“Usa ka Makatingala nga Himan nga Pangbatok sa Kaluya,” Alang sa Kalig-on sa mga Kabatan-onan, Ago. 2021, 6–7.
Usa ka Makatingala nga Himan nga Pangbatok sa Kaluya
Ang kinabuhi ba nakapaluya kanimo? Aniay butang nga tingali makatabang.
Mga paghulagway ni Corey Egbert
Kon ang kinabuhi ingon og gubot, usa ka komon nga estratehiya ang paglihay aron makapangita og kasalipdan ug maghunahuna lamang sa nag-unang mga panginahanglan aron makasugakod. Ilabi na kon mobati kita og kaluya tungod sa kahingawa. Si Presidente Dieter F. Uchtdorf, nga kaniadto Ikaduhang Magtatambag sa Unang Kapangulohan, kausa naghisgot mahitungod niini gamit ang mga termino nga mga kahoy ug kusog nga pagtay-og [turbulence] sa eroplano. Diha sa duha ka mga ehemplo, kon lisod ang mga panahon, ang pinakamaayong solusyon mao ang paghinay-hinay. Ang mga kahoy hinay-hinay nga motubo nga walay maayong mga kahimtang. Mao nga mas gagmay ang pipila ka lingin nga maporma sa punoan sa kahoy nga timailhan sa pagtubo. Sa samang paagi, ang mga piloto sa eroplano mopahinay sa pagpalupad kon unuson ang hangin.
“Ang maalamon makasabot ug mogamit sa mga leksyon kabahin sa tulo ka mga lingin nga naporma sa punoan sa kahoy ug sa turbulence dala sa hangin,” mitudlo si Presidente Uchtdorf. “Batukan nila ang tintasyon aron makalahutay sa labihan nga kadinalian sa inadlaw-adlaw nga kinabuhi.”1
Ang paghimo og lakang aron mominos ang dinali-dali nga lakang dako kaayo og bili. Aniay butang nga makatabang kaayo, bisan og hanap man kini dapit sa sinugdanan:
Ang paghimo og mga tumong makatabang kanimo sa pagpakalma sa mga butang.
Ang mga Maayo ug ang mga Dili Maayo sa mga Tumong
Ang pipila ka mga tawo ganahan nga magtakda og mga tumong. May dagko silang mga pangandoy ug may daghang pangdasig aron molampos. Apan ang uban nakakita nga ang pagtakda og tumong makasapot ug makaluya, ilabi na kon dili maayo ang dagan sa kinabuhi. Sa pagkonsiderar sa tambag ni Presidente Uchtdorf, ang pagpaningkamot sa paghimo og mga tumong tingali mabatyagan nga sama og usa ka dugang nga butang nga dili nimo madumala. “Pasensya na lang! Panahon na sa paghinay-hinay, ug nagpasabot kana nga walay bag-ong mga tumong!”
Hinoon, ania ang maka-intriga nga bahin. Kon ang mga butang dili matag-an ug pig-ot, mao gayod kanang higayona nga ang pagtakda og mga tumong makatabang kaayo kanimo—ug dili lamang aron “molampos sa imong buhaton.” Ang mao gayod nga proseso nga pagtakda og tumong ug pagpadayon sa mga tumong makatabang kanimo aron maminosan ang imong kahingawa ug madugangan ang pagkamalinawon. Human niana, adunay pipila ka mga sugyot nga angay hinumduman.
Hinay-hinay nga Pagpaminos sa Kasamok
Usa ka estratehiya nga angayng hinumduman mao ang paglikay sa pagbuhat og labihan kadaghan sa usa ka higayon. Si Presidente Henry B. Eyring sa Unang Kapangulohan mitudlo nga: “Kadaghanan kanato may pipila ka kasinatian mahitungod sa mga paningkamot sa kaugalingong paglambo. Ang akong kasinatian mitudlo kanako niini mahitungod kon giunsa sa mga tawo ug sa mga organisasyon sa paglambo: ang labing maayong dapit nga tan-awon mao ang gagmay nga mga kausaban nga atong mahimo sa mga butang nga kanunay natong gihimo. Adunay gahom sa pagkamakanunayon ug sa pagsubli.”2
Ang mga tumong nga nanobra kadako o modangat og dugayng panahon sa pagtuman sa kasagaran daw lisod nga lihukon dinhi ug karon. Hinoon, adunay hingpit nga balanse diha sa mga iskedyul sa mga tumong, ug eksakto ang gibanabanga nga 7 ngadto sa 10 ka adlaw.
