Ngaahi Fehuʻí mo e Ngaahi Talí

“Hangē ʻoku faingataʻa ke tauhi ʻa e ngaahi tuʻunga moʻuí ʻi he taimi ʻoku feohi fakamātoato ai ʻa e tokotaha kotoa pē ʻoku ou ʻiloʻí mo ha tahá. Ko e hā e meʻa ʻoku totonu ke u faí?”

“ʻOkú ke fie maʻu ʻa e meʻa ʻe lavá, malu, mo hao ʻi he … feʻofaʻakí … ? Hoko ko ha ākonga moʻoni ʻa Sīsū. Hoko ko ha Taha Māʻoniʻoni ʻi he Ngaahi ʻAho Kimui Ní ʻoku moʻoni mo mateaki, ʻi he leá mo e ngāué. Tui ʻoku mahuʻinga fau hoʻo tuí ki hoʻo feʻofaʻakí, he ʻoku moʻoni ia.”

ʻEletā Jeffrey R. Holland ʻo e Kōlomu ʻo e Kau ʻAposetolo ʻe Toko Hongofulu Mā Uá, “How Do I Love Thee?” New Era, ʻOkatopa 2003, 8.

Fakalakalaka Fakafoʻituituí

“Feinga ke maʻu ha fakakaukau ʻoku taʻengatá pea tuku ha taimi ke fakatupulaki ai ha ngaahi vā fetuʻutaki ʻoku loloto angé mo hoʻo fāmilí mo e ngaahi kaungāmeʻá. ʻE tohoakiʻi ʻe he ngaahi sīpinga moʻui lelei ko ʻení ʻa e niʻihi kehé kiate koe koeʻuhí te nau sio ki ho tuʻunga lelei tahá—ʻa hoʻo tuʻunga totonú!”

Ellie S., 17, Kalefōnia, USA

Fekumi ki ha Fakahinohino

“Kapau ʻokú ke fefaʻuhi mo e ongoʻi tuenoá, kole ki he Tamai Hēvaní ha fakafiemālie. ʻE tataki mo nofoʻia koe ʻe he Laumālie Māʻoniʻoní. ʻIkai ngata aí, te ke lava maʻu pē ʻo kole faleʻi ki hoʻo mātuʻá mo e kau takí, he kuo nau aʻusia e meʻa ʻokú ke aʻusiá!”

Jaime G., 17, Nuevo Kasesi Kalanitesi, Mekisikou

Feohi mo ha Ngaahi Kaungāmeʻa Foʻou

“Te u fakamanatu kiate au ʻoku ʻofa ʻa e ʻOtuá ʻiate au. Pea te u fakaʻaongaʻi leva ʻa e faingamālie ke fetuʻutaki ai mo hoku ngaahi kaungāmeʻa motuʻá, pea te u fokotuʻu ha ngaahi ʻekitivitī ke maʻu ai ha ngaahi kaungāmeʻa foʻou. Te ke lava ʻo fakaʻaongaʻi e taimi ko ʻení ke fakatupulaki ai hoʻo loto-falalá, ngaahi talēnití, fakamoʻoní, pea ʻe lelei e meʻa kotoa.”

Julia S., 12, ʻAlipeta, Kānata

Faleʻi ʻa e Kau Palōfitá

“ʻE lava pē ke faingataʻa ʻa e fakakaukau ki ʻitānití ʻi he taimi ʻoku ngali mahuʻinga ange ai ʻa e ʻtaimi ní.ʼ Manatuʻi kuo ʻosi faleʻi mālohi ʻe he kau palōfitá mo e kau taki kehe ʻo e Siasí ke ʻoua te mou ʻi ha vā fetuʻutaki feʻofaʻaki ʻi homou taʻu hongofulu tupú, ʻo aʻu pē ki he hili homou taʻu 16. ʻE lava ke iku e ngaahi vā fetuʻutaki fakamātoato ʻi hoʻo kei siʻí ki he loto-mamahí mo e angaʻulí. Te ke lava foki ʻo fehuʻi ki he Tamai Hēvaní pe ko e hā ʻa e meʻa lelei taha ke ke faí.”

Julia C., 17, ʻIutā, USA

Kau Atu

“Ko ha founga lelei ke ongoʻi ai ʻokú te kaú, ko e kau atu ki ha ngaahi meʻa kehe. ʻAhiʻahiʻi ha sipoti foʻou, ʻahiʻahi ke kau ʻi he vaʻinga fakaako, pe kau ʻi ha kalapu angamaheni. Kapau ʻokú ke fai ha meʻa ʻokú ke manako ai, te ke fetaulaki mo e kakai ʻokú ke saiʻia ke feohi mo iá.”

