“Pagtinguha sa Zion ug sa mga Panalangin sa Ginoo,” Alang sa Kalig-on sa mga Kabatan-onan, Sept. 2021, 2–5.
Dali, Sunod Kanako
Pagtinguha sa Zion ug sa mga Panalangin sa Ginoo
Doktrina ug mga Pakigsaad 97:21
Ang pagtukod sa Zion usa ka dako nga responsibilidad, apan nagdala usab kini og talagsaon nga mga ganti.
Ang unang dako nga kamatuoran sa langit mao nga ang Dios nahigugma kanato sa tibuok Niyang kasingkasing, gahom, hunahuna, ug kusog. Gusto Niya ang labing maayo alang kanato—gusto gayod Niya kanunay, ug kanunay Niya nga gustohon. Gusto niya nga kita magmalipayon; dili malipayon sa temporaryo o taphaw nga paagi apan malipayon sa lawom ug mahangtoron nga paagi sama Kaniya. Gusto Siya nga kita molambo ug makakab-ot sa atong balaanong potensiyal isip usa ka anak sa Dios.
Nasayod ako nga kini dili sayon kanunay. Daghan kaninyo ang nag-atubang og mga kalisdanan ug personal nga mga pagsulay nga usahay makapaugtas. Tingali kamo nagtan-aw sa inyong kaugalingong mga kahimtang, sa pipila ka lisod nga mga sitwasyon sa inyong pamilya, o sa mga problema taliwala sa kanasoran sa tibuok kalibotan, ug naghunahuna, “Unsaon nako sa paglahutay niining nagsunod-sunod nga mga hagit?” Usa ka tubag ang tingali makapatingala kaninyo: Tinguhaa ang pagtukod sa Zion.
Hain Ang Zion?
Gihigugma Mo Ba Ako Labaw Pa Niini?, ni David Lindsley
Sa tibuok kasaysayan ang Dios kanunay nga mitawag sa Iyang katawhan sa pagtukod sa Zion. Kana sa kasagaran ang usa ka piho nga dapit diin ang katawhan sa Dios mahimong gawasnon sa mga impluwensiya sa kalibotan ug magpuyo nga magkahiuyon sa usag usa. Apan niining kataposan nga mahinungdanon nga dispensasyon, ang Zion dili limitado sa usa ka heyograpikanhon nga lokasyon. Sa atong panahon, ang Zion mahimong bisan asa kon asa makita ang usa ka matinud-anong miyembro sa Ang Simbahan ni Jesukristo sa mga Santos sa Ulahing mga Adlaw. Ang Ginoo mihulagway niining katawhan sa Zion nga “usa sa kasingkasing ug usa sa hunahuna” (Moises 7:18) ug “putli og kasingkasing” (Doktrina ug mga Pakigsaad 97:21). Sa ato pa, wala na kita naghunahuna sa Zion kon asa kita magpuyo apan kon sa unsang paagi kita magpakabuhi.
Daghang talagsaong mga panalangin ang giandam alang kaninyo samtang inyong buhaton ang inyong labing maayo sa pagtukod sa Zion, aron mamahimong tawo nga maoy gusto sa Manluluwas nga kamo mahisama, ug sa pagtabang sa pag-andam sa agianan alang sa Iyang pagbalik nganhi sa yuta. Ang ingon niana nga paningkamot nagkinahanglan og buhat ug hugot kaayo nga pagtuo, apan kini makahatag usab og malungtarong kalipay ug kamaya. Hinaot nga makita ninyo kini isip makapatandog ug makapaikag sama sa akong pagkakita niini! Sama sa gitudlo ni Presidente Russell M. Nelson, walay lain—walay lain gayod—nga mas importante.1 Ug kita mahimong moapil! Kita mao ang mga sundalo diha sa mga pangunahan sa kamatuoran. Wala kita magdala og mga bala; nagdala kita og mga bendahe! Gitawag kita sa pagtabang og alim sa kalibotan ug sa paghatag og tibuok kalibotan nga kongregasyon sa katawhan nga mahimong adtoon sa Manluluwas.
