“Pikisia ʻi he Pelepelá: Ko ha Lēsoni ʻi he Fakatomalá,” Ki Hono Fakamālohia ʻo e To‘u Tupú, Fēpueli 2021, 14–15.
Haʻu, ʻo Muimui ʻIate Au
Pikisia ʻi he Pelepelá
Ko ha Lēsoni ʻi he Fakatomalá
‘I heʻetau fili ke tafoki ki he Tamai Hēvaní mo Sīsū Kalaisí, ‘oku tau ʻiloʻi ʻokú Na ʻi ai mo mateuteu ke tokoniʻi kitautolu ke tau hao mei ha faʻahinga tūkunga faingataʻa pē.
Tā fakatātā ʻa Dean MacAdam
Ko e taimi ʻe niʻihi ʻoku faingataʻa e talanoa kau ki he fakatomalá. Mahalo ʻoku ‘ikai ke tau ʻilo ʻa e ‘uhinga ke fakatomalá. Mahalo te tau fakakaukau ko e niʻihi pē ʻe lava ke fakamolemoleʻí pe ko ʻetau toki fakatomalaʻi pē ʻa e ngaahi angahala lalahí. ‘Oua ʻe fanongo ki he ngaahi fakakaukau ko iá.
‘Oku finangalo ʻa e Tamai Hēvaní ke ke ‘iloʻi e ʻuhinga moʻoni ʻo e fakatomalá. ‘Okú Ne finangalo ke ke ʻilo‘i ʻoku ‘ikai ko ha tautea ia ka ko ha tāpuaki. Ko e fakatomalá ko ha liliu ʻiate kitautolu—ʻetau fakakaukaú, ‘etau holí, tōʻonga moʻuí, mo hotau ʻulungāngá. Ko e konga ia ‘o e hoko ʻo anga faka-Kalaisi angé. ʻOku tokoni e fakatomalá ke ke ongoʻi fiefia lahi ange he taimí ni.
Fakatomala Fiefia
ʻE ʻomi fēfē ʻe he fakatomalá ʻa e fiefiá?
Naʻe folofola ʻa Sīsū Kalaisi ʻo pehē, “Tafoki mai ʻeni kiate au, pea fakatomala mei hoʻomou ngaahi angahalá … koe‘uhi ke u fakamoʻui ‘a kimoutolu” (3 Nīfai 9:13). ‘Oku fakaʻatā kitautolu ‘e he fakatomalá ke tau “ongoʻi [‘a] e fiefia ʻo e maʻu e tokoni ʻa e Fakamo‘uí.”*
‘Oku loto ‘a Sētane ke tau pehē ʻoku liʻekina kitautolu he taimi ʻoku tau fai ai ha ngaahi fehalākí. ʻOku ʻikai ʻaupito ke moʻoni ia! ‘Oku tokoniʻi kitautolu ʻe he fakatomalá ke tau ʻilo ʻoku ʻi ai maʻu pē ʻa e Tamai Hēvaní mo Sīsū Kalaisi. Ka neongo ia, ʻoku ʻatautolu ʻa e fili ke tafoki kiate Kinauá. ‘I heʻetau fai iá, ‘oku tau maʻu ai ‘a e ʻofa, nonga, mo e fiefia ‘i hono ʻiloʻi ‘oku lava ke fakamolemoleʻi kitautolu pea tau toe feinga peé.
Ko ha Ho‘atā Pelepela
Na‘a ku fakakaukau ki he lēsoni ko ʻeni fekau‘aki mo e fakatomalá hili haʻaku sio ki hoku tokouá ‘i ha hoʻatā ‘e taha. Naʻe ofi atu e konga kimui homau ʻapí ki ha loto ʻataʻatā ne fakamaʻa ke fai ai ha langa. Naʻe pelepela ʻaupito e loto ʻataʻatā ko ʻení hili ha fuʻu ʻuha lahi. Na‘e fuʻu pelepela ʻaupito. Naʻe palakū, hekeheke, mo loloto ʻaupito e pelepela ko ʻení. Kapau te ke ngoto he pelepelá, ko e meʻa faingataʻa moʻoni haʻo feinga ke mavahe mei ai.
Ne ʻi ai e ʻaho ne fakakaukau hoku tehiná ke hū kituʻa ʻo vaʻinga ai. Naʻe fakamanatuʻi ange heʻeku faʻeé ke nofo maʻu pē he laʻi sima ofi mai ki falé. Ka neongo iá, ne aʻu atu hoku tehiná ki he foʻi loto ʻataʻataá.
Hili ha ki‘i taimi siʻi, ne u fanongo ki ha taha ‘oku tangi peá u fakasio atu ki tu‘a. Ne ʻikai ke u tui ki he meʻa ne hokó! Na‘e tangutu hoku tehiná he fuʻu loto pelepelá, kuo pelepela ʻatā, pea naʻá ne tangi. Na‘á ne feinga ke mavahe mei he pelepelá, ka na‘e ʻikai pē ke lava. Ko e taimi kotoa pē naʻá ne feinga ai ke mavahé, ko e lahi ange ia ʻene ngoto hifo he fuʻu pelepela palakuú. Ko hono mo‘oní, ne mau fakavave atu ke fakahaofi ia.
Na‘á ku tokoni ki heʻeku fa‘eé ke fola ha ngaahi laʻi papa ke ma lue ai ki hoku tehiná ke ʻoua naʻá ma toe pikisia mo kimaua. Na‘e fuʻu matolu e pelepelá he ko e taimi ne fusi hake ai hoku tehiná, naʻe fihia ai pē hono suú mo e sitōkení!
Maʻa ʻia Kalaisí
‘E lava ke hangē pē ʻa e moʻuí ko e fuʻu loto ʻataʻatā pelepela ko iá. Kapau he ʻikai ke tau tokanga, ‘e malava ke lōmekina kitautolu ʻe he angahalá, ngaahi tākiekina ʻa e māmaní, pe ngaahi fili ʻoku halá. ‘Oku hangē pē ʻa e ngaahi meʻá ni ko ha pelepela fakalaumālie ʻoku pikitai ki hotau laumālié pea ʻai ke tau ongo‘i mamahi moʻoni.
‘I heʻetau fili ke tafoki ki he Tamai Hēvaní mo Sīsū Kalaisí, ‘oku tau ʻiloʻi ʻokú Na ʻi ai mo mateuteu ke tokoniʻi kitautolu ke tau hao mei ha faʻahinga tūkunga faingataʻa pē. ‘Oku makatuʻunga ‘i he feilaulau fakalelei ʻa e Fakamo‘ui ko Sīsū Kalaisí ʻa e malava ke fakamolemole‘i kitautolu pea toe hoko ʻo ma‘á. Te ke ma‘u maʻu ai pē “‘a e fiefia ʻi he fili ko ia ke fakatomalá.”*