“Te Ruu ni Kaotiotio n Koroboki aika Tabu,” Rao, Turai 2024, 14–15.
Te Ruu ni Kaotioti n Koroboki aika Tabu
“Ma tera ngkana ti kaotinakoa baokin te Tabati?” E titiraki Jonny.
E riki te karaki aei i USA.
“I a botu.” E wena Jonny i nano n te ruu ni katangaina.
E tarataraa tinaniku mwanena ae Jenna man ana winto. “Ai bon akea te bwai ae e na karaoaki,” e taku.
E tararake Jonny n taraa te tiiring. Bukin tera e rang kabotu te Tabati?
I mwiina e reke ana iango. “Ma tera ngkana ti kaotinakoa baokin te Tabati?” E titiraki Jonny. Baokin te Tabati bon te bwaoki ae onoti ae kaonaki ni bwain takakaro ibukin te Tabati.
E moangare Jenna ao e a uti matana. “E a kaunga anne.”
A kawaekoaia Jonny ao Jenna nakon ana ruu tinaia. A kokooka te bwaoki ae bubura nakon te ruu ni katangaina.
“Tera ae ti na karaoia moa?” E titiraki Jonny. E kauka te bwaoki ao e kaotinakoi booki n tamnei tabeua ao kaati n takakaro.
“Tia takakaro n te ikatoatoa ni kakatoaia taan ninikoria man koroboki aika a tabu,” e taku Jenna.
N te takakaro ao iai kaati ma tamneia burabeti man ana Boki Moomon i aoia. E kawenei ni kabaraaki kaati Jenna i aon te timanti. A ikaruoruo n anai kaati ao a kataia ni kakaai toaia ake a bootau ma ngaia.
E rairi kaati aika a kaokoro Jonny aika tamnein Kaaben Moronaai i aoia. “E a reke toana!” e takarua.
“Ngai naba!” E katei uoua kaati Jenna ni kaota tamnein Sariah.
A kaoka riki aia takakaro tabeua riki te raaun Jonny ao Jenna. E kaunga ngkana a iangoi karaki aika a tatangiria man ana Boki Moomon.
I mwiin tabeua te tai ao e a taku Jenna, “Tia karaoa ngkanne te bwai riki teuana.”
“NGAIA. Tia karaoa teuana ara kaotioti man karakin koroboki aika a tabu ae ti tatangiria. Tia karaoa te ruu ni kaotioti n koroboki aika tabu!” E waaki ni rikoi kaati Jonny.
“Eng!” E ibuobuoki n boboti bwai n takakaro ao a kararoai.
E kibe i nanon te bwaoki ni karokoa e kunei tabeua onea ni kaotioti. E kaotinakoa te kunnikai ae buraerae ni buraun ao e karinna. “Ngai Tamuera te I-Remwanaite!” E kibarake i aon te kaintekateka ao e riki n ai aron Tamuera, n reirei i aon oon te kaawa.
E kauka ana Boki Moomon Jenna ae taian tamnei. E raira baana ni karokoa e roko n te iteraniba are e mena iai Tamuera te I-Reimwanaite. E wareka te karaki ni kabaibati ngke e katea kaina Jonny.
A kataneiaia ataei ni karaoa nanon te karaki. E namakina te abuee ao e kukurei i nanona Jonny. E namakina ae tamaroa ngke e uringia burabeti ake a reirei taekan Iesu Kristo.
Ngke a namakinna bwa a tauraoi, e biri Jonny ao e weteia Tinaia, Tamaia, ao mwanena ae uarereke, ae Makenna. “Nakomai noora ara kaotioti!”
E tei Jenna nuukan te ruu ma baina aika tangaina. “Kam butimwaeaki nakon ara ruu ni kaotioti n koroboki aika tabu. N te bong aei ti na kaota rongorongon … Tamuera te I-Remwanaite!”
I mwiina e a moana te karaki. “N taai aika bwakanako, e roko te burabeti ae arana Tamuera reireiniia Nibwaite …”
Ngke e a roko n ana itera Jonny, e tei ni kabwaabwakia i aon te kaintekateka. E taetae ma te bwana ae nene. “Ngai Tamuera, ao Tamara are i Karawa e tangiri ngkami bwa kam na karaoi rinerine aika raoiroi. Katoka karaoan bwaai aika buakaka. Ibukina bwa i nanon nimaua te ririki ao e na bungiaki Iesu Kristo.”
“E roko Mwaakan te Atua iroun Tamuera,” e taku Jenna. E kabanea nikiran te karaki. Ngke e a bane, a uboubo Tinaia, Tamaia, ao Makenna.
“Moan te nakoraoi!” E taku Tinana.
A bobaraaki Jonny ma Jenna. A uaia ni moangareia.
“Ti a karaoa te kaotioti riki teuana,” e taku Jonny.
“Ti tangiria n noora riki teuana,” e taku Tinaia. E uboubo Makenna ma te moangare.
A biri rikaaki Jenna ao Jonny nakon te bwaoki n Tabati n anai riki onea ni kaotioti.
“E kaunga te Tabati! I tatangira n reiakina taekan koroboki aika tabu,” e taku Jenna.
“Ao Iesu.” E moangare Jonny ngke e a manga kunea te onea teuana. Te Tabati bon te bong ae onoti!
Kamataataan te tamnei iroun Shawna J. C. Tenney