“Taas nga Paglupad Samtang Nanukad sa Ebanghelyo,” Alang sa Kalig-on sa mga Kabatan-onan, Ago. 2021, 16–19.
Taas nga Paglupad Samtang Nanukad sa Ebanghelyo
Samtang nakiglumba siya sa kinabuhi, si Sophia wala gayod makalimot unsa ang pinakaimportante.
Gilitratohan ni Mad Moose Media @MadMooseMedia
Daghan sa mga sports maglakip og usa ka butang nga maglupad sa kahanginan padulong sa usa ka goal [puntosanan]. Golf, American football, football [soccer], baseball, badminton ug cricket ang pipila lamang niini.
Ug dayon adunay lahi nga matang sa sport diin ikaw ang butang nga molupad sa kahanginan. Dili kini alang sa mahadlukon. Apan usab, walay tawo nga motawag kang Sophia P., 18, sa Utah, USA, nga mahadlukon.
Usa siya ka taas og lupad, mapaambiton sa pagpamatuod kinsa mibati nga kampante kaayo sa bisan unsang butang nga may duha ka ligid. Ug samtang malingaw siya nga moapil sa iyang team sa hayskul sa mountain bike, mas malingaw siya sa iyang tinuod nga duhay ligid nga hilig nga tubilan og high-octane.
Gilitratohan ni Erin Malcom, Elevated MX @ErinMalcom
“Ang motocross mao ang sport sa mga panglumba nga motor agi sa lisod nga mga libaong diin yuta ang tanang agianan,” mipasabot si Sophia. “Maglumba kami latas sa tanang lain-lain nga matang sa pagpalupad, mga bungtod, ug uban pa. Gani himoan nila og lagwom nga kanal ang uban nga bahin subay sa dalan aron sa paghatag kanamo og mas dako nga hagit.”
Ang panglumba nga mga motor (motorsiklo nga panglumba sa dili sementadong dalan) kusgan kaayo nga motor. Mokatkat kini sa tag-as kaayong bungtod ug modala kanimo nga maglupad sa kahanginan sa lagyo kaayong mga distansya. Ug sa motocross, gikalipay kaayo nila kining tanan.
Gilitratohan ni Mad Moose Media @MadMooseMedia
Samtang nahimo siyang hanas sa sport nga motocross, si Sophia mihimo og pipila ka impluwensyal nga mga pagkonektar sa ebanghelyo. Usa sa mga dagko niini mao ang kaimportante sa pagpadayag. “Kon ang Espiritu Santo makasulti man kanako kon magdulong na ko sa mga libaong sa gikusgon nga 80 km/hr, sigurado nga Siya makasulti gayod kanako kon maglakaw ako sa agianan padulong sa eskwelahan,” miingon siya.
Kaabtik sa Pagdawat og Pagpadayag
Si Sophia adunay pipila ka lahi nga mga panglantaw bahin sa kaimportante sa pagpaminaw sa mga paghunghong sa Espiritu Santo. Alang kaniya, ang pagpabiling angayan sa pagpadayag naghimo kaniyang luwas sa espiritwal ug sa pisikal nga paagi. “Ako 100% nga mituo sa gahom sa pag-ampo. Mag-ampo ako sa matag higayon nga magpraktis ko,” miingon siya. “Mobati ako og ginagmay kaayong mga pag-aghat gikan sa Espiritu Santo sa matag higayon nga naa ko didto.”
Isip usa ka ehemplo, si Sophia nakahinumdom sa usa ka higayon dihang padulong siyang magpalupad sa kusog kaayo nga dagan. Gibati niya ang klaro nga impresyon nga nagkinahanglan nga iposisyon niya og tarong ang iyang kaugalingon. “Sa motocross, kinahanglan nga ipiit namo ang among mga tuhod diha sa motor. Kinahanglan nga padayon namong ipaubos ang nakapading namong mga tiil nga ang among ulo mogataw ra og gamay sa manubela.”
Ang pagpadagan nga nakatul-id ang lawas, sa laing bahin, usa ka hinungdan sa disgrasya.
