“O Pese Alofa a Macy” Uo, Oketopa 2024, 14–15.
O Pese Alofaa Macy
“E ui lava e te laitiiti,” o le tala lea a G-pop, “ua ia te oe se fatu telē ua faatumulia i le alofa.”
O lenei tala sa tupu i Filipaina.
“Ou te misia G-pop” o le tala lea a Macy i lona tināmatua. Sa ia faaigoaina ona matua matutua o G-pop ma G-mom. “Talu mai lava le taimi na alu ai o ia i le falemai, sa ou manao lava e fesoasoani ia te ia. Ae ou te le iloa pe faapefea.”
Sa tulei solo e Macy meaai i luga o lana ipu. O lana malutaeao lea e sili ona fiafia i ai—araisa, fuamoa, ma le pani o i ai se sosisi (hot dog). Ae sa ia lagona le faanoanoa tele e le mafai ai ona ai.
Sa opo mai e G-mom ia Macy. “O lea ou te malamalama. O nisi taimi tatou te lagona ai le leai o se fesoasoani e mafai ona tatou faia pe a feagai se tasi tatou te alolofa i ai ma se taimi faigata. Ae ia manatua, e toalua tagata e sili atu lo laua alolofa ia i tatou nai lo le mea e mafai ona tatou mafaufauina.”
“O ai?” O le fesili lea a Macy.
“E alolofa le Tama Faalelagi ma Iesu Keriso ia te oe.” na fai atu ai G-mom. “Pe a tatou faatuatua ia i La’ua, e La te taialaina i tatou ma tuuina mai ia i tatou le malosi.”
A o faalogologo mai Macy, sa lagona e lona loto le faamoemoe. Sa ia iloa e mafai e le Tama Faalelagi ma Iesu ona fesoasoani ia G-pop.
O le po lena, na tootuli ai Macy i tafatafa o lona moega ma moeiini ona mata.
“Tama Faalelagi e, faamolemole ia puipui ia G-pop ma fesoasoani ia te ia ia maua se lagona lelei. Ou te alofa ia te ia, ma ou te alofa ia te Oe. Faamolemole fesoasoani mai ia a’u ia ou iloa le mea e mafai ona ou faia mo ia.”
O le taeao na sosoo ai, na ala ae ai Macy i le susulu o le la i ona pupuni. Sa iai sona manatu! O le usuina o pese a le Peraimeri ma viiga a le Ekalesia o se tasi lea o mea sa fiafia o ia ma G-pop e fai faatasi. Atonu o le a faamāfanafanaina ai o ia!
Sa ia tu i luga, fai lana tatalo i le taeao, ona fesili atu lea ia G-mom pe mafai ona asiasi atu ia G-pop. E le’i umi ae latou agai faatasi atu loa i le falemai. Sa fiafia o ia i le toe vaai atu ia G-pop ma talosia e ataata ai o ia.
Ina ua savali atu Macy i totonu o le potu o le falemai, sa nofo G-pop i le moega ma se palanikeke i luga o ona vae. Sa foliga lelava o ia. Ae ina ua ia vaai ia Macy, sa faatumulia ona foliga i le olioli. Sa tamoe atu o ia (Macy) ia te ia ma fusi atu ia te ia ma le agamalu.
“Taeao manuia, G-pop!”
“O le a le mea ua aumaia ai oe iinei, si a’u lang-lang laititi Macy?”
Lang-lang o lona uiga o le “alofa.” O le igoa tauvalaau lea e sili ona fiafia i ai G-pop mo Macy.
“Ou te fia pese mo oe,” o le tala lea a Macy. Sa nofo o ia i ona tafatafa i luga o lona moega ma tatala lana tusipese. “O a’u se atalii o le Atua, ua Na auina mai a’u nei.”
Sa faatumulia fofoga o G-pop i loimata o le olioli. Sa auai o ia ma amata foi ona pese.
“ … Ia ou nofo ai i lenei lalolagi, ma matua agalelei.”
Sa faatumulia le potu laitiiti o le falemai i o latou leo. E lei umi, ae auai mai foi ma G-mom. Sa i ai se lagona toafilemu o Macy i lona loto a o la pepese faatasi.
Ina ua uma, sa aapa atu le lima o Macy, ma sa uu mau e G-pop.
“Tatou tatalo, G-pop.”
Sa latou tatalo faatasi, ma sa ole atu Macy i le Tama Faalelagi e faamanuia G-pop i le malosi ma le faamalologa.
Ina ua maea le tatalo, sa tilotilo atu G-pop ia Macy. “Faafetai mo au pese matagofie ma tatalo. Ua e fesoasoani ia te au ia ou maua se lagona lelei. E ui lava e te laitiiti, ae o loo i ai sou loto telē ua faatumulia i le alofa.”
Sa ataata Macy. Sa fiafia o ia ona sa fesoasoani lona alofa ma le faatuatua ia G-pop ia maua se lagona lelei. Sa ia iloaina o le a i ai pea le Tama Faalelagi ma Iesu Keriso e fesoasoani i lona aiga i taimi faigata.
Ata na tusia e Chrisanne Serafin