Mayah S., 16, Peisingi, Siaina

Ko e Filí ʻAʻau

“Kapau ʻokú ke ʻosi taʻu 16, te ke lava ʻo fili kapau ʻokú ke fie ʻalu ʻo teiti toko taha pē. Ka ʻi hoʻo fai e fili ko iá, ʻoua te ke fakakaukau ki he fakakaukau ʻa e niʻihi kehé kau kiate koé. Kapau ʻokú ke ongoʻi mateuteu, fai leva ia. Kapau ʻoku ʻikai, ʻoua naʻa fai ia.”

Felipe M., 14, Lio ti Sanelo, Palāsila

Ngaahi Vā Fetuʻutaki Mahuʻinga Kehé

“Neongo kapau ʻoku ʻikai ke ke ʻi ha vā fetuʻutaki mo ha ʻtokotaha kehe,ʼ ka ʻokú ke kei maʻu pē ha ngaahi vā fetuʻutaki lelei mo ho ngaahi kaungāmeʻa mo e fāmili ʻoku mou feohí. Houngaʻia ʻi he ngaahi vā fetuʻutaki ko iá. Anga faka-Kalaisi mo hoko ko ha faʻifaʻitakiʻanga lelei kae lava ʻo fakamālohia kinautolu.”

Taylee L., 17, ʻIutā, USA

Tatali ke Faʻu ha Ngaahi Vā Fetuʻutaki Fakamaatoato

“ʻOku ou saiʻia ʻi he teʻeki ke u ʻi ha vā fetuʻutakí. ʻOku ʻi ai ha niʻihi ʻo hoku ngaahi kaungāmeʻá ʻoku ʻikai ke nau feohi mo au he ʻoku nau fakamoleki honau taimí kotoa mo honau ngaahi kaumeʻa tangatá. ʻOku ou ongoʻi hangē ʻoku ou tauʻatāina ke feʻiloaki mo e kakaí kae ʻikai fuʻu vave ke fai ha ngaahi fili mahuʻinga.”

Gina C., 16, Nuevo Kasesi Kalanitesi, Mekisikou

ʻOua Naʻá ke Ongoʻi Mafasia

“Kuó u ongoʻi ʻa e ongo tatau, ka kuo tokoniʻi au ʻe he lotu ki he ʻEikí, lau ʻeku folofolá, mo talanoa mo ʻeku ongomātuʻá. ʻOku ʻikai fie maʻu ia ke tau ongoʻi mafasia, koeʻuhí ʻe tokoniʻi kitautolu ʻe he ʻEikí ke tau ʻilo ʻa e taimi totonú. Fiefia ʻi hoʻo moʻuí, pea feohi mo ho ngaahi kaungāmeʻá mo e fāmilí lolotonga hoʻo kei siʻí! ʻOku hoko tuʻo taha pē ʻa e vahaʻataimi ko ʻeni ʻo ʻetau moʻuí, ko ia ai ʻoua naʻá ke ongoʻi mafasia ke fakavaveʻi ia.”

Victoria G., 16, Nuevo Kasesi Kalanitesi, Mekisikou

ʻOku fakataumuʻa ʻa e ngaahi tali ʻa e kau laukongá ke hoko ko ha tokoni mo ha fakakaukau, ka ʻoku ʻikai ko hano fakahaaʻi ʻo ha tokāteline ʻo e Siasí.

Ko e Hā Hoʻo Fakakaukaú?

Naʻe fakaʻofoʻofa e sākalamēniti ʻi ʻapí. Ko e hā ka finangalo ai e ʻEikí ke tau toe foki ki he lotú?

ʻOmi hoʻo talí mo e laʻitaá kimuʻa he ʻaho 15 ʻo ʻOkatopá, 2021.

ʻAlu ki he ftsoy.ChurchofJesusChrist.org, pea lomiʻi ʻi he “ʻAve Hoʻo Ngāué.” Hū ʻaki hoʻo ʻAkauni ʻi he Siasí pea fili leva ʻa e “Ki Hono Fakamālohia ʻo e Toʻu Tupú” ʻi lalo ʻi he “Fili e Makasiní.” Lomiʻi ʻi he “Tānaki Atu ha Faile” ke fili hoʻo failé mo e ʻū taá, pea lomiʻi ʻi he “Fakahū” ke upload mo ʻomi kiate kimautolu hoʻo failé. Pe ʻīmeili mai kiate kimautolu ʻi he [e-mail].

ʻE lava ke liliu ʻa e ngaahi talí koeʻuhí ke lōloa feʻunga pe mahino.