“Rebwetaua aika a Bubura ao Kaara aika Takiakia,” Rao, Turai 2024, 10–11.
Rebwetaua aika a Bubura ao Kaara aika Takiakia
“Bukin tera Tamara are i Karawa e aki kararoai karongoa aika rebwetaua?” E titiraki Charlotte.
E riki te karaki aei i USA.
E ririba te kaberoro Charlotte! E ririba te kaberoro bwa e na ongo i taningana ke okioki tangina i atuuna. Riki ngkana e bon ataia bwa e mano, e bon namakina naba te mweengabuaka n tangin taian kaa, tatakaruaia te koraki, ke n rebwen te oro turam.
Ao Charlotte e bon aki tatangira te bweeuti!
A kataia ni karaoi bwaai aika a mwaiti ana utu ni karaua nanona ngkana iai te karongoa ae kaberoro. E kabooa bwain taningana ae onoti Tamana ni buokia n totokoa te karongoa. Ngkana e rebwe te baa, e koonna Tinana i aan te rabuna. E tataro naba Charlotte ibukin buokana bwa e na aki maaku.
Bwaai aikai ni kabane a bane n ibuobuoki. Ma e teimatoa n namakina te maaku ni kaberoron te karongoaa.
“Ti na nako n ira te kamataku n te karebwe bweeuti n te tabo ni kaakibotu n tairiki,” E tuatua Tinana nakon Charlotte. “Ko kan iri?”
E mata n un Charlotte. “Ma e rangi n rebwetaua rebwen te bweeuti.”
“N te tai aei koa ikawai riki, e na rang kaunga matakuakinan te karebwe bweeuti,” e taku Tinana. “A na roko ni kabane raraom ikekei. Ti kona naba n uoti bwain taningam aika onoti. N am iango ko kona ni kataia?”
E kabubura ikeikena Charlotte. “E RAOIROI. Tao N na kataia.”
E waaki raoi n taina te kamataku n te karebwe bweeuti. A biriaitua i aon te uteute Charlotte ma raraona, n tibwai aia kanre ao n ira aia takakaro. E roo karawa n te tai ae tawe. E tekateka Charlotte ao e kanimwi bwain taningana ngke e tararake n tara karawa ma te nakonnano.
BOOM! BOOM! E REBWETAUA!
E tata manawan Charlotte, ao e namakina bwabwaana bwa e a koomakii. E kibarake ao e kataia ni kararoa man te rebwetau are e katobibia.
E biri rimwiin Charlotte Tinana ao e tabekia rake. A uaia n tekateka, ao e konna ni kaaniia Tinana. A tiinako ranin matan Charlotte.
“I kabwarabure ngkai koa maaku,” e taku Tinana. “I mena i rarikim. Tia tarai taian kara bwa ko aonga n aki tabe ma te karongoaa. Tera ae ko nooria ni matam?”
E ikerake Charlotte. “I noora te koora, ao te uraura, ao te kiriin.”
“Ngkai kabongana bwairim,” e taku Tinana. “Tera ae ko arokia?”
“I aroka boin te bubu ao te uteute,” e taku Charlotte. “Ao te popcorn!”
“Tera riki am namakin ae ko kona ni kabongana n te tai aei?”
E kamatuui matana Charlotte. “I kona n namakinii. Ngkana e rebwetaua te fireworks, I kona n namakina bukibukin manawau.”
“Iai te bwai ae ko kona n katoonga?” E titiraki Tinana.
E kaotinakoa newena Charlotte. “l aki kona n katoonga te bweeti.” E ngarengare.
Ni kabane bwaai aikai e karika mimiin Charlotte. A kanga aomata ni karaoi matan kaara aika kakaokoro? e mimiiakinna. E kanga n rebe te bweeuti? A kanga ni karaoi teia aika a kakaokoro? N te tai aei ao e aki taraa ni kakamaaku te bweeuti.
“Tinau, a rang kamimia te nano taian bweeuti!” E taku Charlotte.
Ngke e kawenea Charlotte n ana kainiwene n te tairiki anne Tinana, e titiraki Charlotte. “Bukin tera Tamara are i Karawa e aki kaeka au tataro ngke I bubutiia bwa e na kanakoa te karongoa ae kaberoro?”
E iango tabeua te tai Tinana. “E aki kakanakoi n taainako bwaai aika a kakamaaku Tamara are i Karawa,”e taku. “Ma n tabetai e buokiira bwa ti na nooria n teina ae kaokoro ke e anganiira ngaira aomata bwa ti na ibuobuoki ni kamanoira.”
“N aron ae E buokai n te tairiki aei!” e taku Charlotte.
“Eti anne!” E wiingare tinana. “Ko nakon te kamataku ni karebwean bweeuti e ngae ngke ko maaku. Ngkanne Tamara are i Karawa e buokiko ni kabebetea maakum. E buokiko naba n noora tamaroan te bweeuti man kabonganaan am namakin ake tabeua.”
E iangoi matan kaara aika tokatoka Charlotte i karawa ao e moangare. E teimatoa n aki tatangira te karongoa ae beroro. E teimatoa ni makua. Ma e ataia bwa e kona n ibuobuoki n taainako nakoina Tamara are i Karawa bwa e na ninikoria.
Kamataataan te tamnei iroun Adam Howling