“Ang Gahom sa Pagkadiosnon pinaagi sa mga Ordinansa ug mga Panalangin sa Pagkapari,” Alang sa Kalig-on sa mga Kabatan-onan, Ago. 2021, 10–13.
Ang Gahom sa Pagkadiosnon pinaagi sa mga Ordinansa ug mga Panalangin sa Pagkapari
Ania ang upat ka mga ordinansa ug mga panalangin sa pagkapari nga nagdapit sa gahom sa Dios sa inyong kinabuhi.
Sa akong mga pagbiyahe isip sakop sa Korum sa Napulog Duha ka mga Apostoles, nakahimamat ako og mga batan-on sa tibuok kalibutan. Daghan kanila nakigbisog sa tinuoray nga mga kabalaka: Ang Dios motabang ba kanako? Mogiya ba Siya sa akong kinabuhi? Unsaon nako sa pagkadawat sa tabang, direksyon, ug kalinaw nga akong gikinahanglan?”
Minahal ko nga batan-ong mga higala, ang Dios motabang kaninyo, ug Siya anaa andam sa pagpanalangin kaninyo. Isip atong mahigugmaon nga Amahan, Siya mihatag kanato og mga ordinansa nga makatabang kanato aron mobati sa Iyang gahom diha sa atong kinabuhi—ang gahom sa pagkadiosnon.
Hunahunaa kini nga kasulatan: “Diha sa mga ordinansa … , ang gahom sa pagkadiosnon gipakita” (Doktrina ug mga Pakigsaad 84:20).
Ania ang upat ka ordinansa ug mga panalangin nga nagdapit niana nga gahom diha sa imong kinabuhi.
1. Gahom sa Sakramento
Una, kita mobati sa gahom sa pagkadiosnon pinaagi sa sakramento. Kon atong hangupon ang sakramento isip usa ka mahinungdanong bahin sa atong semana, mobag-o kini kanato ug makatabang sa atong pagpangandam alang sa nagsunod nga unom ka adlaw.
Ang sakramento nagsuporta sa atong mga paningkamot sa padayon nga paghinulsol. Samtang magpuyo kita nga matarong, ug maningkamot sa paghinumdom kanunay sa Manluluwas, atong masinati ang padayon nga paglambo sa pagtuo diha sa Ginoo nga si Jesukristo. Makakaplag kita og kalig-on, pinaagi Kaniya, sa pag-usab sa atong kinabuhi ngadto sa mas maayo.
Kon moambit kita sa sakramento ug maningkamot nga mas mahisama sa Manluluwas, ang maayong mga kinaiya nga anaa sa sulod kanato mosugod sa pagtubo. Dayon magsugod og kadako ang atong gugma sa katawhan ug mominos ang atong pagpanghukom kanila. Dili na kita dali nga masuko, ug magpanuko kita sa pagtaak ngadto sa tintasyon.
Pinaagi sa paghinumdom ug pagtuman sa atong mga pakigsaad sa Ginoo, kon buhaton nato kini samtang moambit kita sa sakramento, Siya misaad kanato nga ang Iyang Espiritu kanunay nga magauban kanato (tan-awa sa Doktrina ug mga Pakigsaad 20:77, 79)—dili lang magauban kanato niana nga adlaw, apan sa kanunay.
2. Gahom diha sa Templo
Ikaduha, makadawat kita og giya ug gahom gikan sa Dios pinaagi sa pagtambong sa templo. Adunay gahom diha sa templo, bisan og wala ka pa makadawat og pagtuga. Kini mao gayod ang balay sa Ginoo.
Ang pinakamaayong paagi sa pag-adto sa templo mao ang pagpangandam daan. Hangyoa ang Langitnong Amahan sa pagtabang kanimo nga malig-on ang imong pagtuo diha Kaniya ug sa Iyang Anak. Hangyoa Siya sa pagtabang kanimo nga mahibalo nga Siya anaa.
Dili nimo mahimong ipugos ang espirituhanon nga mga pagbati o mga kasinatian. Sa kasagaran, moabot kini nga wala dahuma. Usa sa pinakanunay nga mga impresyon nga akong nadawat sulod sa templo mao.ang, “Humilum kamo ug ilhon ninyo nga ako mao ang Dios.” (Salmo 46: 10; tan-awa usab sa Doktrina ug mga Pakigsaad 101: 16).
