“Sa unsang paagi nga ang ebanghelyo makatabang kanako sa gisinati nga depresyon?” Alang sa Kalig-on sa mga Kabatan-onan, Ago 2021, 30–31.
Mga Pangutana ug Mga Tubag
“Sa unsang paagi nga ang ebanghelyo makatabang kanako sa gisinati nga depresyon?”
Ayaw og Hunong
“Kon ikaw adunay gamay nga depresyon, paningkamoti ang pagpangita og mga paagi sa pagserbisyo sa uban. Mahimo usab nimong sulayan ang pagbasa sa mga kasulatan, pag-ampo, ug paglihok sa imong mga tumong alang sa bag-ong programa sa kabatan-onan. Kon grabe na ang sitwasyon, pwede kang mangita og propesyonal nga tabang. Labaw sa tanan, ayaw gayod kalimot nga ang Langitnong Amahan nahigugma kanimo. Kon ikaw mag-ampo Kaniya alang sa tabang, makadawat ka og tubag.”
Ryan B., 11, Arizona, USA
Wala Ka Mag-inusara
“Kitang tanan makakaplag og paglaom pinaagi sa Langitnong Amahan, kang Jesukristo, ug sa ubang mga tawo. Ang Dios nagtudlo kanato sa pagbaton og pagtuo kon kita mag-ampo ug mangutana mahitungod sa atong mga problema. Ang mga kasulatan makatabang kanato nga mas makasabot mahitungod kang Jesukristo ug kon giunsa Niya pagbuntog ang daghan kaayong mga pagsulay. Importante usab ang pagpakigsulti sa usa ka tawo, sama sa usa ka ginikanan o kasaligan nga higala, kinsa makatabang nga atong makita nga kita wala mag-inusara.”
Christian V., 18, Chihuahua, Mexico
Siya Mohupay Kanimo
“Kon ako mobati og kaguol, akong hinumduman nga anaa kanako si Jesukristo, kinsa mibati sa tanan nga akong gibati. Diha sa Alma 7:11, mabasa nga: “Ug siya magpadayon, mag-antos sa mga sakit ug mga kasakit ug mga pagtintal sa matag matang.” Siya nasayod sa tukma gayod kon unsaon sa pagtabang kanimo kay Siya mibati sa sama nga butang. Kon ikaw modangop kang Jesukristo, Siya mohupay kanimo.”
Makayla F., 17, California, USA
Pagmapailubon sa Imong Kaugalingon
“Pagmapailubon ug pagmabination sa imong kaugalingon. Paghimo og yanong mga tumong nga tumanon sa matag adlaw, sama sa pag-ampo, pagpamalandong, ug paghimo og butang nga imong ikalipay. Dayon magpadayon hangtod sa pagtapos sa matag adlaw. Ang Langitnong Amahan nasayod sa imong sitwasyon ug naghulat kanimo sa Iyang gingharian. Pagpabilin nga lig-on sa imong pagtuo, ug ang palas-anon mogaan. Tinuod kini. Nasayod ako niini.”
Isabelle F., 21, Rio de Janeiro, Brazil
Hunahunaa ang mga Panalangin
“Sa matag higayon nga ako mobati og kasubo o kaguol, ganahan kong mamalandong sa adlaw o sa semana ug mohunahuna sa mga butang nga gipanalangin kanako sa Dios. Kon buhaton nako kana, mobati ako og dakong kalinaw ug kalipay tungod kay nagtabang kini kanako nga masayod nga ang Langitnong Amahan nagpakabana kanako.”
Taylee L., 16, Utah, USA
Wala Dahumang mga Gutlo
“Ang 2020 usa ka lisod nga tuig alang sa tanan—ang pagkahilayo [isolated] sulod sa taas kaayong panahon makamugna og mga pagbati nga depresyon. Apan nahibalo ako nga kon maglantaw kita sa presensya sa Ginoo samtang mag-ampo kita ug magtuon sa mga kasulatan, Siya maanaa alang kanato. Tingali dili sa mga gutlo nga maoy atong gilaoman, apan Siya maanaa alang kanato sa Iyang panahon, nga mao ang tukma nga panahon. Niadtong wala dahuma nga mga gutlo, atong maamgohan nga ang presensya ug gugma sa Dios nagauban kanato.”
Martin N., 18, Chihuahua, Mexico
Hinumdumi ang Makapadasig nga mga Pulong
“Usahay mobati kita nga kita walay tumong. Padayon lang sa pagtuo sa ebanghelyo. Bisan og mobati man kita nga kita dili makahimo sa pag-ampo, mahimo gihapon kitang moluhod bisan sa pipila ka minutos. Makapaminaw kita sa mga kasulatan o sa mensahe gikan sa Simbahan. Maghinumdom kita sa mga pulong sa usa ka himno o magmemorya og hugpong sa mga pulong nga makapahinumdom kanato sa kaisog nga atong gibatonan. Akong namemorya ang mga pulong ni Elder Jeffrey R. Holland sa Korum sa Napulog Duha ka mga Apostoles nga naghatag kanako og paglaum: ‘Ang talagsaong butang kalabut sa ebanghelyo mao nga kita magantihan sa pagpaningkamot, bisan kon kita dili kanunayng magmalampuson’ (Abr. 2016 nga kinatibuk-ang komperensya [Liahona, Mayo 2016, 125–26). ”
Giani V., 22, Córdoba, Argentina
Hinumdomi ang Iyang Gugma
“Ang ebanghelyo ni Jesukristo usa ka ebanghelyo sa gugma. Si Jesukristo mibuntog sa kalibutan tungod kay Siya nahigugma kanato. Tungod niana nga sakripisyo, nahibalo ako nga Siya nakasabot sa tanan nga akong naagian. Sa Mateo 11:28, ang Manluluwas midapit kanato: ‘Umari kanako, kamong tanan nga nabudlay ug nabug-atan, ug papahulayon ko kamo.’ Ang iyang gugma mao ang atong kinahanglan gayod nga hinumduman sa mga panahon sa tumang kaguol.”
Lyvia S., 17, Paraná, Brazil