“O Se Sailiga Tāua,” Uo, Oketopa 2024, 36–37.
O Se SailigaTāua
O talafaasolopito o aiga sa pei lava o le taalo i se taaloga vitio o i ai faatasi ma se sailiga tāua tele!
Na tupu lenei tala i Mekisiko.
E fiafia Javi e aoao e fai ni mea fou. Sa fiafia o ia e aoao e taalo pesipolo. E fiafia o ia e aoao le kitara. Sa fiafia o ia e aoao e taalo i taaloga vitio fou. O lea la, ina ua fesili atu Papá pe manao e aoao se mea fou, sa saunia Javi.
Sa matamata Javi ia Papá o tatala lana komepiuta feaveai ma aumai i luga se saite e ta’ua o le “FamilySearch.”
“O le a ou aoaoina oe i le auala e saili ai igoa o o tatou tuaa,” o le tala lea a Papá. “O le toatele o i latou sa ola i se taimi ua leva lava, ma sa le’i maua e i latou le talalelei. Pe a tatou maua o latou igoa, e mafai ona tatou o i le malumalu e papatiso mo i latou. Ona latou maua lea o se avanoa e talia ai le talalelei.”
Sa manatua e Javi se lagona lelei sa ia maua ina ua papatisoina o ia. Afai e mafai ona ia fesoasoani i ona tuaa ia lagonaina lea lava lagona e tasi, e manao la o ia e a’oa’o pe faapefea!
Sa matamata Javi ia Papá o faaali atu ia te ia le mea e fai. Ona pasi atu lea e Papá le komepiuta feaveai ia Javi. “Ia, o oe!”
Sa ataata Javi. Sa ia faataitai le kiliki solo ma faitau igoa ma aso. O lona aiga lenei!
Mo nai po na sosoo ai, sa fesoasoani ai Mamá ma Papá ia Javi e aoao atili e uiga i le faia o galuega o talafaasolopito o aiga. Sa amata foi ona aoao lona tuafafine matua o Lili. Sa pei lava o le taalo i se taaloga vitio o i ai faatasi ma se sailiga tāua tele!
I se tasi Aso Sa, na faasilasila mai ai e le epikopo o loo faia e le siteki se lu’i faapitoa. E 60 aso o le a tuuina atu i tagata o le siteki, e saili ai le tele o igoa latou te mafaia e auina atu i le malumalu. O le sini o le aofa’iga o igoa e 5,000. I le faaiuga o aso e 60, o le a faia ai se pāti tele e faamanatu ai. O le a i ai foi taui mo tagata o le a mauaina igoa e tele.
“Ou te fia fesoasoani,” o le tala lea a Javi ina ua latou taunuu i le fale mai le lotu.
“Ma a’u foi!” Na fai mai ai Lili.
“Ae a la pe a amata loa i le taimi lenei?” Na fai atu ai Papa. “Vaai pe fia ni igoa e mafai ona e maua a o lei faia le taumafataga o le afiafi.”
Sa taufetuli atu Javi ma Lili i le potu i luma. Sa tatala e Lili le FamilySearch i lana telefoni, ma sa galue Javi i le komepiuta feaveai a Papá. E lei umi ae ia maua se faamaumauga mo le uso o le tamamatua o lona tama. Sa lisiina ai foi ni tamaiti se toatolu e lei papatisoina. Na faai’i atu Javi. Na ia maua ni igoa se tolu e auina atu i le malumalu!
Mo aso e 60 sa faaaluina ai e Javi le tele o lona taimi avanoa e fai ai talafaasolopito o aiga. Toetoe lava o po uma e na te sailia ai ni igoa, pe a uma le aoga. I Aso Sa, e galulue faatasi ai lona aiga e faia lea vaega.
I le faaiuga o aso e 60, na o atu ai Javi ma lona aiga i le falelotu mo le pātī. Sa i ai tacos, o musika, ma le toatele o tagata. Sa manaia tele!
Mulimuli ane, sa tu i luga le peresitene o le siteki.
“Ua ou mimita lava ia te outou uma,” na ia fai atu ai. “Na maua e le tatou siteki ni igoa se 10,000 mo le malumalu!”
Sa alalaga fiafia tagata uma. O mata o Javi ua lapopoa. Ua faaluaina le aofa’i o le latou sini!
Ona faasilasila atu lea e le peresitene o le siteki i latou na manumalo. O le tagata matua na manumalo o se tamaitai e le’i iloaina e Javi, ae o le manumalo o le autalavou o Lili!
“Ia mo tamaiti. Sa auina mai e se tasi ni igoa se 216,” o le tala lea a le peresitene o le siteki. Sa patipati tele tagata ma sa le mafai ai e Javi ona lagonaina atu le tala na sosoo ai a le peresitene o le siteki.
Sa eueu atu Javi e lona tamā. “Javi, o lou igoa la e sa ia ta’u mai.”
Sa faigata ona talitonu Javi. Pe na ia auina moni mai ni igoa se 216?
Sa savali atu Javi i luma. Sa ataata tele o ia a o faatalofa atu le peresitene o le siteki ma tuu atu ia te ia se tusi faamaonia. Sa i ai lona igoa i luga!
“O le a se lagona o le manumalo?” na fesili ai le peresitene o le siteki.
“Lelei tele,” o le tala lea a Javi.
Sa manaia le lagona o le manumalo. Ma sa matuai manaia lava le lagona o le aoaoina o se auala e fesoasoani ai i ni tagata se toatele!
Ata na tusia e Josh Talbot