Lig-on nga mga Pundasyon

Sinina nga Makapasubo

Paghulagway ni Alyssa Gonzalez

Sa dihang diha pa ako sa high school, napilian ko nga mosalmot sa pasundayag sa urog alang sa tinuig nga kalihokan sa eskwelahan. Nasayod ko nga ang mga coordinator mopili og mga sinina nga dili ligdong, busa misulti ko niya nga dili ko moapil kon ang sinina nga akong isul-ob dili ligdong. Miingon siya nga okey ra kana.

Sa dihang ang akong mga higala ug ako miadto aron susihon ang among sinina, naglibog ko. Bisan sa unsay gisulti sa coordinator ngari nako, ang tanang sinina sukwahi sa mga sumbanan sa sinina ug panagway diha sa Alang sa Kalig-on sa Kabatan-onan nga booklet. Tungod kay kini ingon og walay solusyon, misulay ko og sul-ob sa usa sa mga dili ligdong nga mga sinina. Gusto ko nga gwapa tan-awon, apan sa dihang misul-ob ko nianang sinina, dili maayo ang akong gibati sa akong kaugalingon. Naghunahuna ko, “Unsa kaha akong bation diha sa atubangan sa Ginoo niining matang sa sinina?”

Naghunahuna ko kon unsaon kaha nako sa paggawas niini nga sitwasyon. Sa kataposan, akong nakit-an ang sinina sa prom sa akong magulang nga babaye, nga nahaom sa sumbanan sa Ginoo. Sa dihang gisultihan nako ang akong mga higala nga akong gamiton ang akong kaugalingong sinina, makasulti ko gikan sa ilang mga panagway nga naghunahuna sila nga mas nindot ko nga tan-awon sa dili ligdong nga sinina. Maayo gani, ang coordinator miingon nga OK ra ang magsul-ob og ligdong nga sinina.

Nahupay ko, ug mibati nga masaligon. Wala na ko manumbaling unsa ang hunahuna sa akong mga higala. Nakakita ko og paagi sa pagsalmot gamit ang matahom ug ligdong nga sinina. Mapasalamaton ako nga nakabaton og kaisog nga akong mapreserba ang akong taas nga mga sumbanan, ilabi na kon kini dili sayon o popular.

Jessika S., Indonesia