“O Se Galuega Tele,” Mo le Malosi o le Autalavou, Ian. 2021, 20–21.
O Se GaluegaTele
2021 Autu a le Autalavou:
Mataupu Faavae ma Feagaiga 64:33–34
Ua valaaulia outou e le Alii ina ia auai “i le galuega silisili” i le lalolagi.1
O outou tamaitai talavou ma alii talavou ofoofogia o se vaega o se mea matagofie—ua outou “faataatiaina le faavae o se galuega tele” (Mataupu Faavae ma Feagaiga 64:33). O lena galuega e fesoasoani i le Alii o Iesu Keriso, e faataunuu Lana misiona a o tatou auai i le faapotopotoina o Isaraelu i itu uma o le veli ma le fausiaina o Siona.
Auai i le Autau Talavou
Ua valaaulia outou e Peresitene Russell M. Nelson e auai faatasi i lena galuega o se vaega o “le autau talavou a le Alii.”2 Ae o le a le autau? O se autau o se iunite faapitoa ua mamanuina e ausia faatasi ni galuega patino. O lona uiga, o oe o se vaega o se iunite faapitoa e saili ma ausia lau vaega i le galuega tele a le Alii.
Ina ua valaaulia oe e le perofeta e vaai i le faamoemoega o o outou olaga ma se taulaiga i le faapotopotoina o Isaraelu, na amata ona foliga mai lou olaga e pei o le olaga o Mose. O Mose, lea na tausia o se aloalii o Aikupito, sa tatau ona sola mo lona ola ma mulimuli ane na fiafia i lona olaga faatauvaa o se leoleo mamoe. Ae na valaauina o ia e le Alii ma tautino atu, “ua ia te au se galuega mo oe” (Mose 1:6). Na silafia e lo tatou Tama oi le Lagi le mea na lei iloa e Mose: e faapea, faatasi ai ma le fesoasoani a le Atua, e mafai ai ona avea Mose ma se meafaigaluega i le laveaiina o se malo tele—na te mafaia soo se mea.
E Mafai Ona E Faia se Eseesega
Atonu e te mafaufau, “E le o au o Mose. Mata e mafai ona ou faia se eseesega i lenei lalolagi?” Na faapena o matou lagona i nisi o taimi, ae ua lava le umi ua matou i ai e iloa ai o le tali o le ioe. Tatou te vaai i talavou masani i aso uma o e ua filifili e le ola i ni olaga masani. Ua latou faia se faatosinaga mamana i luga o i latou o loo siomia i latou i le na o le avea filemu ma soo moni o Iesu Keriso. O loo latou atiina ae a latou taleni ma fesoasoani i o latou aiga ina ia manuia. Ua valaauina outou e se perofeta e “faataatia le faavae o se galuega tele.” Ao tatou faalagolago ia Iesu Keriso ma saili e fai Lona finagalo, tatou te faia se eseesega!
E le o tuua na o oe i lenei mea. A e auai i le autau a le Alii, ua e auai i se vaega toatele o le autalavou i le lalolagi atoa. Matou te tutu soosoo tauau ma outou faatasi ma o outou matua, taitai, ma uo, aposetolo ma perofeta, ma agelu moni o le lagi, o loo taumafai uma e faataunuu faatasi le galuega a le Alii (tagai Mataupu Faavae ma Feagaiga 84:88).
O Mea Iti Foi e Tutupu Mai ai Mea Tetele
O le a tatou faia sina mea itiiti i lea taimi ma lea taimi. Ua valaaulia i tatou e le Alii ina ia tatou faia ni laa laiti ma faigofie a o tatou amatalia lenei galuega tele (tagai Mataupu Faavae ma Feagaiga 64:33). O galuega faifai pea, ma faamaoni o le a tuleia i tatou i luma ma valaaulia i tatou e aapa atu ma fesoasoani ia i latou o siomia i tatou. O nisi o nei mea faatauvaa e mafai ona fetuunai patino ia te oe ona o le a le tutusa uma malaga a tagata.
Tatalo ina ia iloa po o ai oe ma malamalama i lau matafaioi patino i le fuafuaga a le Atua. Tatalo ia iloa po o a mea laiti ma le faatauvaa e tatau ona e faia i aso taitasi. Atonu e tatau ona e aluese mai i tulaga ua e lagolelei ai, ae a o e naunau e galue i musumusuga e te maua, o le a tele atu isi mea e tuuina atu ia te oe.
E pei ona aoao mai talu ai nei Peresitene Nelson, “A o tatou saili e avea ma soo o Iesu Keriso, o a tatou taumafaiga ia faalogo ia te Ia e manaomia ona matua faia ma le faamoemoe sili i ai. E manaomia ai le lotofuatiaifo ma taumafaiga tumau e faatumu o tatou olaga i aso taitasi i Ana afioga, Ana aoaoga, ma Ana upumoni.”3
O Le A Faalautele e le Alii Ou Tomai ma Faateleina Lou Olioli
A o e saili atu i faaaliga, o le a taialaina oe e le Alii ia iloa pe faapefea ona faaaoga au taleni ma uiga patino e auauna atu ai ma ola i le talalelei. O le a Ia faalauteleina ou mafaufauga, fatufatuai, ma le gafatia i auala o le a le mafai ona e mafaufauina e mafai.
A o e ofoina atu lou loto naunautai ma le mafaufau i le Alii, o le a e maua nisi uo ma faateleina avanoa e auauna atu ai. O lou lagona o le faasinomaga ma le faamoemoega o le a faamalosia, ma o le a e maua le olioli.
Atonu tatou te lagonaina i nisi taimi le fiafia ma le faigofie o mea uma, ae o loo i ai se isi mea o loo faapolopolo mai e le Atua. E pei lava ona i ai ia te Ia se galuega tele mo Mose, o loo i ai Sana galuega tele mo oe. Aua le loto vaivai! Ua i ai lo matou talitonuga atoa ia te outou—le autau talavou a le Alii.