“Pātī a Ryan,” Uo, Oketopa 2024, 4–5.
Pātī a Ryan
“Aisea ua e valaauliaina ai Chad?” o le fesili lea a Braden.
O lenei tala sa tupu i le ISA.
Sa tapuni e Ryan le teutusi mulimuli ma ataata. Ua toeitiiti lava oo mai lona aso fanau, ma ua le mafai ona ia faatali e valaaulia ana uo i lana pati! Sa fesoasoani Tinā ia te ia e faia ni valaaulia i vaa roketi ma fetu. Sa ia mautinoa o le a avea ma aso fanau sili ona lelei.
O le uo muamua lava na manao Ryan e valaaulia o Chad. Sa matuai lelei lava Chad, ma sa fiafia lava Ryan ia te ia. O nisi taimi e tau memu memu ai Chad i ana upu, ma e le lelei tele o ia i taaloga. Ae sa le’i afaina ia Ryan. Sa lelei Chad i isi mea. E fiafia o ia e fai ni manu laiti origami e ala i le gaugau o pepa. I se tasi taimi sa ia faia ai ia Ryan se urosa laitiiti. Sa tuu e Ryan i luga o le laulau i lona potu.
Sa savali atu Ryan i le fale o Chad ma tuu atu ia te ia se valaaulia. “E mo la’u pātī o le aso fanau i le Aso Toonai,” o lana tala lea. “Ou te faamoemoe e mafai ona e sau!”
Sa ataata tele o ia. “Faafetai lava. O le a ou i ai iina.”
A o lei alu ese atu Ryan, sa faaali atu e Chad ia te ia lana origami fou. Sa i ai ni ana oti, chipmunks, squirrels, ma lulu—o se vaomatua atoa o manu laiti pepa. Sa matuai seki lava!
Na sosoo ai, na maua e Ryan ia Ty ma Braden i le fale o Ty. Sa ia tuuina atu ia i la’ua taitoatasi se valaaulia.
“O ai se isi la e omai?” Na fesili ai Ty.
“O lo’o o’u valaauliaina Aleki, Matt, Iakopo, ma Chad.”
“Ugh,” o le tala lea a Braden. “Aisea ua e valaaulia ai Chad? E ese lava o ia.”
Sa faamalo Ryan. “Aua o ia o la’u uo!”
“Ia, e le o ia o se ma uo,” o le tala lea a Ty. “Afai e sau Chad, ou te le sau la.”
“E faapena foi la a’u,” o le tala lea a Braden.
Sa toe savali atu Ryan i le fale. Sa ia le iloa po o le a le mea a fai. Sa manao o ia ia o mai Ty ma Braden i lana pati, ae sa manao foi o ia sau Chad.
Ina ua ia oo atu i le fale, na ia tau atu ia Tinā le mea na tupu.
“Ou te faamalie atu ona o o la lagona faapena,” o le tala lea a Tina. “E foliga mai la te lei tuuina atu ia i laua lava se avanoa e faamasani ai ia Chad. O le a sou manatu i le mea e tatau ona e faia?”
Sa filemu Ryan mo se minute. Sa aoaoina o ia e Tinā ma Tamā e faapea, pe a manaomia e ia se fesoasoani, e mafai e le Agaga Paia ona taialaina o ia. Sa la fai mai e pei o se leo filemu e mafai ona e lagonaina i lou loto.
Sa faia e Ryan se tatalo le leoa. Tama Faalelagi e, o le a se mea e tatau ona ou faia?
Ina ua ia mafaufau ia Ty ma Braden, sa ia lagona le popole ma sina faanoanoa laitiiti. Ae ina ua ia mafaufau e valaaulia Chad, sa ia lagonaina le toafilemu ma le fiafia. Sa ia iloaina sa ta’u atu e le Agaga Paia ia te ia o le valaauliaina o Chad o se filifiliga lelei.
I le Aso Toonai, na fesoasoani ai Ryan ia Tamā e faatulaga ni taaloga e taaalo ai i tuafale. Sa faatulaga e Tinā meaai mama e sili ona fiafia i ai Ryan, popukoni ma pretzels. Sa taunuu taitoatasi uo a Ryan.
E lei o mai Ty ma Braden. Ae sa tele le fiafia o Ryan ma isi ana uo. Na oo lava ina faaali atu e Chad ia i latou le auala e fai ai origami. Sa latou o uma i le fale ma a latou lava manu pepa.
O se aso fanau sili lea ona manaia! Sa lagona e Ryan le fiafia ma le lotofaafetai.
Na tuuina atu e Ryan ia Chad se faatalofa (high-five). “Faafetai mo lou auai mai,” na ia fai atu ai. “Ou te fiafia ona o i taua o ni uo.”
Sa ataata mai Chad. “Ma a’u foi.”
Ata na tusia e Colleen Madden