“Fakatupulaki ki Hoʻo Lelei Tahá,” Ki Hono Fakamālohia ʻo e Toʻu Tupú, Sepitema 2021, 6–7.
Haʻu, ʻo Muimui ʻIate Au
Fakatupulaki ki Hoʻo Lelei Tahá
Founga ʻe nima ke langaki ai ha moʻui fiefia mo nēkeneka.
Ngaahi tā fakatātā ʻa Juliet Percival
ʻI he taimi ne fekauʻi ai ʻe he ʻEikí ʻa Siosefa Sāmita ke langa ʻa e Temipale Ketilaní, naʻe ʻikai ke Ne tuku toko taha ia ke ne feinga ke ʻiloʻi e anga hono langá ʻiate ia pē. Naʻá ne fakahā ange ha palani ʻe iku ai ki ha lavameʻa.
Naʻe fakahā ʻe he ʻEikí, “Tuku ke langa ʻa e falé, ʻo ʻikai tatau mo e founga ʻa e māmaní. “Tuku ke langa ia ʻo tatau mo e anga te u fakahā atú” (Tokāteline mo e Ngaahi Fuakava 95:13–14). Naʻe ʻoange leva ʻe he ʻEikí ha ngaahi fakahinohino ki he founga ke langa ai ʻa e temipalé (vakai, Tokāteline mo e Ngaahi Fuakava 95:15–17).
Meʻamālié, kuo fakahā mai ʻe he ʻEikí ha meʻa lahi ange ʻo ʻikai ngata pē ʻi he founga ki hono langa ʻo e ngaahi temipalé. Kuó Ne ʻomi foki ha ngaahi fakahinohino ke tokoniʻi kitautolu ke tau hoko ko e tokotaha lelei taha te tau lava ʻo aʻusiá. ʻI heʻetau muimui kiate kinautolú, te tau langa ai ʻetau moʻuí “ʻo ʻikai fakatatau ki he founga ʻa e māmaní” kae fakatatau mo e founga kuo fokotuʻutuʻu ʻe he ʻEikí.
Ko ha founga ʻeni ʻe nima ke langaki ai ha moʻui fiefia ʻoku fakatefito ʻia Sīsū Kalaisí.
Fokotuʻu ha Fakavaʻe Pau
ʻE talaatu ʻe ha taha tā palani pe taha langa, ʻoku mahuʻinga ha fakavaʻe fefeka ki ha faʻahinga fale pē. Naʻe akoʻi ʻe Hilamani ko e fakavaʻe lelei taha ki heʻetau moʻuí ko e “maka ʻo hotau Huhuʻí, ʻa ia ko Kalaisi, ko e ʻAlo ʻo e ʻOtuá” (Hilamani 5:12). Te tau lava ʻo fokotuʻu ʻa Kalaisi ko hotau fakavaʻe, ʻaki ʻetau haʻu kiate Ia pea muimui ki Heʻene ngaahi akonakí. ʻOkú ke ongoʻi fēfē ʻi hoʻo ʻai ke hoko ʻa Kalaisi ko e fakavaʻe ʻa hoʻo moʻuí?
Tokoniʻi ʻa e Niʻihi Kehé
Fakatatau kia Palesiteni Tieta F. ʻUkitofa ʻi heʻene kei hoko ko e Tokoni Ua ʻi he Kau Palesitenī ʻUluakí, ko ha founga lelei ʻe taha ke langa ai ʻetau moʻuí, ʻoku maʻu ia ʻi he taimi ʻoku “tau tuʻu [ai] ʻo tauhi ki he ʻEikí mo tokoniʻi e niʻihi ʻoku tau feohí.”1 ʻI hoʻo tokoniʻi e niʻihi kehé, ʻokú ke fai ai e meʻa naʻe fai ʻe Sīsuú mo ako ke hoko ʻo hangē ko Iá. Pea he ʻikai ngata pē ʻi hoʻo faitāpuekina e moʻui ʻo e kakai ʻokú ke tokoniʻí ka ʻe tāpuekina foki ai mo koe .
Fokotuʻu ha Founga Angamaheni ʻo e Lotú mo e Ako Folofolá
Ko ha founga ʻe taha ke fakatupulaki ai ha moʻui fiefia ko hono langaki ha vā fetuʻutaki mo e Tamai Hēvaní mo Sīsū Kalaisi. Ko ha founga lelei ke fai ai iá, ko e lotú mo e ako e folofolá.
