“Mga Kasulatan alang sa Espirituhanong mga Emerhensiya,” Alang sa Kalig-on sa mga Kabatan-onan, Ago. 2021, 25.
Mga Kasulatan alang sa Espirituhanong mga Emerhensiya
Paghulagway ni Katy Dockrill
Sa nagdako ako, kanunay ko nga gusto og usa ka pagpamatuod sa Basahon ni Mormon. Apan naglisod ako sa pagtuo nga ang mga tawo, mga hitabo, ug ang mga milagro nga gihulagway niini tinuod. Sulod sa taas nga panahon nag-ampo ako sa Langitnong Amahan sa pagtabang kanako aron mahibalo sa akong kaugalingon nga ang Basahon ni Mormon tinuod.
Usa ka Dominggo, duha sa akong mga higala mitudlo kanako og leksyon mahitungod sa mga kasulatan ug kon sa unsang paagi nga kini makatabang sa pagtubag sa among nagdilaab nga mga pangutana. Mitunol sila sa matag usa kanamo og usa ka papel nga gisulatan og “Mga Numero nga Kontakon alang sa Emerhensiya.” Aduna kini baynte-singko ka managlahing mga sitwasyon, ug sa matag tapad niini nga sitwasyon mao ang usa ka kasulatan. Usa sa mga linya ang nakakuha sa akong pagtagad:
“Alang sa usa ka pagpamatuod bahin sa Basahon ni Mormon, tan-awa sa Moroni 10:3–5.”
Akong gipakli ang maong kasulatan. Nagsulti kini kanimo nga ikaw makahibalo nga tinuod ang Basahon ni Mormon pinaagi sa gahom sa Espiritu Santo kon ikaw mobasa niini ug mag-ampo mahitungod niini ug nga “pinaagi sa gahom sa Espiritu Santo kamo mahimo nga masayod sa kamatuoran sa tanan nga mga butang.”
Usa ka puno sa gahom, yano nga tubag ang miigo kanako. Wala pa gayod ako makabasa sa Basahon ni Mormon sa akong kaugalingon! Mao kadto ang hinungdan nga wala akoy pagpamatuod bahin niini.
Pag-abot gayod nako sa balay, milingkod ko ug misugod sa pagbasa sa akong kopya sa Basahon ni Mormon. Samtang nagbasa ako mahitungod sa mga tawo gikan sa karaang kapanahonan, akong nabatyagan nga ang akong pagpamatuod mitubo nga kini tinuod ug nga ang mga milagro nahitabo gayod kanila.
Mga bulan ang milabay, dihang akong nahuman ang Basahon ni Mormon, mibati ako nga puno kaayo sa Espiritu. Nahibalo ako nga ang Langitnong Amahan mipadala kanako niadtong “Mga Numero nga Kontakon alang sa Emerhensiya” sa pagtabang kanako kon ako nagkinahanglan og tubag. Siya akong gipasalamatan matag adlaw tungod sa akong mas dako nga pagpamatuod, ug nahibalo ako nga ang distansya gikan Kaniya usa ra ka pag-ampo ug usa ka kasulatan.
Ang tagsulat nagpuyo sa Utah, USA.