Higugmaa ang Dios ug Silingan
Makab-ot nato kini nga matang sa pamilya o mga kasilinganan o nasod pinaagi sa pagtuman sa sugo sa paghigugma. Ug kon mas higugmaon nato ang Dios, mas mohigugma kita sa atong mga silingan ug makakita og mga paagi nga kita makapanalangin kanila. Adunay mga silingan nga tabangan, mga kabos nga bayawon, ug maayo nga mga buhat nga himoon bisan asa.
Ang Ginoo kausa mihulagway niini nga responsibilidad ug panalangin niini nga paagi:
“Busa, pagmatinud-anon; … tabang sa maluyahon, ipataas ang mga kamot sa nawad-an og pagla[o]m, ug lig-ona ang mga tuhod nga mahuyang.
“Ug kon ikaw magmatinud-anon ngadto sa katap[o]san ikaw makaangkon og korona sa pagka-imortal, ug kinabuhi nga dayon diha sa mga mansyon nga Ako miandam diha sa balay sa akong Amahan” (Doktrina ug mga Pakigsaad 81:5–6).
Panalipdi ang Kamatuoran
Kon ang Dios motawag kanato sa pagtukod sa Zion, Siya nagtawag kanato sa pagpanalipod sa Iyang mga pagtulun-an ug magpabilin nga lig-on sa atong hugot nga pagtuo. Kini dili kanunay nga sayon o komportable nga buhaton, apan kinahanglan nato kining buhaton—uban sa kaluoy, kamapaubsanon, pagsabot, ug walay pagkapakyas nga gugmang putli alang sa uban. Sa atong pagpaningkamot sa pagtukod sa Zion, kita seguradong makasugat niadtong kinsa mahimong dili husto ang panagway o sininaan o linihokan. Kon mahimamat nato ang ingon niana nga mga tawo, kita kinahanglan gayod nga magmatngon sa pagtubag sa matarong nga paagi, dili magminatarong sa kaugalingon. Sa maong mga sitwasyon ang labing maayong butang nga atong mabuhat mao ang paglihok sa husto nga paagi mismo sa atong kaugalingon ug magpakita og “tiunay nga paghigugma” alang kanila (tan-awa sa Doktrina ug mga Pakigsaad 121:41).
Gusto nako nga ang uban makatagamtam sa mga panalangin nga akong nabatonan, apan usahay naghunahuna ko kon unsaon sa pagpaambit niini sa paagi nga dili makapasilo o malain og sabot. Kini nga kasulatan nakatabang kanako sa tanan nakong mga calling sa Simbahan ug personal nga mga responsibilidad isip usa ka disipulo ni Kristo:
“Busa, sa pagkatinuod Ako moingon nganha kaninyo, ipataas ang inyong mga tingog ngadto niini nga mga katawhan; ipamulong ang mga hunahuna diin Ako mobutang sa inyong mga kasingkasing, ug kamo dili pagalib[o]gon sa atubangan sa mga tawo;
“Kay ihatag kini kaninyo sa takna gay[o]d, oo, sa diha gay[o]d nga higayon, unsa ang inyong isulti.
“Apan usa ka sugo Ako mohatag nganha kaninyo, nga kamo mopahayag sa bisan unsa nga butang nga inyong ipahayag sa akong ngalan, diha sa kaligdong sa kasingkasing, diha sa espiritu sa kaagh[o]p, sa tanan nga mga butang.
“Ug Ako mohatag nganha kaninyo niini nga saad, nga kon mohimo kamo niini ang Espiritu Santo mosangyaw sa pagpamatuod ngadto sa tanan nga mga butang bisan unsa ang inyong isulti” (Doktrina ug mga Pakigsaad 100:5–8).
Usa ka Panalangin sa Pagpadayon sa Unahan
Akong minahal nga batan-ong mga higala, adunay mahagiton nga mga adlaw sa unahan, apan ang inyong kinabuhi sa kataposan mahimong talagsaon samtang inyong itugyan ang inyong kasingkasing ngadto sa Dios, mohigugma ni Ginoong Jesukristo, ug maningkamot sa inyong kaugalingon sa pagsunod sa ebanghelyo. Kon kamo matinud-anon, ang Zion maanaa bisan asa man kamo. Ako mopanalangin kaninyo sa paghangop niini sa malipayon nga paagi. Ang Ginoo adunay daghan kaayo nga giandam alang kaninyo!