Ang pagbahin-bahin sa imong dagko nga mga tumong ngadto sa sinemana nga buluhaton adunay dakong epekto. Usa niana, makawagtang kini sa kalisang sa nanobra ka dagkong paglaom nga atong gisab-ay sa atong kaugalingon. Ug dayon masagmuyo nga maoy kasagaran natong bation kon kita mapakyas. Ang mas mugbo nga mga iskedyul makapaminos niana nga mga pagbati.
Ang usa ka semana igo na ang kamubo aron imong makita nga hapit na gyod mahuman ang usa ka lisod nga butang. Imong mahibaloan unsay angay nimong buhaton dinhi ug karon. Ug dili lang nimo mahibaloan, nakahuman ka og usa ka tipak sa dako nga tumong. Ug dayon sa lain na pod nga tipak. Kon makasugod ka na sa pag-uswag, ang pipila ka malampusong mga semana magbalik-balik ug mas sayon ang pagpadayon. Ug diha magsugod sa pagkahitabo ang usa ka maayo kaayo nga butang.
Mas Dakong Kalinaw, Mas Gagmayng Hungit
Isipon nato nga ikaw dunay dakong tumong sa imong umaabot sama sa pag-eskwela sa kolehiyo o unibersidad. Alang sa uban kanato, ang daghang lakang nga gikinahanglan niini daw malisod.
Apan ikaw nagkinahanglan lamang nga mohimo og usa ka hungit sa matag higayon. Alang niini nga tumong, tingali nagpasabot kana sa pagsugod nga mopili og pinakaminos duha ka eskwelahan nga imong ganahan.
Pagkasunod nga semana, ang tanan nimong buhaton mao ang pagtino niana nga mga eskwelahan. Dayon, sa ikaduhang semana, tingali mohukom ka nga susihon ang mga iskedyul sa pag-apply sa kolehiyo alang niana nga mga eskwelahan. Atol sa ikatulong semana tingali makigsulti ka sa counselor sa akademik o magsugod og himo sa mga essay sa aplikasyon sa kolehiyo o ubang sinulat nga mga rekisito.
Kini nga pamaagi mas dali himoon. Ang mga butang sa kalit ingon og dali rang buhaton. Ang kaniadto makalisang nga tumong karon dili na kaayo. Gani, posible nga mobati ikaw og kadasig!
Kini nga proseso mahimong gamiton sa bisan unsang dagko nga mga tumong, bisan kon kini espiritwal, sosyal, pisikal, o intelektwal.
Mga Kabataan ug Kabatan-onan ug Ikaw
Ang pinakamaayong bahin sa pagtakda og tumong mao nga ikaw aduna nay maanindot kaayong kapanguhaan diha sa imong luyo nga bulsa. Samtang mogamit ka sa Mga Kabataan ug Kabatan-onan sa pagkat-on ug paglambo sama sa gibuhat sa Manluluwas, hinumdumi nga ang bisan unsang dagko nga tumong nga imong gihimo—sama sa pagserbisyo og misyon, pagdagan sa usa ka marathon, pweding bahin-bahinon ngadto sa ginagmay, usa ka semanang gidugayon nga mga lakang.
Ang makanunayon ug madumala nga paglambo sa balanse nga mga aspeto sa imong kinabuhi mosangpot sa mas dako nga kalinaw, dili sa mas dako nga kaluya ug pagdali-dali. Maghinay-hinay lang ka inubanan sa imong naglambo nga focus ug dayon maglingaw-lingaw og gamay sa kinabuhi—usa ka semana sa matag higayon.