“Ko e Ako ke ʻIloʻi ʻa e Laumālie Māʻoni‘oní,” Ki Hono Fakamālohia ʻo e To‘u Tupú, Fēpueli 2021, 6–7.
Haʻu, ʻo Muimui ʻIate Au
Ko e Ako ke ʻIloʻi ʻa e Laumālie Māʻoniʻoní
‘E fakahinohinoʻi mo tataki ʻe he Laumālie Māʻoniʻoní ʻetau mo‘uí ʻi he‘etau ako ke ʻilo‘i mo muimui ki Heʻene ngaahi ue‘í.
‘I heʻeku kei talavoú, ne ‘ikai ke u ʻiloʻi pe naʻe fēfē ʻete ongo‘i e Laumālie Mā‘oniʻoní. Na‘á ku taʻu 12 ‘i he taimi ne fakatangutu ai au ʻe heʻeku faʻeé ʻo fakahoko mai ʻa e fehu‘i mahuʻinga ko ʻení: naʻá ne pehē mai, “Ma‘ake, kuo fakahā atu nai ʻe he ‘Eikí ʻo fakafou ʻi he Laumālie Māʻoniʻoní ʻoku moʻoni ʻa e Siasí?”
Na‘e teʻeki foki ke u lea loi ki heʻeku faʻeé, pea ne u tali moʻoni mo ongoʻi halaia ange, “ʻIkai”?
Na‘á ne pehē mai leva, “ʻOku finangalo ‘a e Tamai Hēvaní ke ke ʻilo‘i ʻiate koe pē, ka ‘oku fie maʻu ke ke feinga mālohi. Kapau te ke lau ʻa e Tohi ‘a Molomoná mo lotu, te Ne tuku ke ke ʻilo‘i hono moʻoní ‘i he Laumālie Māʻoniʻoní.”
Na‘e ʻi ai pē ʻeku Tohi ʻa Molomona, ka kuo te‘eki ke u lau ia ʻiate au pē. Ne u loto moʻoni ke fakahoko fakamātoato ‘a e fakaafe ko ʻení, pea ne kamata leva ʻeku fononga fakalaumālié. Kimuʻa peá u mohe he pō kotoa pē, ne u lau ha vahe ‘e taha pe ofi ki ai ʻi he Tohi ‘a Molomoná. ʻI heʻeku tū‘ulutui ʻo lotú, na‘á ku kole ki he Tamai Hēvaní ke fakahā mai kiate au ʻilo na‘e moʻoni ia. ‘I heʻeku lotú, na‘e nofoʻia au ʻe ha ongoʻi nonga. Na‘á ku ongoʻi fiefia.
Ko ha ongo nai ʻeni mei he Laumālie Māʻoniʻoní? Naʻe ‘ikai ke u fuʻu fakapapauʻi. Naʻe fo‘ou kotoa ʻa e meʻá ni kiate au, pea naʻe ‘ikai ke u ʻiloʻi pe ʻoku fēfē hono ongoʻi e ngaahi ueʻi ‘a e Laumālie Māʻoni‘oní. Na‘á ku fifili pe ʻe haʻu ha ʻāngelo ʻo ʻa‘ahi mai kiate au pe mahalo ʻe hā mai ha maama lahi fakalangi ‘i hoku lokí. Ka neongo ia, ‘i ha loto fakamātoato ke maʻu ‘a e ʻilo ne tala‘ofa mai mei he Laumālie Māʻoniʻoní, ne hokohoko atu pē ʻeku laukongá mo e lotú ‘i he pō kotoa pē. Ko e taimi kotoa pē ne u lotu ai, na‘á ku ongoʻi nonga, peá u ongoʻi fiefia.
Ne u toki ʻilo kimui ange ta naʻe ‘osi fuoloa pē hono tali mai ʻe he ‘Eikí ʻeku lotú, ka ne u fekumi au ia ki ha fa‘ahinga tali kehe. Naʻe ʻikai ke u ʻiloʻi ʻoku lava pē ke tau “ongoʻi” ʻa e ngaahi ue‘i ʻa e Laumālie Mā‘oniʻoní.