Ang gahom sa pagkadiosnon diha sa templo molambo kon ikaw magpahigayon og mga ordinansa alang sa mga tawo kansang mga ngalan imong nakita pinaagi sa buhat sa family history. Ako sa daghang higayon mibati sa gahom ug presensya niadtong kinsa akong gitabangan sulod sa templo.
Samtang motampo ka niining sagrado nga buhat, ang imong kahibalo ug pagtuo sa Manluluwas motubo. Makadawat ka og mas sigurado nga pagsaksi nga ang kinabuhi padayon bisan lapas sa tabil.
Dili tanan nga nagpuyo duol sa templo makatambong kanunay. Ang Ginoo mopasidungog sa imong gugma alang sa templo bisan og anaa ka sa layo. Pagbutang og litrato sa templo diha sa inyong panimalay, ug sa mainampingong paagi siksika kadtong kinsa nagkinahanglan sa mga ordinansa.
3. Gahom nga anaa sa Imong Patriyarkal nga Panalangin
Ang ikatulo nga butang nga magdapit sa gahom sa Dios diha sa imong kinabuhi mao ang imong patriyarkal nga panalangin. Ang tanan nga batan-on kinahanglan maghunahuna mahitungod sa pagdawat og patriyarkal nga panalangin. Usa kini ka puno sa gahom nga mapa sa imong kinabuhi.
Ang patriyarkal nga panalangin dili mohisgot sa matag aspeto sa atong kinabuhi. Apan kini mopasabot og maayo sa lainlaing mga pasidaan, mga panalangin, ug mga saad alang sa matag tawo ug mohatag og importante nga giya gikan sa Langitnong Amahan.
Ang gahom moabot usab pinaagi sa pagpangandam. Usa sa akong apo nga lalaki bag-ohay lang mipaambit ngari nako nga nangandam siya alang sa iyang patriyarkal nga panalangin. Dili kini usa ka butang nga gipugos sa iyang ginikanan diha kaniya—iya kadtong kaugalingon nga kabubut-on. Iyang tinguha ang giya nga ikatanyag niini. Nakadayeg ako sa iyang espirituhanong pagpangandam.
Importante usab ang pagkaadunay eksaktong espirituhanong panghunahuna sa pagdawat sa imong patriyarkal nga panalangin. Tinguhaa ang pagdawat sa imong panalangin kon ikaw malinawon. Ang patriyarkal nga panalangin mahinungdanon kaayo nga gasa ug magdala sa gahom sa pagkadiosnon diha sa imong kinabuhi.
4. Gahom diha sa mga Panalangin sa Pagkapari
Sa katapusan, gusto kong mopahinumdom kanatong tanan bahin sa gahom nga modagayday sa atong kinabuhi pinaagi sa mga panalangin sa pagkapari gikan sa takos nga mga tighupot sa pagkapari.
Nahibalo ako nga usahay tingali magpanuko ka sa pagpangayo og panalangin sa imong amahan, ug usahay ang mga amahan tingali magpanuko sa paghatag og panalangin. Tingali mibati sila nga dili andam, apan ang Ginoo mopanalangin kanila sa ilang mga paningkamot.
Ako moawhag kanimo, kon ikaw dunay amahan kinsa takos nga naghupot sa pagkapari, duola siya sa pribado, ug ingna, “Pa, gusto ko og panalangin. Kon gusto ka nga magpaabot pa ko og usa ka semana o usa ka bulan aron maandam ang imong hunahuna ug espiritu, makahulat ra ko. Apan mahimo bang planohon nato kini?”
Kon ang imong amahan dili makahimo sa paghatag kanimo og panalangin sa pagkapari, pakigsulti sa imong mga ginikanan mahitungod sa paghangyo og laing tawo sa inyong ward kinsa imong gihigugma ug gitahod. Makakaplag ka og kalig-on ug kahupayan gikan sa atong Langitnong Amahan pinaagi sa inadlaw-adlaw nga milagro sa mga panalangin sa pagkapari.
Nag-ayo, ni J.Kirk Richards
Ikaw Mobati sa Gahom sa Dios sa Imong Kinabuhi
Akong batan-ong mga higala, niining upat ka mga ordinansa sa pagkapari ang gahom sa pagkadiosnon moabot sa imong kinabuhi. Imong mahibaloan, sama kanako, nga si Jesus mao ang Kristo, ang Anak sa Dios, ug nga ang tanan nga maayong mga butang nagagikan Kaniya. Mopamatuod ako nga kita makagamit niana nga gahom pinaagi sa matarong nga pag-apil diha sa Iyang mga ordinansa sa pagkapari.