“Agalelei i le Tolauapiga,” Uo, Oketopa 2024, 30–31.
Agalelei i le Tolauapiga
Sa iloa lelei e Kat le lagona o le ese mai i isi.
O lenei tala sa tupu i le ISA.
Sa milimili ma le popole e Kat lona lima faapipi’i a o ave atu e Tinā le la taavale i le auala palapala. “Tinā, ua ou fefe!”
Sa tuuina atu e tina ia te ia se ataata mālu. “O lea ou te iloa. Ae ou te manatu o le a e fiafia i le tolauapiga i le taumafanafana, la’u pele. Mafaufau i tamaiti fou uma o le a e feiloai i ai.”
E leai se tala a Kat, ae i totonu sa ia mafaufau ai, O le mea lena lea ou te fefe ai.
E lei umi ae la taunuu i le tolauapiga o le aso. Sa o atu Tinā ma Kat e talanoa i lana faufautua o le tolauapiga, o Brian. “O Kat sa tipi lona lima a o pepe,” o le tala lea a Tinā ia te ia. “E le aafia ai lana taalo, ae o nisi taimi e faigata ai ona ia feiloai i ni tagata fou.”
“Aua e te popole, Kat,” o le tala lea a Brian. “Ua matou fiafia uma lava ua e i ai iinei.”
Sa fiafia Kat e feiloai i tamaiti o lana vaega. Sa latou faaigoaina i latou lava o Purple Tigers. Sa latou o i se savaliga sopo, ai sisi ma masi, ma faia ni tuuga savali. O Kat o se tasi o tagata e sili ona saoasaoa i le vaega.
I le faaiuga o le aso, na faasilasila mai ai e Brian o le a latou tauva ma se isi vaega i se tuuga taga. Sa faamoemoe Kat o le a manumalo le Purple Tigers!
Ina ua oo i lona taimi, sa toso mai e Kat le taga i ona tulivae ma amata ona oso. Ae sa faigata ona sii i luga le taga i le lima e tasi, ma sa lāvea ma sulu o ia i luga o le ie mamafa. Na pau Kat ma taavale i luga o le mutia. E oo ane i le taimi na toe tu ai i luga, ua maea le tuuga a le isi au. Sa faiaina le au a Kat.
O lena po i le taumafataga o le afiafi, sa ta’u atu ai e Kat i ona matua e uiga i le faaletonu i le tuuga taga. “Ou te le toe fia foi i le tolauapiga,” o lana tala lea. “Na faiaina le ‘au ona o a’u. Latou te le mananao ou te toe foi mai.”
“Ou te faamalie atu, si a’u pele. Sa opo e Tina ia Kat. “Ou te mautinoa o loo alolofa pea au uo fou ia te oe. Ma e te iloa pe o ai o le a alofa pea ia te oe e tusa lava po o le a?”
“O oe.” Sa ataata teisi Kat.
“Ioe. Ma te alolofa ia te oe! Ma e faapena foi lou Tama Faalelagi. O oe foi o Lona afafine, e te manatua?”
“E foliga mai sa e fiafia a o lei faia le tuuga taga,” o le tala lea a Tamā. “Aisea e te le toe taumafai tasi ai lava i le tolauapiga?”
Sa luelue le ulu o Kat. “Ua lelei.”
Sa ataata Tamā “Taumafai e matau pe a agalelei tagata ia te oe. Ma vaavaai mo auala e agalelei ai i isi. E fesoasoani lava lena mea ia te au pe a ou i ai i taimi faigata.”
O le aso na sosoo ai i le tolauapiga, sa faafeiloaia ai Kat e tamaiti mai lana vaega i ni faatalofa (high five) ma opo. E leai se tasi na ta’ua le tuuga taga, ma na galo ia Kat le tulaga popole tele sa i ai o ia. Sa ia faamatala ni tala malie ma ana uo fou a o latou faatalitali mo le amataga o gaoioiga.
Ona savali atu lea o Fesoasoani Brian i le vaega. Sa i ona autafa se tamaitiiti e pei o Kat le matua. “Faalogo, Puprle Tigers,” o le tala lea a Brian, “ua i ai sa tatou uo fou i le asō. O lona igoa o Rodrigo. E na o le faaSipaniolo lava e tautala ai Rodrigo, o lea o loo matou taumafai ai e sue se faufautua e tautatala faaSipaniolo e fesoasoani ia te ia.”
Sa aoaoina e Kat le faaSipaniolo i lana aoga, ae sa na o sina mea itiiti lava na ia iloaina. Sa fefe tele o ia e taumafai e talanoa ia Rodrigo.
Ona ia tilotilo atu lea ia te ia. Na foliga fefe foi o ia. Ai se faigata o le lē tautala i le gagana e tasi e pei o isi tamaiti, sa ia mafaufau ai. Sa ia iloaina le lagona o le ese mai i isi.
Na manatua e Kat le auala na faafeiloaia ai o ia e ana uo fou uma i le vaega. O le latou faatinoga sa ia lagonaina ai le alofagia, e pei lava ona alofagia e Iesu. Sa manao foi o ia e fai lena mea mo Rodrigo.
Na manatua e Kat le auala e fai atu ai “talofa” i le faaSipaniolo. O lea na ia manava loloto ai ma savali atu ia Rodrigo. “Hola,” na ia fai atu ai ma se ataata.
Sa alu ese atu foliga popole o Rodrigo, ma sa toe ataata mai o ia. Sa faaloaloa atu e Kat lona lima faapipi’i.
“¿Amigos?” na ia fesili atu ai. Uo?
Sa faateleina le ataata a Rodrigo. Sa ia uuina lona lima ma lulu. “Amigos.”
Ata na tusia e Flavia Drago