“Ang Dios Makig-away sa Inyong mga Away—sa Iyang Paagi,” Alang sa Kalig-on sa mga Kabatan-onan, Sept. 2021, 15–17.
Dali, Sunod Kanako
Ang Dios Makig-away sa Inyong mga Away—sa Iyang Paagi
Ang nag-unang mga Santos nakakat-on og mapuslanon nga mga butang mahitungod sa mga paagi sa Dios.
Kampo sa Zion ni Judith Mehr
Uban sa masuk-anong kapin sa 300 ka manggugubot nga panon nga nanaad sa paglaglag kanila inigka buntag, ang grupo sa mga Santos kinsa milangkob sa Kampo sa Zion naglaom ug nag-ampo og milagro.
Ubos sa pagpangulo ni Joseph Smith, ang Kampo sa Zion nagmartsa sulod sa daghang semana gikan sa Ohio paingon ngadto sa Missouri. Kini nga mga miyembro sa Simbahan naglaom sa pagtabang sa mga Santos kinsa giabog gikan sa Distrito sa Jackson, Missouri, USA, aron sa pagkuha og balik sa ilang mga yuta. Apan sila miatubang og mga hulga ug oposisyon sa tibuok nila nga pagmartsa. Ug karon, laing manggugubot nga panon na usab ang naghulga kanila.
Ang milagro nga giampo sa mga Santos sa Kampo sa Zion sa wala madugay miabot. Miabot kini pinaagi sa itom nga mga panganod nga nagpundok sa layo. Usa ka mapintas nga unos ang misulbong sa tanang bahin ug mitagak og dagkong bagtok nga mga yelo. Ang unos mipahunong sa manggugubot nga panon sa pag-abante padulong sa mga Santos.
“Mao ra og ang sugo sa pagpanimalos miab[o]t gikan sa Dios sa mga gubat aron sa pagpanalipod sa iyang mga sulugoon gikan sa kalaglagan sa ilang mga kaaway,” ang kasaysayan ni Joseph Smith nagpasabot. “Ang bagtok nga yelo natagak diha kanila, ug wala dinhi kanamo, ug kami wala maunsa gawas sa pagkapalid sa pipila sa among mga tolda ug nabasa, samtang ang mga kalo sa among mga kaaway nalungagan ug kondili nakadawat og kadaot, gani sa pagkaguba sa ilang mga pusil ug sa paglayas sa ilang mga kabayo.”1
Ang makadaot nga ulan nga yelo usa lang ka bahin sa unos. Ang ulan kusog kaayo nga mibundak nga ang Fishing River, ang suba nga nagbulag sa duha ka grupo, mitaas og hapit 40 ka pye (12 ka metros) nga gilawmon. Kutob ra sa buulbuol ang gilawmon niini pagkabuntag.
Ang Ginoo misaad sa mga sakop sa Kampo sa Zion, “Ako ang [makig-away] sa inyong mga away” (Doktrina ug mga Pakigsaad 105:14). Kon kana mahitabo, walay duda kon hain nga pundok ang modaog.
Mga Milagro sa Modernong Panahon
Usahay kon magbasa kamo og mga istorya nga sama niini, tingali maghunahuna kamo kon nganong ang ingon niana nga makapaukyab nga mga milagro ingon og dili mahitabo kaninyo sa inyong mga panglimbasog.
Si Elder Jeffrey R. Holland sa Korum sa Napulog Duha ka Apostoles bag-ohay lang nga mipakigbahin og mga panabot nga makatabang. Miingon siya: “Palih[o]g sabta nga Siya kinsa dili gay[o]d magduka o matulog mahunahunaon alang sa kalipay ug sa umaab[o]t nga kahimayaan sa Iyang mga anak labaw sa tanan nga buhaton sa usa ka balaang binuhat. Siya ang mahimayaon nga hulagway sa tiunay nga gugma, ug Manggiloy-on nga Amahan ang Iyang ngalan.
“‘Kon mao man kana,’ tingali makaingon kamo nga, ‘dili ba angay nga unta ang Iyang gugma ug kalooy moiway na lang sa among personal nga mga Pulang Dagat [Kalisdanan] ug tug[o]tan kaming mobaktas latas sa among mga problema subay sa uga nga yuta?’”
Sa laing pagkasulti, kon ang Dios nakig-away sa ingon niana nga mga away alang sa Iyang mga anak kaniadto, nganong dili man buhaton karon? Nganong dili man wagtangon ang tanang sakit? Nganong dili man taposon ang gubat ug kagutom ug pag-antos sa tibuok kalibotan?
O nganong dili na man lang hunongon kanang madaogdaogon [bully] nga padayong nanghilabot kaninyo? O motabang sa inyong pamilya aron mas magkasinabtanay?
