“ʻOku ʻikai mahino kiate au ha konga lahi ʻo e folofolá. Te u lava fēfē ʻo ako lahi ange mei hono lau e folofolá?” Ki Hono Fakamālohia ‘o e Toʻu Tupú, Fēpueli 2021, 28–29.
Ngaahi Fehuʻi mo e Talí
“ʻOku ʻikai mahino kiate au ha konga lahi ʻo e folofolá. Te u lava fēfē ʻo ako lahi ange mei hono lau e folofolá?”
Kole mo Fekumi
“Kole ki ho‘o mātuʻá, kau takí mo e fāmilí. Te nau lava ʻo tokoni atu ke ke maʻu ha mahino. Kae tautautefito ki haʻo lotu ki he Tamai Hēvaní ʻo kole kiate Ia ke tokoniʻi koe. Pea ‘i hoʻo laukongá, fekumi ki he ngaahi makakoloa iiki te ke ongo‘i māfana ai ʻi lotó.
Loleiti O., 15, Kiupeki, Kānata
ʻAi Māmālie Pē
“Ko ha founga lelei ke ma‘u ai ha meʻa lahi mei ho‘o ako folofolá ko hono lau māmālie ha potufolofola. ‘E lava ke ke toe sio ki ha kiʻi futinouti pe fakakaukau ki he founga ʻoku fekauʻaki ai ‘a e folofola ko iá ki hoʻo mo‘uí.”
Sani S., 13, Niu Mekisikou, USA
Tohiʻi ʻa e Ngaahi Ueʻí
“ʻOku tokoni moʻoni kiate au ʻa e tomuʻa lotu pea ako e folofolá, mo hono hiki e ngaahi fakakaukau ‘oku haʻu ki hoku ʻatamaí, ke u lava ʻo fakatatau ia kiate au mo maʻu ha mahino ki he folofolá. ‘Oku ʻi ai haʻaku ki‘i tohinoa ʻoku ou hiki ai ʻeku ngaahi fakakaukaú ‘i heʻeku laukongá. ‘Oku tokoni ia ke mahino kiate au peá u sai‘ia ʻi he folofolá.”
Linisī C., 16, ʻOlikoni, USA
Ngaahi Vitiō ʻo e Tohi ʻa Molomoná
“Na‘á ku kamata sio he ngaahi vitiō ʻo e Tohi ‘a Molomoná, pea naʻá ku ongo‘i moʻoni ʻa e Laumālié. ‘Oku ou fakaʻaonga‘i e folofolá ki hono muimuiʻi ʻo e vitioó. Kapau ‘oku faingataʻa hono ako pe tui ki he ngaahi folofolá, ʻe tokoniʻi koe ʻe he ‘Eikí, neongo kapau ʻoku ʻikai te ke ʻiloʻi ia.”
ʻEiteni D., 11, Nepulasikā, USA
Ngaahi Maʻuʻanga Tokoni Haʻu, ʻo Muimui ʻIate Au
“Faka‘aongaʻi e tohi lēsoni Ha‘u, ʻo Muimui ‘Iate Au ! Na‘á ku faʻa faingata‘aʻia ʻi hono ʻai ke mahuʻinga mālie ʻeku ako folofolá, ka ‘i hono fakaʻaonga‘i e ngaahi maʻu‘anga tokoni ʻi he tohi lēsoní, ‘oku lava leva ke mahino kiate au ʻa e me‘a ʻoku ou laú. Talu mei he‘eku kamata fakaʻaonga‘i ʻa e Ha‘u, ʻo Muimui ‘Iate Aú ʻi he‘eku ako folofolá, kuo lava ke mahino lelei ange kiate au ʻa e folofolá pea mo ‘eku Tamai Hēvaní.”
Monika B., 18, ʻIutā, USA