“Pag-ugmad sa Labing Maayo diha Kanimo,” Alang sa Kalig-on sa mga Kabatan-onan, Sept. 2021, 6–7.
Dali, Sunod Kanako
Pag-ugmad sa Labing Maayo diha Kanimo
Lima ka mga paagi sa pagtukod og usa ka malipayon ug puno sa kamaya nga kinabuhi.
Mga paghulagway pinaagi ni Juliet Percival
Sa dihang ang Ginoo misugo ni Joseph Smith sa pagtukod sa Templo sa Kirtland, wala Niya pasagdi si Joseph Smith kon unsaon sa pagbuhat niini sa iyang kaugalingon. Siya mipadayag sa usa ka plano nga mosangpot sa kalamposan.
“Himoa ang pagtukod sa balay, nga dili sama sa paagi sa kalib[o]tan,” mipahayag ang Ginoo. “Himoa nga kini matukod sama sa paagi nga [Akong ipakita]” (Doktrina ug mga Pakigsaad 95:13–14). Ang Ginoo mihatag dayon og mga instruksyon kon unsaon sa pagtukod sa templo (tan-awa sa Doktrina ug mga Pakigsaad 95:15–17).
Salamat na lang, ang Ginoo mipakita kanato og labaw pa kon unsaon sa pagtukod ang mga templo. Mihatag usab Siya kanato og mga instruksyon aron sa pagtabang kanato nga mahimong labing maayong tawo kutob sa atong mahimo. Samtang mosunod kita niini, kita motukod sa atong mga kinabuhi “nga dili subay sa paagi sa kalib[o]tan” apan sumala sa paagi nga gidesinyo sa Ginoo.
Ania ang lima ka paagi sa pagtukod og usa ka malipayon ug puno sa kamaya nga kinabuhi nga nakasentro diha kang Jesukristo.
Motukod og usa ka Sigurado nga Tukoranan
Bisan kinsa nga arkitekto o tigtukod mosulti kaninyo nga ang usa ka solido nga pundasyon mahinungdanon sa bisan unsang gambalay. Si Helaman mitudlo nga ang labing maayo nga pundasyon alang sa atong kinabuhi mao ang “sukaranan sa atong Manunubos kinsa mao ang Kristo, ang Anak sa Dios” (Helaman 5:12). Makahimo kita sa paghimo kang Kristo nga atong pundasyon pinaagi sa pagduol ngadto Kaniya ug pagsunod sa Iyang mga pagtulon-an. Unsay imong gibati dihang imong gihimo si Kristo nga sukaranan sa imong kinabuhi?
Pagserbisyo sa Uban
Laing talagsaong paagi sa pagtukod sa atong kinabuhi, sumala ni Presidente Dieter F. Uchtdorf, kanhi Ikaduhang Magtatambag sa Unang Kapangulohan, moabot kon “naglihok kita sa atong pagserbisyo sa Ginoo ug moserbisyo niadtong naglibut kanato.”1 Kon kamo moserbisyo sa uban, kamo nagbuhat sa unsay gibuhat ni Jesus ug nagkat-on nga mas mahisama Kaniya. Ug dili lamang kamo makapanalangin sa mga tawo nga inyong gialagaran, apan kamo mapanalanginan usab.
Paghimo og Regular nga Tulumanon sa Pag-ampo ug Pagtuon sa Kasulatan
Laing paagi sa pagtukod og malipayon nga kinabuhi mao ang pagtukod og relasyon sa Langitnong Amahan ug ni Jesukristo. Ang dakong paagi sa pagbuhat niana mao ang pinaagi sa pag-ampo ug pagtuon sa kasulatan.
Si Presidente Uchtdorf miingon: “Sa paglig-on sa atong relasyon ngadto sa Dios, kita nagkinahanglan og makahuluganon nga panahon nga mag-inusara uban Kaniya. Hilom nga pag-focus sa matag adlaw sa personal nga pag-ampo ug pagtuon sa kasulatan… pipila kini sa maalamong mga puhunan sa atong panahon ug paningkamot nga mas maduol sa atong Langitnong Amahan.”2
Ang pag-ampo mao ang usa ka oportunidad sa pagkig-istorya sa atong Amahan sa Langit. Siya nakaila kanato, nahigugma kanato, ug gusto nga maminaw kanato! Kon kita sinsero nga mag-ampo, mohalad sa atong mga pasalamat, ug mangayo sa mga butang nga atong gikinahanglan, Siya maminaw ug motubag kanunay sa Iyang kaugalingong paagi ug panahon.
Kon hisgotan ang pagtuon sa kasulatan, walay usa lang ka husto nga paagi sa pagbuhat niini. Ang importanting butang mao nga kamo mobuhat niini! Si Presidente Russell M. Nelson nagtudlo, “Ang inadlaw nga pagtuon sa pulong sa Dios mao ang mahinungdanon kaayo nga espirituhanong pagsugakod.”3 Ang paggahin og panahon sa matag adlaw diha sa mga kasulatan, walay duha-duha, makatabang kaninyo sa pagtukod og usa ka kinabuhi sa hugot nga pagtuo ug kalig-on.
Paliboti ang Inyong Kaugalingon uban Niadtong Kinsa Nag-awhag Kaninyo sa Pagbuhat og Maayo
Ang Langitnong Amahan gusto nga kita mokonektar ug motukod og mga relasyon sa uban—ilabi na sa pamilya ug mga higala. Sa kasagaran kita maumol niadtong atong gigahinan og panahon nga makauban. Mga miyembro man sila sa Simbahan o dili, kamo kinahanglan mapalibotan sa mga tawo nga motabang kaninyo sa pagsunod sa ebanghelyo, motuman sa mga sumbanan sa Ginoo, ug mahimong mas maayong tawo. Makatabang usab kamo niadtong naglibot kaninyo sa pagbuhat sa ingon. Hain sa inyong mga higala ang nagtabang kaninyo nga makatukod og pundasyon sa pagkamatarong?
Pagkaplag og Kalipay diha sa Pagtukod sa Inyong Pundasyon
Adunay daghang mga paagi nga kamo makatukod sa inyong kinabuhi aron mahimong lig-on sa espirituhanong paagi ug makabaton og kalipay, lakip sa pag-adto sa simbahan ug pag-ambit sa sakramento, mohimo ug motuman sa mga pakigsaad, ug mosunod sa tambag sa buhi nga mga propeta.
Importante nga hinumdoman nga ang tanan niining mga butang nagkinahanglan og kakugi ug panahon. Sa kanunay adunay pagtukod ug pagkat-on nga pagahimoon, apan kamo dili kinahanglan nga magbuhat niini nga mag-inusara. Ang Ginoo motabang kaninyo sa matag adlaw samtang kamo maningkamot sa inyong labing maayo sa pagtukod og usa ka kinabuhi nga kamo ug Siya mahimong mapasigarbuhon ug kana makadala kaninyo og kalipay.