Ako ke ʻIloʻi e Ngaahi Ueʻí
Ne ʻi ai ʻa e taimi ne faingataʻa ai kia ʻŌliva Kautele ke ne fakatokanga‘i e ngaahi ueʻi ʻa e Laumālié. ‘I he taimi naʻá ne ʻeke ai ki he pālofita ko Siosefa Sāmitá fekauʻaki mo iá, na‘á ne maʻu ‘a e tali ko ʻení mei he ‘Eikí: “ʻIkai naʻá ku lea ʻaki ʻa e fiemālié ki ho ‘atamaí ʻi he me‘á? Ko e hā mo ha toe fakamoʻoni lahi hake te ke lava ʻo maʻu ʻi ha fakamoʻoni mei he ʻOtuá?” (Tokāteline mo e Ngaahi Fuakava 6:23). Naʻá ne ‘osi maʻu ha tali, ka na‘e ʻikai ke ne ʻiloʻi ia. Ko e talí ko e fiemālie hono ʻatamaí—ʻo hangē ko e meʻa ne u ongoʻi ‘i heʻeku kei talavoú.
Ne toe fakahoko mai ʻe he ʻEikí kimui ange ha faleʻi kia ʻŌliva pea mo kitautolu hono kotoa: “Te u fakahā kiate koe ʻi ho ʻatamaí pea ʻi ho lotó, ʻi he Laumālie Māʻoniʻoní, ʻa ia ʻe hoko mai kiate koe pea ʻe nofo ʻi ho lotó. … Ko ʻeni ʻa e laumālie ʻo e fakahaá.” (Tokāteline mo e Ngaahi Fuakava 8:2–3).
‘Oku akoʻi mai ‘e he ʻAposetolo ko Paulá ke tau fakatokanga‘i ʻa e ngaahi ongo ko ‘eni ʻo e “‘ofá, mo e fiefiá, mo e melinó, mo e kātaki fuoloá, mo e angavaivaí, mo e angaleleí, mo e tuí, [mo e] angamaluú” (Kalētia 5:22–23).
ʻOku faʻa leʻo siʻi mo olopoto e ngaahi ueʻi ʻa e Laumālie Māʻoniʻoní. ‘E tātaaitaha ke kalanga ʻa e ‘Otuá ke feinga ke maʻu ‘etau tokangá. Ka ‘i heʻetau tuku taimi ke ki‘i mālōlō, ongoʻi, mo fakalaulaulotó, ‘oku tau fakahaaʻi ai kiate Ia ‘oku tau fakafanongo mo fie maʻu ha tali ‘o fakafou ʻi he Laumālie Mā‘oniʻoní. ʻI hoʻo tū‘ulutui hoko ʻo lotú, ʻoleva hoʻo tuʻu hake hili hoʻo “ʻēmení” kae kiʻi tatali ʻi ha ki‘i taimi. Tūʻulutui pē ʻo matuʻaki fakafanongo. Mahalo na ʻoku feinga atu e ʻEikí ke “lea fakafiemālie ki ho ‘atamaí” ʻo hangē ko ia naʻá Ne fakahoko kia ‘Ōliva Kautele mo aú.
Ko e Meʻafoaki Maʻongoʻonga ʻo e Laumālie Māʻoniʻoní
ʻOku tau maʻu e meʻafoaki ʻo e Laumālie Māʻoniʻoní hili e papitaisó. ‘Oku ʻomi ‘e he meʻafoaki fakalangi ko ‘ení ha tokoni mei ha mēmipa ʻo e Tolu‘i ʻOtuá ki he kotoa ʻetau moʻuí. ‘Oku talaʻofa mai ‘e hanga ʻe he Laumālie Māʻoniʻoní ʻi he‘etau feinga ke moʻui taau mo e meʻafoakí ni, ʻo “fakahā kiate kimoutolu ʻa e meʻa kotoa pē ‘oku totonu ke mou faí” (2 Nīfai 32:5). ʻOku fakapapauʻi mai ʻe he Laumālie Mā‘oniʻoní ʻa e moʻoní ki hotau lotó, maluʻi kitautolu mei he koví, mo tataki kitautolu ʻi hono kotoa ʻetau moʻuí. Ko ha tāpuaki fakaʻofoʻofa moʻoni ia!
‘Oku ou fakamālō ki he meʻafoaki kāfakafa ‘o e Laumālie Māʻoni‘oní mo ʻEne tataki ki heʻeku mo‘uí.