Naʻe pehē ʻe Palesiteni ʻUkitofa, “ʻOku fie maʻu hatau taimi lelei mo e ʻOtuá ke fakamālohia ʻetau fetuʻutakí. Ko ha fakaʻaongaʻi fakapotopoto ʻeni hotau taimí mo e ngaahi ngāué ke tau ofi ange ai ki heʻetau Tamai Hēvaní… [ko e] tokanga taha ki he lotu fakatāutahá mo e ako folofolá.”2
Ko e lotú ko ha faingamālie ia ke fetuʻutaki ai mo ʻetau Tamai Hēvaní. ʻOkú Ne ʻafioʻi, ʻofeina, mo fie fanongo meiate kitautolu! ʻI he taimi ʻoku tau lotu fakamātoato aí, ʻohake ʻetau fakamāloó, mo kolea e ngaahi meʻa ʻoku tau fie maʻú, ʻokú Ne fakafanongo mo tali maʻu pē ʻi Heʻene founga mo e taimi pē ʻAʻaná.
ʻI heʻene fekauʻaki mo e ako folofolá, ʻoku ʻikai ha founga totonu pē ʻe taha ki hono fakahoko iá. Ko e meʻa mahuʻingá ke ke fai ia! Kuo akoʻi mai ʻe Palesiteni Lāsolo M. Nalesoni, “ʻOku mātuʻaki mahuʻinga e femoʻuekina fakaʻaho ʻi he folofola ʻa e ʻOtuá, ki heʻetau moʻui fakalaumālié.”3 ʻI hoʻo fakaʻaongaʻi fakaʻaho e folofolá, he ʻikai ha toe veiveiua, ʻe tokoni ia ke langaki hake ai ha moʻui ʻo e tuí mo e mālohí.
Feohi mo Kinautolu ʻoku Nau Poupouʻi Koe ke Ke Fai Leleí
ʻOku finangalo ʻa e Tamai Hēvaní ke tau fetuʻutaki mo fakatupulaki ha ngaahi vā fetuʻutaki mo e niʻihi kehé—tautautefito ki he fāmilí mo e ngaahi kaungāmeʻá. ʻOku faʻa tākiekina kitautolu ʻe he niʻihi ʻoku tau feohi mo iá. Tatau ai pē pe ko e mēmipa kinautolu ʻo e Siasí pe ʻikai, ʻoku totonu ke ke feohi mo e kakai ʻoku nau tokoni atu ke ke moʻui ʻaki ʻa e ongoongoleleí, tauhi e ngaahi tuʻunga moʻui ʻa e ʻEikí, pea hoko ko ha tokotaha lelei ange. Te ke lava foki ʻo tokoniʻi ʻa kinautolu ʻoku mou feohí ke nau fai ʻa e meʻa tatau. Ko hai ʻi ho ngaahi kaungāmeʻá ʻokú ne tokoniʻi koe ke langa ho fakavaʻé ʻi he māʻoniʻoní?
Maʻu ʻa e Fiefiá ʻi hono Langa Ho Fakavaʻé
ʻOku lahi mo ha ngaahi founga kehe te ke lava ai ʻo langa ho moʻuí ke mālohi fakalaumālie mo fiefia, kau ai ʻa e ʻalu ki he lotú mo maʻu ʻa e sākalamēnití, fakahoko mo tauhi e ngaahi fuakavá, pea muimui ki he faleʻi ʻa e kau palōfita moʻuí.
ʻOku mahuʻinga ke manatuʻi ko e ngaahi meʻá ni kotoa ʻoku fie maʻu ki ai ha ngāue mo ha taimi. ʻOku ʻi ai maʻu pē ʻa e faingamālie ke fakatupulaki mo ako, ka he ʻikai fie maʻu ia ke ke fakahoko tokotaha ia. ʻE tokoniʻi koe ʻe he ʻEikí ʻi he ʻaho takitaha ʻi hoʻo feinga ʻaki ho lelei tahá ke fokotuʻu ha moʻui te ke laukau ʻaki ai mo Ia pea te ne ʻomi ʻa e fiefiá kiate koe.