“O Le Teufugalaau Mata-ole-la,” Uo, Oketopa 2024, 40–41.
O Le Teufugalaau Mata-ole-la
Sa manao Amalie e fesoasoani. Ae e faapefea?
Na tupu lenei tala i Tenimaka.
Sa mulimuli atu Amalie i ona matua i faitotoa o le falelotu. Sa faatumulia le falesa i le leo o le piano o loo taina viiga. Sa maua e Amalie ma lona aiga se nofoa ma nonofo i lalo.
Na amata le sauniga faamanatuga, ma e lei umi ae usuina e le paranesi atoa le viiga amata. A o pese o ia, sa matauina e Amalie lo latou tuaoi o loo sosoo ai, o Sister Aisha, o nofo latalata ane. Ae sa le’i pese Sister Aisha. Sa pupula faa’u’u o ia.
O Sister Aisha e agalelei lava ia Amalie i taimi uma. Ae sa foliga faanoanoa tele o ia. Na iloa e Amalie sa nofo toatasi o ia. Atonu sa lagona e ia le tuuatoatasi.
Sa moomoo Amalie e mafai ona ia faia se mea e fesoasoani ai. Ae o le a la?
O le vaiaso na sosoo ai, na alu ai se tietiega uila a Amalie i se auala umi. Sa ia tietie atu i fanua lanumeamata tetele. Na faamafanafanaina e le la lona pa’u.
E le’i umi ae tau atu o ia i se fanua o fugalaau mata-ole-la. Sa talotalo teisi atu fugalaau lanu samasama i le matagi ma faaloaloa atu i le la. Sa matua uumi ma tetele!
Na faapea mai se faailoga i autafa o le fanua, O fugalaau mata-ole-la e ave fua! Ia ave le tele e te manao ai.
Sa sioa atu Amalie i le fanua. Sa foliga mai fugalaau o se vasa samasama o loo ataata i le lagi.
Sa ia paka lana uila ma piki mai ni fugalaau. E mafai ona ia tuuina atu ia Tinā! E fiafia Tinā i fugalaau. Ae sa lava fugalaau e mafai ai foi ona ia pikiina nisi mea mo se isi tagata.
Na oo mai se igoa i lona mafaufau: Sister Aisha. Atonu e mafai ona fesoasoani nei fugalaau e faafiafiaina ai lona aso.
“Talosia ae fiafia o ia i fugalaau mata-ole-la,” o le tala lemu lea a Amalie ia te ia lava. Ae sa fai si ona popole laitiiti. Ae a pe a faapea Sis Aisha ta’i ese foi lenei mea?
Sa le toe pikiina e Amalie fugalaau. Sa ia milimiliina petala vaivai i le va o ona tamatamailima. Atonu e le tatau ona ia tuuina atu ni fugalaau ia Sister Aisha.
Leai, o le mafaufau lea o Amalie. Sa ia iloaina e tatau ona ia tuuina atu fugalaau ia Sister Aisha. Atonu latou te le faaleleia mea uma. Ae sa manao lava Amalie e fesoasoani pea, e tusa lava pe itiiti se auala. E mafai ona ia tuuina atu fugalaau ia Sister Aisha i le lotu taeao.
Sa umi se taimi na faaalu e Amalie e pikiina ai fugalaau sili ona lelei. Sa ia tuufaatasia ma tuu ma le faaeteete i le ato o le uila. Ona oso lea o ia i luga o lana uila ma vili atu i le fale. O le lanu samasama susulu o fugalaau sa foliga matagofie mai faatasi ma le lanu meamata loloto o le togavao i tua atu.
Ina ua taunuu Amalie i le fale, sa ia nonoaina ia teufugalaau taitasi i se lipine. Sa ia tuuina atu se tasi ia Tinā.
Sa ataata tele Tinā ina ua ia vaai i ai. “Faafetai! Ta’i aulelei.” Sa ia tuuina fugalaau i totonu o se mea tu’u teu i luga o le laulau.
O le aso na sosoo ai, na ave ai e Amalie le isi teufugalaau o mata-ole-la i le lotu. Sa ia maua Sister Aisha o nofo na o ia i luga o se nofoa.
“Talofa,” o le tala lea a Amalie. “Sa ou pikiina ni fugalaau mata-ole-la mo oe.”
Sa tuu atu e Amalie fugalaau. Ina ua vaai atu Sister Aisha i ai, sa ataata o ia. Ua fai si umi e lei toe vaai lava Amalie o ataata o ia. Sa faatumulia ona mata i le malamalama.
“Faafetai lava,” o le tala lea a Sister Aisha. Sa ia fusi mai Amalie. “O fugalaau nei e sili ona ou fiafia i ai.”
Sa ataata foi Amalie. Na te lei iloaina o fugalaau ia e sili ona fiafia i ai Sister Aisha! Ae na uunaia o ia e le Agaga Paia e fai se teufugalaau mo Sister Aisha, ma sa faafetai Amalie ona sa ia faalogo.
Ata na tusia e Toby Newsome