Dali, Sunod Kanako

Usa ka Pulong nga Kinahanglang Mogiya Kanunay sa Atong Kinabuhi

Doktrina ug mga Pakigsaad 89

Ni Eric B. Murdock; gihulagway ni Spencer Hale

1833

Atol sa miting kauban si Propeta Joseph Smith, daghang lalaki ang nanabako gamit ang kuwako ug nag-usap-usap og tabako.

Ang asawa ni Joseph, nga si Emma, nakigsulti kaniya mahitungod sa kahugaw tungod sa aso ug sa nahabilin nga opos sa tabako. Kini nga mga butang ingon og nakawagtang sa Espiritu. Naghunahuna si Joseph kon unsa kahay hunahuna sa Dios mahitungod niini.

Nag-ampo si Joseph mahitungod sa gisulti ni Emma, ug nakadawat siya og pagpadayag mahitungod kon unsaon nato sa pagpuyo og himsog nga kinabuhi. Naghulagway usab kini sa dagkong mga panalangin sa pagbuhat niini.

Ang Ginoo mipadayag nga kita kinahanglan nga:

Mokaon og mga prutas ug mga hilba [dahon], lakip na sa mga utanon (tan-awa sa Doktrina ug mga Pakigsaad 89:10–11).

Mokaon og karne sa dinaginot nga paagi (tan-awa sa Doktrina ug mga Pakigsaad 89:12–13).

Mokaon og mga lugas (tan-awa sa Doktrina ug mga Pakigsaad 89:14–17).

Ang Ginoo mipadayag usab nga kita kinahanglang maglikay sa:

Ilimnong makahubog, tabako, tsa ug kape (tan-awa sa Doktrina ug mga Pakigsaad 89:5–9).

Dihang gipaambit ni Joseph kini nga pagpadayag, nga gitawag og “Pulong sa Kaalam,” ang pipila sa mga kalalakin-an misalibay sa ilang mga kuwako ug tabako ngadto sa kalayo.

Ang mga propeta mitudlo sa kaimportante sa pagsunod sa Pulong sa Kaalam ug uban pang himsog nga mga buhat sama sa: Sustansyado nga pagkaon, regular nga pag-ehersisyo, husto nga paglimpyo sa lawas, ug pagkatulog og sakto. Ang pagsunod sa Pulong sa Kaalam makatabang kanato sa pagkahimong sensitibo sa giya ug sa mga impresyon gikan sa Espiritu.

Ikaw makakat-on og dugang pa mahitungod sa Pulong sa Kaalam ug sa mga saad sa Ginoo kanato diha sa Doktrina ug mga Pakigsaad 89.