Dihang nadawat niya ang pag-aghat, wala siya magpanuko. Gi-adjust niya ang posisyon sa iyang lawas. Diha-diha dayon sa pagkahuman, miabot ang lisod kaayo nga pagtugpa gikan sa paglupad. Sigurado nga mahagsa gyod unta siya. Apan, tungod kay namati siya sa inspirasyon ug gitarong ang iyang posisyon, iyang nasugakod ang pag-untol. “Imbis mahagsa, miuntol ako kauban sa motor.”
Gilitratohan ni Mad Moose Media @MadMooseMedia
Si Sophia nakakat-on sa dili gayod pagbaliwala sa mga pag-aghat. Usa ka dapit diin siya nakadawat og daghang pag-aghat mao ang mahitungod sa misyonaryo nga buhat.
Misyonaryo nga Nag-motocross
“Ako motandi sa gidaghanon sa akong mga oportunidad sa pagpakig-istorya sa mga tawo nga sama sa usa ka misyonaryo,” miingon si Sophia.
Samtang nagtambong siya og managlahing mga sangka sa motocross, si Sophia mohimamat ug makig-chat og mga batan-on gikan sa tanang matang sa kinabuhi. Ug pinaagi sa pagsunod sa ebanghelyo, makita nga lahi ra siya sa kadaghanan. Ang ubang mga tiglumba nakamatikod niini.
Gilitratohan ni Malea Ellett @MaleaEllett
“Mangutana sila og sama sa, ‘Nganong dili ka mamalikas?’ o ‘Nganong dili ka moapil og lumba ma-Dominggo?’” miingon si Sophia. “Usahay kini nga mga pangutana mosangpot ngadto sa panaghisgot sa ebanghelyo. Ako adunay lig-on nga pagpamatuod ug gusto nga ang uban makasinati sa kalipay nga ania kanako.”
Sa tibuok niini nga panaghisgot, gibati niya ang giya sa Espiritu Santo nga nagtabang kaniya nga masayod unsay isulti. Nasayod usab siya kon unsa kaimportante ang pagpakabuhing takos nga makadawat og pagpadayag sa klaro nga paagi.
“Ikaw nagdapit sa Espiritu Santo pinaagi sa pagsunod sa mga sugo,” miingon si Sophia. “Ug importante ang pagsunod niana nga mga pag-aghat! Kon ikaw kanunay nga nagsunod niini, kanunay usab nga mohatag ang Espiritu Santo niini.”
Si Sophia ug ang ubang mga tiglumba maghisgot mahitungod sa pagsimba, sa balaod sa kaputli, sa mga templo, ug daghan pa bahin sa mga hilisgutan sa ebanghelyo. Ang usa ka bahin sa rason nganong daghan siya og mga panaghisgot sa ebanghelyo kay makigsulti man siya sa daghang mga tawo, ilabi na atol sa mga lumba. “Si Jesus miingon nga higugmaon ang tanan,” matod niya, “mao nga makig-istorya ako sa tanan.”
Lumba ug Pagkamatarung
Siyempre, tungod kay siya maayo kanimo diha sa gawas sa lumbaanan wala magpasabot nga sayon ra siya para nimo kon magsugod na ang lumba! Miangkon si Sophia nga makigsangka gyod siya. Sama pananglit, kon makiglumba siya sa iyang papa (kinsa usa usab ka hilig kaayo sa panglumba nga motor), aduna siyay usa ka piho nga gilauman sa hunahuna. “Akong tumong nga malumbaan siya, ug ang iyang tumong mao nga dili nako siya malumbaan!”
Gilitratohan ni Erin Malcom, Elevated MX @ErinMalcom
Apan kon mahitungod man sa pagdaog ug pagkapildi, adunay direktang mga prayoridad si Sophia. “Ang ebanghelyo naghatag gayod kanako og direksyon,” mipasabot siya. “Bisan kon mapildi man ako sa lumba sa motocross, makadaog gihapon ako sa lumba sa kinabuhi. Sa kinabuhi, wala ikaw makiglumba batok kang bisan kinsa apan sa imong kaugalingon lamang.”