“Iosua le Paionia,” Uo, Oketopa 2024, 10–11.
Iosua le Paionia
“O se paionia o le tagata muamua lea e faia se mea,” o le tala lea a Tamā.
O lenei tala sa tupu i le ISA.
Sa musamusa Iosua i luga o le auala savali a o latou savavali atu ma lona aiga i le fale mai le lotu. “Mate mai la?” na ia fai mai ai. “Ou te tuuina atu se lauga i le Peraimeri i le aso Sa a sau!”
“O le Aso Sa a sau o le Aso Paionia, lea tatou te manatua ai paionia na o mai i le Vanu o Sate Leki,” o le tala lea a Tinā. “Atonu e mafai ona e talanoa e uiga i paionia.”
Na aumaia e lena mea se manatu ia Iosua. Ina ua taunuu o ia i le fale, sa ia su’eina le mekasini o le Friend . Sa ia vaaia se gaoioiga o le “Tusi” lea na faaalia ai le auala e tusi ai se taavaletoso ua ufitia ma povi, e pei ona faaaoga e paionia pe a latou sopoia laufanua valevalenoa. Sa mana’o o ia e tusi se ata o paionia e u’u i le taimi o lana lauga. Sa aumai e Iosua ana vali ma amata loa ona galue.
Ina ua uma ona tusia e Iosua le ata, sa fesoasoani Tama ia te ia e tusi lana lauga. “O le a le mea e te fia talanoa ai e uiga i paionia?” O le fesili lea a Tamā.
Na manatua e Iosua se pese e uiga i paionia sa latou aoaoina i le Peraimeri. “Ia, o paionia o tagata ia sa savavali ma savavali ma savavali,” o lana tala lea.
“E sa’o oe! O le Au Paia na sopoia laufanua valevalenoa sa savavali mamao lava,” o le tala lea a Tamā. “Ae na e iloa o oe foi o se paionia?”
Sa faanunumi e Iosua ona fufulumata. “Ona ou te savali atu i le aoga i nisi taimi?”
Sa ata Tamā. “O oe o se paionia aua e te faia mea faigata,” o lana tala lea. “Ma e te filifilia le mea sao, e ui lava e le faigofie i taimi uma.”
“Manaia,” o le tala lea a Iosua. Sa faapitoa le lagona o le avea ma paionia!
“O se paionia o le tagata muamua foi lea e faia se mea,” o le tala lea a Tamā. “Ina ua avea oe ma se vaega o lo matou aiga, sa e aoao e uiga i le talalelei ma filifili e mulimuli ia Iesu Keriso. O le mea lena e avea ai foi oe ma se paionia!”
O Iosua sa vaetamaina. Sa ia vaai pea i lona aiga na fanau mai ai ma auai i ni gaioiga malie ma i latou. Ae ina ua sau o ia e nonofo faatasi ma Tinā ma Tamā, sa ia aoao e uiga ia Iesu Keriso ma le Tusi a Mamona. Sa alu o ia i le lotu ma i la’ua. Sa oo lava ina alu o ia i le malumalu e faamauina i lona aiga fou.
Sa ataata Iosua. Sa ia iloa le mea e fai atu i lana lauga.
I le vaiaso atoa, sa faataitai ai e Iosua mea o le a ia fai atu ai.
“E te manao ta te o i luga ma oe pe a fai lau lauga?” O le fesili lea a Tamā.
“Ou te manatu e mafai ona ou faitauina mea uma na ou tusia na o au,” o le tala lea a Iosua. “Ae e mafai ona e uuina i luga le ata na ou tusia?”
Sa ataata Tamā. “Ioe.”
Ina ua oo mai le Aso Sa, sa saunia Iosua. Sa tu o ia i luma o le potu o le Peraimeri. Sa tu Tamā i ona autafa ma uu i luga le ata.
“O le Aso Paionia lenei,” o le tala lea a Iosua. “O paionia o ni tagata sa savavali mamao. E pei o le Au Paia o e na sopoia laufanua valevalenoa.”
Sa tusi le lima o Iosua i le ata o loo uuina e Tamā.
“Ae o se paionia o le tagata muamua foi lea e faia se mea,” o lana tala lea.
Na tilotilo atu Iosua ia Tinā. Sa ataata mai o ia ia Iosua mai le pito i tua o le potu.
“O a’u o se paionia,” o le tala lea a Iosua. “Pe a ou papatiso, o le a avea au ma tagata muamua i lo’u aiga na ou fanau mai ai, e auai i le Ekalesia.” Sa ataata o ia. “E mafai ona avea i tatou uma ma paionia e ala i le faia o mea faigata ma filifili e mulimuli ia Iesu. I le suafa o Iesu Keriso, amene.”
Sa lagona e Iosua le fiafia a o ia toe savali atu e nonofo faatasi ma lana vasega Peraimeri. Sa fiafia o ia e avea ma paionia!
Ata na tusia e Melissa Manwill Kashiwagi