“ ‘Fakafehokotaki,” Ki hono Fakamālohia ʻo e To‘u Tupú, Fēpueli 2021, ʻi loto he takafi muʻá.
Fakafehokotakí
Maximiliano B.
16, ‘Āsenitina
Faitā ʻa German Sittner
Na‘á ku sai‘ia ʻaupito hono fokotu‘u ha ngaahi taumuʻa ki he polokalama foʻou ʻa e Fānaú mo e To‘u Tupú. Kuó u feinga ke fokotu‘u ha ngaahi taumuʻa te ne tokoni‘i au ʻi he‘eku moʻui faka‘ahó, ka kuó u tokanga taha ki he ngaahi taumu‘a te ne tokoniʻi au ke u mateuteu ki he ngāue fakafaifekaú. Kuó u fokotu‘u ha ngaahi taumuʻa ke fakaafe‘i ha kaungāmeʻa ki ha ‘ekitivitī ʻa e Siasí, lava ʻeku ngaahi kalasi ‘i he akó, fakamālohisino he ʻaho ‘e ua he uike, mo fakaleleiʻi ʻeku maʻu kalasi he seminelí. Kuó u ‘osi lavaʻi ha niʻihi ‘o e ngaahi taumuʻa ko ‘ení, pea ʻoku ou fuʻu fiefia ai. ‘Oku fakafiefia hono ʻiloʻi kuo hoko ha fuʻu liliu lahi kiate au.
Kuo tākiekina lahi ʻe he meʻá ni ʻeku mo‘uí, koeʻuhí ʻoku ‘ikai ko hoʻo fakahoko pē ha ʻekitivitī, tohi ia, pea ko ʻene ʻosí ia. ʻOkú ne tokoni‘i au ke u fakalakalaka mo liliu ʻi he ngaahi tapa kehekehe kotoa pē ʻo ‘eku moʻuí. Kuo tokoniʻi au ‘e he ngaahi taumuʻá, tautautefito ki he ngaahi meʻa fakalaumālié, ke u loto-toʻa lolotonga e ngaahi taimi faingata‘a ko ʻení, ʻa ia ʻoku ou ‘ilo ʻe tokoniʻi foki au ai ʻi heʻeku ngāue fakafaifekaú. Pea ko hono moʻoní, ʻoku ʻikai fakataumuʻa e ngāue fakafaifekaú ke ngata pē ʻi he taʻu ʻe ua ka ‘i he toenga ʻo ho‘o moʻuí, ko ia ʻoku ou ʻiloʻi kapau te u ngāue mālohi mo talangofua, ʻe tuʻuloa kotoa e ngaahi meʻá ni ʻi heʻeku moʻuí.