“Ingon og lisod ang pagtuman sa mga sumbanan kon ang tanan nga akong kaila anaa sa usa ka seryoso nga pakigrelasyon uban sa usa ka tawo. Unsay akong buhaton?” Alang sa Kalig-on sa mga Kabatan-onan, Sept. 2021, 9.
Mga Pangutana ug Mga Tubag
“Ingon og lisod ang pagtuman sa mga sumbanan kon ang tanan nga akong kaila anaa sa usa ka seryoso nga pakigrelasyon uban sa usa ka tawo. Unsay akong buhaton?”
Pagpalambo sa Kaugalingon
“Paningkamot nga makabaton og mahangturon nga panglantaw ug paggahin og panahon sa pagpalambo og mas lawom nga relasyon sa inyong pamilya ug mga higala. Kining maayo nga mga sumbanan makapadani sa uban diha kaninyo tungod kay sila makakita sa labing maayo diha kaninyo—ang tinuod nga kamo!”
Ellie S., 17, California, USA
Pagtinguha og Giya
“Kon nakigbisog kamo sa pagbati nga nag-inusara, pangayo sa Langitnong Amahan og kahupayan. Ang Espiritu Santo mogiya kaninyo ug maanaa alang kaninyo. Usab, kanunay kamong makapangayo og tambag sa inyong mga ginikanan ug mga lider, tungod kay sila nakaagi na niini!”
Jaime G., 17, Nuevo Casas Grandes, Mexico
Pakig-ilaila og Bag-ong mga Higala
“Pahinumdoman nako ang akong kaugalingon nga ang Dios nahigugma kanako. Dayon pahimuslan nako ang oportunidad nga makapangumusta sa karaang mga higala, ug maghimo ako og mga kalihokan aron makig-ilaila og bag-ong mga higala. Magamit ninyo kini nga panahon sa pagpalambo sa inyong pagkamasaligon [confidence], mga talento, ug pagpamatuod, ug kining tanan mamaayo ra.”
Julia S., 12, Alberta, Canada
Tambag sa mga Propeta
“Posibleng lisod ang paghunahuna mahitungod sa kahangtoran kon ang ‘karon’ ingon og mas importante. Hinumdomi nga ang mga propeta ug ubang mga lider sa Simbahan kusganong mitambag batok sa mga pakigrelasyon atol sa inyong pagkatin-edyer, bisan lapas sa edad nga 16. Ang seryoso nga mga pakigrelasyon kon batan-on pa kamo mahimong moresulta sa kasubo ug imoralidad. Mahimo usab kamong mangutana sa Langitnong Amahan kon unsay labing maayo nga butang nga inyong buhaton.”
Julia C., 17, Utah, USA
Moapil
“Usa ka maayo nga paagi nga mobati nga naapil mao ang pag-apil sa ubang mga butang. Sulayi ang usa ka bag-ong paugnat sa kusog [sport], awdisyon alang sa drama sa eskwelahan, o apil sa robotics nga club. Kon gibuhat ninyo ang usa ka butang nga inyong ganahan, makahimamat kamo og mga tawo nga ganahan ninyong ikauban.”
Mayah S., 16, Beijing, China
Inyo Kana nga Pagpili
“Kon kamo 16 na, makapili kamo kon gusto ninyong makig-date nga tinagsa-tagsa. Apan kon himoon man kana nga pagpili, ayaw paghunahuna kon unsa kahay hunahunaon sa uban kaninyo. Kon gibati ninyo nga andam na, nan buhata kini. Kon dili ka pa andam, ayaw buhata.”
Felipe M., 14, Rio de Janero, Brazil
Ubang Importante nga mga Pakigrelasyon
“Bisan kon kamo tingali wala sa usa ka pakigrelasyon sa usa ka ‘hinigugma,’ kamo sa gihapon adunay maayong mga pakigrelasyon sa mga higala ug pamilya sa inyong palibot. Pagmapasalamaton alang niana nga mga pakigrelasyon. Aron malig-on kini, pagmahimong Kristohanon ug usa ka maayong ehemplo.”
Taylee L., 17, Utah, USA
Hulata ang Pagmugna og Seryoso nga mga Pakigrelasyon
“Ganahan ko nga dili lang usa makigrelasyon. Pipila sa akong mga higala dili makig-uban kanako tungod kay gigahin nila ang ilang tanan nga panahon uban sa ilang mga uyab nga lalaki. Gibati nako nga gawasnon ako sa pakighimamat og mga tawo nga dili mohimo og importanteng mga desisyon nga sayo ra kaayo.”
Gina C., 16, Nuevo Casas Grandes, Mexico
Ayaw Pugsa ang Inyong Kaugalingon
“Gibati nako ang samang pagbati, apan ang pag-ampo sa Ginoo, pagbasa sa akong mga kasulatan, ug pagpakig-istorya sa akong mga ginikanan nakatabang kanako. Dili kita kinahanglan nga mobati nga napugos, tungod kay ang Ginoo motabang kanato nga masayod kon kini mao na ang husto nga panahon. Tagamtama ang inyong kinabuhi, ug paggahin og panahon sa mga higala ug pamilya samtang kamo batan-on pa! Kini nga panahon sa atong kinabuhi kausa lang mahitabo, busa ayaw batia nga napugos sa pagpadali niini.”
Victoria G., 16, Nuevo Casas Grandes, Mexico