Wala Ako Mapili sa Kuponan sa Sayaw

Ni Emily Joy Thompson

Mga Magasin sa Simbahan

Wala ang akong ngalan diha sa lista. Nasagmuyo ako. Apan ang Ginoo nagtudlo kanako og usa ka butang.

mga mananayaw sa ballet

Paghulagway ni Gabriele Cracolici

Ganahan ko mosayaw sukad pa niadtong tres anyos pa ko. Mao nga dihang nag-high school na ko, nalipay ko dihang adunay mga namili [nag-tryout] alang sa sayaw. Wala koy pagduha-duha nga tungod sa akong talento ug kasinatian, sayon ra ko nga mapili sa kuponan.

Pipila ka adlaw human sa mga pagpili, ang mga ngalan sa kuponan sa sayaw gi-post. Sa akong kadismaya, wala nako makit-i ang akong ngalan bisan asa diha sa lista. Nasagmuyo ako. Mipauli ko mihilak diha sa akong higdaanan. Naglagot ko sa magtutudlo sa sayaw ug nahiubos nga dili pa diay to igo ang akong kamaayo aron mapili sa kuponan. Ang akong mama hilom nga misulod sa akong kwarto ug misugyot nga mangayo ko sa Langitnong Amahan alang sa kalig-on nga makalahutay niining “kalisod” sa akong kinabuhi. Ako nagpanuko sa pag-uyon ug militok og usa ka mubo nga pag-ampo. Human sa pag-ampo wala ko mobati og arang-arang, mao nga padayon ko sa pagmug-ot ug sa pagkamasulub-on. Nakatulog ko nianang gabhiona nga magul-anon kaayo.

Pagkasunod buntag mibangon ko gikan sa higdaanan. Ang panumdoman sa akong kapakyasan presko pa sa akong hunahuna, ug gusto kong mobalik og katulog nga magbukot. Apan sa wala pa nako mabuhat, nakahinumdom ko og usa ka saad nga gihimo sa akong bishop. Miingnon siya nga kon magbasa ko sa mga kasulatan matag adlaw, bisan sulod lang sa 15 minutos, niana ako mapanalanginan. Kon nagkinahanglan man ko og usa ka panalangin, mao kana karon.

Samtang nagbasa ko, akong nadiskobrehan kining bersikulo sa Doktrina ug mga Pakigsaad:

“Sa pagkatinuod Ako moingon nganha kaninyo akong mga higala, ayaw kahadlok, himoa nga mahupay ang inyong mga kasingkasing; oo, maglipay hangtud sa hangtud, ug sa matag butang maghatag og mga pagpasalamat;

“Maghulat nga mapailubon sa Ginoo, kay ang inyong mga pag-ampo misulod ngadto sa mga dunggan sa Ginoo sa mga Panon, ug natala uban niini nga silyo ug tugon—ang Ginoo nanumpa ug nagtakda nga sila pagahatagan.

Busa, naghatag siya niini nga saad nganha kaninyo, uban sa dili mausab nga pakigsaad nga sila pagatumanon; ug ang tanan nga mga butang diin kamo gipaantus molihok alang sa inyong kaayohan, ug ngadto sa himaya sa akong ngalan, nag-ingon ang Ginoo.” (Doktrina ug mga Pakigsaad 98:1–3).

Nakalitan ko. Ako naglingkod nga nakapajama nga nagkalkag ang buhok ug natingala kon unsa ka dako ang akong panginahanglan niining kasulatan. Ang tanang pagbati sa kasuko ug kasubo nahanaw pinaagi niadtong tulo ka mga bersikulo. Akong gibati ang gugma sa akong Langitnong Amahan ug nasayod nga Siya nasayod unsa ang akong giagian. Tungod niining bag-ong panglantaw, akong nakita nga ang pagkawala mapili alang sa kuponan sa sayaw gamay ra gayod nga kalisod sa akong kinabuhi. Miluhod ko nga mapasalamaton ug mipasalamat sa Langitnong Amahan.

Sa tibuok adlaw, nahimo nako nga ang Espiritu magpabilin uban kanako ug mitan-aw sa akong mga pagsulay isip mga oportunidad sa paglambo. Kanunay nakong huptan kining espesyal makatandog nga mga bersikulo sa akong kasingkasing. Ug akong hinumduman ang saad sa akong bishop mahitungod sa mga panalangin sa pagdangop ngadto sa kasulatan. Mapasalamaton kaayo ko nga mahimong kabahin niining Simbahan ug sa pagbaton og kahibalo sa ebanghelyo. Nasayod ko nga ang plano sa Langitnong Amahan mao ang tinuod nga plano sa kalipay.

Ang mga Butang Mamaayo Ra

D. Todd Christofferson

“Nasay[o]d kita nga ang mga hagit, mga kahigawad, ug mga kasubo moab[o]t sa matag usa kanato sa lain-laing mga paagi, apan nasay[o]d usab kita nga sa katapusan, tungod sa atong balaan nga Manlalaban, ang tanang mga butang mahimong hiusahon alang sa atong kaayohan [tan-awa sa Doktrina ug mga Pakigsaad 90:24; 98:3]. Mao kini ang hugot nga pagtuo nga yano kaayong gipahayag ni Presidente Gordon B. Hinckley (1910–2008) sa dihang siya nag-ingon, ‘Mamaayo ra ang tanan.’ Kon kita kanunayng mohinumdom sa Manluluwas, kita ‘malipayong mobuhat sa tanang mga butang nga anaa sa atong gah[o]m,’ [tan-awa sa Doktrina ug mga Pakigsaad 123:16–17] masaligon nga ang Iyang gahom ug gugma alang kanato maoy makapalamp[o]s nato.”

Elder D. Todd Christofferson sa Korum sa Napulog Duha ka Apostoles, “Sa Kanunay Mahinumdom Kaniya,” Abr. 2011, 55.

Sugdi sa usa ka makapadasig nga Indeks

Kon kita mosiksik sa mga kasulatan alang sa tabang, sa kasagaran dili dugay ang pagpangita og usa ka bersikulo nga ingon og kini gisulat alang lamang gayod kanato. Sa ubang mga higayon tingali madugay-dugay ang pagpangita og usa ka kasulatan nga mamulong kanato og sama niana. Usa ka paagi aron makit-an ang tabang nga imong gikinahanglan kon gikinahanglan nimo kini mao ang paghimo og “makapadasig nga indeks”

Samtang magtuon ka sa mga kasulatan, bantayi ang mga bersikulo nga naglangkob og mga saad o mga pag-awhag nga mahimong makatabang kanimo o sa uban sa umaabot nga mga pagsulay og mga panglimbasog. Ang pagmarka sa mga kasulatan ug paghimo og lista niini makahatag kanimo og kalig-on nga imong gikinahanglan kon ikaw nawad-an og kadasig. Alang sa dugang nga tabang, ilain-lain ang mga kasulatan ngadto sa managlahing mga katergoriya base sa unsa nga mga kalisdanan ang gitubag niini. Nianang paagiha, kanunay ka nga adunay mga saad sa kasulatan ug mga panalangin nga andam nga mabasa kon imo kining gikinahanglan.