?”
“I kukurei bwa ko uringnga.” E anaa te boki Tinana mairoun Ernesto ao e rairia nakon ana kibu ae tatangiria. E warekia ni kabaibati. I mwiina a bane ni katorobubua.
“Kam kukurei n tataro i rarikira?” E titirakiniia tibuna Ernesto.
“Eng, e rang n tamaroa anne,” e taku Tibuna te Unaine. E katorobubua irarikin Tibuna te Unimwaanee.
E tataro tamana. E karabwa Tamara are i Karawa ngkai a konaa ni kabanea aia tai ma aia utu.
I mwiin te tataro, E inga Tibuna te Unimwaane ma Ernesto. “E raoroi bwa a tatataro ami utu,” e taku. “I kukurei ngkai ko tangiria ni kaniiaki nakon te Atua. E na ibuobuoki nakoia am utu bwa a na kakorakoraki.”
E namakina te abuee ao te rau Ernesto i nanona. E tatangiria n tibwa ana koaua—te bwai are e tatangiria—nakon Tibuna te Unaine ao te Unimwaane—naake e tatangiriia.
Kamataataan te tamnei iroun Melissa Kashiwagi