Si Elder Holland mitudlo og dugang: “Ang tubag niana nga mga pangutana ‘Oo, ang Dios makahatag og mga milagro diha dayon, apan sa dili madugay mahibaloan nato nga ang mga panahon sa atong mortal nga panaw Iyaha ug Siya lamang ang makabuot.’ Siya ang nagdumala sa mga hitabo ug sa mga gutlo sa atong kinabuhi sa tinagsatagsa.”2
Kon kamo mosunod sa mga sugo sa Dios, kamo adunay katungod sa panabang sa Dios. Apan walay usa kanato ang makapili kon sa unsang paagi o kanus-a kana nga tabang moabot.
Wala Damha nga mga Panalangin
Mobalik kita og kadiyot sa Kampo sa Zion. Ang milagro didto sa Fishing River makapaukyab gayod. Ug kini dili lamang ang milagro nga nakita sa mga sakop sa Kampo sa Zion atol sa ilang pagmartsa. Apan samtang kamo magbasa sa Dali, Sunod Kanako ug magkat-on sa seminary karong bulana, ang mga butang wala mahitabo segun sa paagi nga giplano sa mga Santos.
Nagtuo sila nga ang tibuok punto sa Kampo sa Zion mao ang pagtabang sa pagkuha og balik sa mga yuta didto sa Distrito sa Jackson nga gikawat gikan sa mga Santos pinaagi sa masuk-anong manggugubot nga mga panon.
Nakuha ba og balik sa mga Santos ang ilang mga yuta? Wala.
Nag-antos ba ang mga Santos didto sa dul-an sa 900 ka milya (1,448 ka kilometro) nga pagmartsa paingon sa Missouri? Oo. Usahay grabe kaayo. Sa kinagrabehan niini, usa ka pagdagsang sa kolera ang mikatap sa kampo ug mipatay og 13.
Kon tan-awon, ingon og ang tibuok nga paningkamot napakyas. Apan dili kana mao ang pagtan-aw sa daghan kinsa mimartsa sa kampo. Si Brigham Young miingon niini nga kasinatian, “Gigantihan ako og dako kaayo––gibayran og sobra nga kantidad––tinuod … ang kaayohan nga akong nadawat hilabihan kadako uban sa kahibalo nga akong nadawat pinaagi sa pagbiyahe kauban ang Propeta [nga si Joseph Smith].”3
Daghang ubang mga sakop sa Kampo sa Zion ang naghisgot usab mahitungod sa mga leksiyon nga nakat-onan ug sa bili sa pagmartsa. Si Propeta Joseph Smith mismo miingon: “Mga kaigsoonan, ang uban kaninyo nasuko kanako, tungod kay kamo wala makig-away didto sa Missouri; apan pasultiha ako kaninyo, ang Dios dili buot nga kamo makig-away. Siya dili maka-organisar sa iyang gingharian … gawas kon siya mopili [sa iyang mga lider] gikan sa pundok sa mga tawo nga mitugyan sa ilang mga kinabuhi, ug kinsa nakahimo og usa ka talagsaong sakripisyo sama sa gibuhat ni Abraham.”4
Kampo sa Zion ni C.C.A. Christensen
Ang ilang kamatinud-anon tingali wala moresulta nga napahiuli ang ilang mga yuta. Apan sila buhong nga napanalanginan sa ubang mga paagi. Kana usa ka sundanan nga tingali inyong mabantayan sa inyong kinabuhi usab. Ug kon unsa man ang gitabang sa Dios kanato nga mahimo pinaagi sa atong mga pagsulay kanunay nga mas dako kini nga milagro kay sa Iyang pagluwas kanato gikan sa atong mga pagsulay.
Ang Segurado nga Kadaogan sa Dios
Samtang magtuon kamo sa mga kinabuhi sa nag-unang mga Santos, inyong mabantayan sa matag karon ug unya ang impluwensiya sa Dios. Mabasa ninyo ang mahitungod sa dakong mga panalangin. Makit-an usab ninyo ang mga panahon sa grabeng panglimbasog. Apan alang niadtong kinsa misalig sa Dios hangtod sa kataposan, segurado ang ilang mahangturon nga ganti.
Kon kamo mosunod sa Dios ug mosalig Kaniya, Siya makig-away sa inyong mga away ug mohatag sa mga milagro nga inyong gikinahanglan! Kini nga mga milagro moabot sa Iyang kaugalingon nga paagi ug panahon, apan segurado ang resulta. Ang bisan unsa nga pagsulay masulbad sa kataposan—niini nga kinabuhi o sa sunod. Sama ka importante, kon kamo mosunod Kaniya, dili gayod kamo maglakaw nga mag-inusara. “Busa, pagmatinud-anon; ug tan-awa, ug sud-onga, Ako mouban kaninyo gani ngadto sa kataposan” (Doktrina ug mga Pakigsaad 105:41).