Ngaahi MakatuʻungaMālohí

Faingataʻaʻia he Fili Valá

Tā fakatātā ʻa Alyssa Gonzalez

ʻI heʻeku kei ʻi he ako māʻolungá, naʻe fili au ke u kau atu ʻi ha fakaʻaliʻali ākenga vala ki ha polokalama fakataʻu ʻa e akó. Naʻá ku ʻiloʻi ʻe fili ʻe he kouʻotineitá ha ngaahi kofu naʻe ʻikai taau, ko ia naʻá ku talaange he ʻikai ke u kau ʻo kapau ko e kofu te u tuí ʻoku ʻikai taau. Naʻá ne talamai ʻe sai pē.

ʻI he taimi naʻá ku ʻalu ai mo hoku ngaahi kaungāmeʻá ke vakaiʻi homau kofú, naʻá ku puputuʻu. Neongo e meʻa naʻe talamai ʻe he kouʻotineitá, ka naʻe fehangahangai kotoa ʻa e ʻū kofú mo e tuʻunga ʻo e valá mo e fōtungá ʻi he kiʻi tohi tufa Ki Hono Fakamālohia ʻo e Toʻu Tupú . Koeʻuhí ne hangē naʻe ʻikai ke ʻi ai ha foungá, ne u ʻahiʻahiʻi ai ha taha ʻo e ngaahi kofu taʻetāú. Naʻá ku fie hā fakaʻofoʻofa, ka ʻi heʻeku tui ʻa e kofu ko iá, naʻe ʻikai ke u ongoʻi ʻoku ou saiʻia ai. Naʻá ku fifili, “Te u ongoʻi fēfē nai ʻi heʻeku tui e kofú ni ʻi he ʻao ʻo e ʻEikí?”

Naʻá ku fakakaukau ki he founga te u lava ai ʻo mavahe mei he tūkunga ko ʻení. Faifai, peá u maʻu e kofu hulohula hoku taʻoketé ʻi he akó, ʻa ia naʻe taau mo e tuʻunga moʻui ʻa e ʻEikí. ʻI heʻeku talaange ki hoku ngaahi kaungāmeʻá te u ngāue ʻaki pē ʻeku kofu ʻaʻakú, naʻá ku lava ʻo tala mei honau fōtungá, naʻa nau pehē te u hā fakaʻofoʻofa ange au ʻi ha kofu taʻetaau. Meʻamālié, he naʻe pehē ʻe he kouʻotineitá ʻe sai pē ke u tui ʻa e kofu tāú.

Naʻá ku ongoʻi fiemālie, peá u ongoʻi fiefia. Naʻe ʻikai ke u tokanga pe ko e hā e meʻa ne fakakaukau ki ai hoku ngaahi kaungāmeʻá. Naʻá ku ʻilo ha founga ke kau ai mo ha kofu fakaʻofoʻofa mo taau. Naʻá ku houngaʻia ʻi heʻeku loto-toʻa ke tauhi maʻu ʻeku ngaahi tuʻunga ʻulungāngá, tautefito ki he taimi naʻe ʻikai faingofua pe manakoa aí.

Jessika S., ʻInitonēsia