“‘I Pōto ʻAlekili ‘i Palāsila,” Ki Hono Fakamālohia ʻo e To‘u Tupú, Fēpueli 2021, 22–23.
Founga ʻEmau Moihuú
ʻI Pōto ʻAlekili, Palāsila
Laʻitā mei he Getty Images
Olá! Ko hoku hingoá ko Hilamani B. Pea ko Sūlia Felisi O au. ʻOkú ma omi mei Pōto ‘Alekili. Ko Pōto ‘Alekilí ko e kolomuʻa ia ‘o Lio Kalani to Sulá, ko ha siteiti ʻi he tafaʻaki fakatonga ʻo e fonua ko Palāsilá.
Hilamani B.
ʻOku ou nofo mo ʻeku ongomātuʻá, ko ʻeku kui-uá, mo hoku tuongaʻane lahí. ‘Oku ʻi ai hoku tokoua ʻe taha ʻoku lolotonga ngāue fakafaifekau ‘i Hungali. Ko ha kolo lahi ʻa Pōto ‘Alekili pea kuo tuʻo lahi haʻaku hē ai.
Ko ʻemau faʻahitaʻu momoko angamahení ʻi Mē ki ʻAokosi pea ko ʻemau faʻahitaʻu māfaná leva mei Nōvema ki Māʻasi. ‘Oku meimei ke milimita ʻe 1,397 e ʻuhá (ʻinisi ‘e 55) ʻi he ta‘u kotoa pē!
‘Oku ʻi ai mo ha ongo mēmipa ʻo e Siasí ‘i hoku ʻapiakó, ka ‘oku ʻikai ke mau faʻa felongoaki ʻi he taimi akó. ‘Oku ʻi ai haku ngaahi kaungāmeʻa kehe ‘i he akó, neongo ʻoku ‘ikai ke nau kau ki he siasí. Ko ha kakai lelei kinautolu.
ʻOku ou ʻā hake ‘i he 6:45 a.m. he ʻaho angamahení ʻo teuteu, pea lue ki he akó. ʻOku tuku e akó ʻi he 12:30 p.m., peá u lue fakavave leva ki ʻapi ʻo maʻu me‘atokoni hoʻatā. Hili e ma‘u meʻatokoni ho‘ataá ʻoku ou lau ‘eku folofolá, tā piano, pea ako e lea faka-Siapaní. ʻOku ou semineli mei he 6:30 ki he 7:30 p.m. peá u mohe leva ʻi he 10 p.m.
‘Oku ou saiʻia ʻi hono tā e ʻū himí ‘i he ʻaho Sāpaté. ʻOku ou maʻu maʻu pē ʻa e Laumālié ʻi hono tā ia he Sāpaté ʻo tatau ai pē.
Sūlia Felisi O.
Na‘e fāʻele‘i au ʻi Sao Paulo peá u hiki ki Pōto ‘Alekili ʻi hoku taʻu tolú. Naʻe ngāue fakafaifekau taimi kakato ʻeku tamaí ʻi Pōto ʻAlekili. ʻOku ou lolotonga nofo mo ʻeku faʻeé, tamaí, mo hoku tuongaʻane ʻoku kei taʻu taha.
‘Oku saiʻia ‘aupito e kakai ʻo Pōto ʻAlekilí ʻi he kai kakanoʻi manu ʻoku tunú ʻa ia ʻoku ui foki ko e churrasco. Ka ko e meʻakai ʻoku ou manako aí ko e estrogonofe (ko ha kakanoʻi pulu Palāsila ko e stroganoff) mo e pisa.
‘Oku ʻi ai hoku ongo kaungāmeʻa mei he Siasí ʻokú na kalasi kehe kinaua. ʻOku mau feinga ke mau hoko ko ha fa‘ifaʻitaki‘anga lelei ʻo Sīsū Kalaisi ki he taha kotoa ‘oku mau feohí.
ʻOku miniti pē ʻe 30 e mamaʻo ʻo e temipale ʻi Pōto ʻAlekilí mei hoku ʻapí. ʻOku ou saiʻia maʻu pē he ʻalu ki he temipalé mo tokoni ʻi he papitaisó. ‘Oku ou fiefia ke u lava ʻo tokoni ki he kakai ‘oku nau ʻi he tafa‘aki ʻe taha ‘o e veili.