Aoaoina o le Gagana a le Agaga

Sauinia e Sam Lofgran

Mekasini a le Ekalesia

O faaaliga e pei o se gagana e manaomia e i tatou taitoatasi ona aoaoina.

O le aoaoina o se gagana fou e mafai ona avea ma se galuega faigata. Afai sa i ai sau vasega o le gagana i le aoga, pe na e taumafai e aoao se gagana e oe lava ia, e mafai ona e iloa lenei mea mai aafiaga! E manaomia ai le galue malosi ma le tuuto. Sa ou aoaoina le faaSipaniolo i la’u misiona, lea sa faigata i le taimi muamua, ae mulimuli ane, faatasi ai ma le fesoasoani a le Agaga, sa ou mafaia ai.

Ou te fiafia e mafaufau i faaaliga o se ituaiga o gagana—o le gagana a le Agaga—e manaomia ona tatou aoaoina i o tatou olaga. Na aoao mai Peresitene Russell M. Nelson, “I aso a sau, o le a lē mafai ona ola ai faaleagaga e aunoa ma le taiala, taitaiga, faamafanafanaga, ma le faatosinaga faifai pea a le Agaga Paia.”¹

Pe a e mafaufau i ai, o le aoaoina o se gagana fou ma le aoaoina o le gagana a le Agaga e tele ina tutusa. Vaai i mea e tutusa ai—e mafai ona la matuai fesoasoani e te aoao atili ai e uiga i le auala e maua ai faaaliga e ala i le gagana a le Agaga.

Sitaili o le Aoaoina

A tatou aoaoina muamua se gagana fou, e eseese auala e aoga mo tagata eseese ia manatua ai ni mea. Mo au, o le suesueina o le kalama ma le tusiaina o mea i lalo sa fesoasoani tele i le aoaoina o le faaSipaniolo. O isi faifeautalai e fiafia e faataitai ona talanoa ma a latou soa. E mafai e le tasi auala ona fesoasoani sili atu nai lo isi—saili po o le a le mea e sili ona aoga mo oe.

E tatou te le lagonaina uma pe faalogoina foi le Agaga i le ala lava e tasi. Faapei o lo’u tina, mo se faataitaiga. Mo sina taimi a o ou tuputupu ae, sa ou popole ona sa le mafai ona ou lagona le Agaga aua ou te lei maua lava ni uunaiga e pei o ia. Na te faamatalaina i taimi uma uunaiga e oo mai o ni upu i lona mafaufau. Ou te lei mauaina lava lenei mea, o lea sa ou manatu ai e le mafai ona ou lagonaina le Agaga. Ae ua oo ina ou iloa e fesootai mai le Agaga ia te au e tele lava i lagona po o uunaiga nai lo o upu. O lagona o le filemu, olioli, ma le alofa e masani ona fesootai ma lo’u aafiaga o faaaliga.

E pei lava o sitaili o le aoaoga, o le tasi auala e lagonaina ai le Agaga e le sili atu nai lo le isi. E tulaga ese i tatou uma, e faapena foi ona ese le fesootai mai o le Agaga ia i tatou taitoatasi. I le Mataupu Faavae ma Feagaiga, e mafai ona tatou aoao ai e uiga i ituaiga auala uma e mafai ona talanoa mai ai le Agaga ia i tatou. E mafai ona Ia “faapupulaina [o tatou] mafaufau,” “tautala atu le filemu i [o tatou] mafaufau,” “tau mai [ia i tatou] i o tatou mafaufau ma i [o tatou] loto,” po o le “nofo i [o tatou] loto,” pe mafai foi ona tatou lagonaina le mu i o tatou loto po o le lagona faapea ua sao,” e faapea foi i le tele o isi auala (tagai Mataupu Faavae ma Feagaiga 6:15, 23; 8:2; 9:8).

A o tatou suesue i tusitusiga paia ma faataitai le faalogo atu i le Agaga, e mafai ona tatou iloa le auala e talanoa mai ai o Ia ia i tatou.

Fesili mo se Fesoasoani

Afai o loo e aoaoina se gagana, e mafai ona aoga tele le maua o le fesoasoani mai se tasi e iloa le gagana. E mautinoa lava le fesoasoani o tusi ma isi punaoa, ae e saoasaoa ai le faagasologa o le talanoa i se tasi e tautala i le gagana.

A tatou mananao e aoao atili e uiga i le Agaga, e mafai ona tatou maua se fesoasoani faaopoopo pe a tatou fesili atu i tagata tatou te faatuatuaina i le ala latou te faia ai—tagata o le aiga, taitai, po o uo. Ae o le mea taua lava o le ole atu i le Tama Faalelagi. Atonu tatou te fesili atu ia te Ia mo ni mea e pei o ni avanoa se tele atu e lagona ai le Agaga pe fesoasoani i le iloaina pe a tatou maua ni uunaiga. Afai tatou te lotomaualalo, ole atu ia te Ia e fesoasoani mai ia i tatou, ma ia faatuatua o le a fesoasoani mai o Ia ia i tatou ia iloa le ala e lagona ai le Agaga, o le a Ia fesoasoani mai ia i tatou.

Tusi i Lalo

A o e aoaoina se gagana, o le tusitusi i lalo o mea e mafai foi ona fesoasoani tele. Sa ou feaveai se tamaiapi o faamatalaga i le aso atoa e tusi ai i lalo upu fou o le vaogagana na ou faalogo i ai, ma ou te taumafai lava e fai se api talaaga i le faaSipaniolo i po taitasi ina ia mafai ona ou faataitai ai. E le o ia i tatou ni manatuaga atoatoa, o lea, o le tusiina o mea i lalo tatou te toe foi ai e iloilo.

Ua valaaulia i tatou e o tatou taitai e tusi i lalo uunaiga faaleagaga ina ia aua nei galo ia i tatou.² O le tusia o ia mea i lalo e mafai ona fesoasoani ia i tatou ma le Agaga i ni auala se lua: (1) e mafai ona fesoasoani ia i tatou e manatua ai musumusuga ma lagona pe a mavae se taimi. Atonu o se uunaiga ua tuanai o le a fesoasoani ia te oe i le lumanai, pe na o le faamanatu atu ia te oe sa fetalai moni mai le Agaga ia te oe. (2) O se auala sili foi e siaki ai pe na faapefea ona e lagonaina le Agaga i le taimi ua tuanai ina ia mafai ona e iloa lelei atili ai i le lumanai. O lena auala, e mafai ai ona e amata iloa atili le Agaga.

Taumafai Pea

Ma le mea mulimuli ae le itiiti ai le taua, aua le fiu. E oo lava i le meaalofa o gagana, e foliga mai lava o le a e le aoaoina atoa se gagana i le po e tasi. A o faaauau pea ona e aoao ma galue malosi, o le a oo mai, ae e tatau lava ona e maua le faatuatua ma le faapalepale pea.

O le aoao e maua faaaliga ma faamasani atili i le Agaga o se taumafaiga moni lava i le olaga atoa. Ou te mautinoa pe a e fesili i ou matua po o taitai o le Ekalesia, latou te fai atu o loo latou galulue pea i ai. O le mea lea, aua le lotovaivai pe a lagona ua fai si umi—e le na o oe! Tatou te manaomia uma se taimi e aoao ai se gagana fou. O le mea lea ia onosai, ia taumafai pea, ma o le a i ai le Alii iina e fesoasoani ia te oe e aoao le gagana a le Agaga.