“Mga Pagpili,” Alang sa Kalig-on sa mga Kabatan-onan, Sept. 2021, 12–14.

Mga Pagpili

Ni Presidente Dallin H. Oaks

Unang Magtatambag sa Unang Kapangulohan

Daghang katuigan ang milabay, usa sa atong mga Kinatibuk-ang Awtoridad mipaambit niining mahagiton nga istorya:

Usa ka maalamon nga Cherokee, usa sa lumad nga mga tribo sa Estados Unidos, misugilon sa iyang apo nga lalaki og sambingay mahitungod sa kinabuhi. “Sulod kanako anaay makalilisang nga panagbugno tali sa duha ka lobo,” miingon ang lolo. “Ang usa dautan: puno sa kasuko ug kasina, pagkalooy sa kaugalingon ug kasubo, kahakog ug pagpamakak. “Ang usa maayo: puno sa kamabination ug kamanggiloy-on, kamapainubsanon ug kamatuoran, gugma ug kamaya. Kana nga panagbugno anaa sa sulod sa matag usa kanato.”

“Asa nga lobo ang magmadaugon?” nangutana ang apo nga lalaki.

“Kadtong imong gipakaon,” ang lolo maalamong mitubag.¹

Kini nga sambingay sa duha ka lobo nagpahayag og mahangturon nga kamatuoran. Ang mga anak sa Dios natawo nga mohimo og mga pagpili tali sa maayo ug sa daotan. Ang oposisyon magtugot kanato nga mohimo og makahuluganon, matarong nga mga pagpili. Ang Basahon ni Mormon nagtudlo niining kamatuoran sa pinulongan sa kasulatan: “Kay kini gikinahanglan gay[o]d, nga adunay katugbang sa tanan nga mga butang.”²

Ang plano sa atong Langitnong Amahan naghatag og labing minus duha ka gasa aron sa pagtabang niini nga mga pagpili: (1) gihatag Niya kanato ang Espiritu Santo aron sa paggiya sa atong mga pagpili, ug (2) gihatag Niya kanato ang usa ka Manluluwas kansang Pag-ula nakapahimong posible sa atong paghinulsol sa pagtangtang sa epekto sa dili maayong mga pagpili—sa dihang ilang gipakaon ang daotan nga lobo.

I. Paghinulsol ug Pag-ila

Samtang ako nakigsulti sa kabatan-onan, usa sa kanunay kaayo nga mga hilisgotan nga ilang gipangutana mao ang mahitungod sa paghinulsol. “Unsaon nimo pagkahibalo nga igo na ang imong paghinulsol?” “Unsaon nimo pagkahibalo kon ikaw tinud-anay nga napasaylo?” Ang tubag niini nga mga pangutana moabot pinaagi sa Espiritu Santo, ang sakop sa Dios nga Kapangulohan kinsa magdala og mga mensahe gikan sa langit.

Ang gasa sa paghinulsol gitawag og “maayong balita sa ebanghelyo.”³ Kini nagtugot kanato sa pagpapas sa epekto sa daotang mga pagpili nga mipakaon sa daotan nga lobo ug mipahuyang sa atong abilidad sa pagpaminaw sa mga pag-aghat sa Espiritu Santo. Ang paghinulsol naglakip sa pag-ila nga kita nakabuhat og sayop, sa pagbiya niana nga sayop, ug sa pagdesisyon nga mopasalig sa Dios ug sa pagtuman sa Iyang mga sugo. Kon kita maghinulsol, kita motawag sa gahom sa Pag-ula ni Jesukristo, nga makadugang sa atong pasalamat ug gugma alang Kaniya isip atong Manluluwas.

Ang panginahanglan sa paghinulsol dili limitado sa seryosong mga sala nga kinahanglang ikumpisal ngadto sa bishop. Ang paghinulsol usa ka inadlaw-adlaw nga panginahanglan. Ang kasagaran nga paghinulsol naglakip sa pribadong pag-ila nga kita nakahimo og sayop, pagdesisyon nga mag-usab, ug sa pagpaningkamot sa paghusto sa mga sayop ngadto sa atong nabuhatan og sayop. Kabahin sa sambingay sa duha ka lobo, ang paghinulsol naglakip sa paghunong og pagpakaon sa daotan nga lobo bisan ginagmay nga pagkaon, sama kon kita mopili nga masuko o masina. Nagkinahanglan usab kita nga maghinulsol (mag-usab) kon kita mipili sa pag-usik sa atong hinatag sa Dios nga panahon diha sa pipila sa daghang anaa nga mga kalihokan nga walay kalagmitan sa paghimo kanato nga mas maayo.

II. Pag-ila sa Importanteng Kalainan

Usa ka maanindot nga resulta sa paghinulsol mao ang pag-establisar og usab sa atong katakos sa pagdawat og mga impresyon gikan sa Espiritu Santo, kinsa motabang kanato sa paghimo og maalamong mga pagpili ug mopuno kanato sa hingpit nga kalipay. Daghang kabatan-onan ang naghunahuna usab: “Unsaon nako sa pagkahibalo kon ang pag-aghat o tubag nga akong makuha gikan ba gayod sa Ginoo ug dili lamang unsay akong gusto?”

Aron sa pag-ila kon ang usa ka pag-aghat usa ka mensahe gikan sa Espiritu Santo o usa lamang ka personal nga tinguha, kinahanglan natong gamiton ang tulo ka kamatuoran.

Sa ordinansa sa sakramento, ang saad nga kita “kanunay makabaton sa iyang Espiritu uban [kanato]” mosunod sa atong saad nga kita modala sa Iyang ngalan ngari kanato, ug sa kanunay mahinumdom Kaniya, ug motuman sa Iyang mga sugo.⁴ Kon kita mapakyas sa pagtuman niini nga mga saad, kita peligro nga malibog sa tinubdan sa mga pag-aghat nga atong gibati.
Ang mga pag-aghat gikan sa Ginoo kasagaran nga madawat sa hilom nga mga higayon o taliwala sa pagsimba, pagtuon sa kasulatan, o pag-ampo o atol sa pagserbisyo sa atong mga calling, dili sa hinakog nga mga tinguha o kon kita gilibotan sa kalibotanong mga kalihokan.
Sa kataposan, kinahanglan nato nga mahimong labaw ka sensitibo sa giya sa pag-usab sa dalan nga gitinguha na nato. Ang usa ka impresyon sa pag-usab og dalan mahimong mas kasaligan kay sa usa ka impresyon nga ipadayon ang butang nga daan na nato nga gustong buhaton.

III. Ang Husto sa Gihapon Maoy Husto

Akong minahal nga batan-ong mga higala, kamo nag-anam og kahingkod sa usa ka kalibotan nga lahi kaayo kay sa nasinati sa inyong mga ginikanan ug mga apohan. Kana naghimong importante kaayo alang kaninyo sa paghinumdom nga ang karaang mga mithi ug mga sugo magamit gihapon ug kinahanglang sundon. Kita mga anak sa Dios, ug ang Iyang mga sugo nagpabilin nga mahinungdanon, bisan kon kita mobiyahe man sakay sa karwahe o spaceship, ug kon kita makigsulti man pinaagi sa tingog o pinaagi sa pag-text.

Ang husto sa gihapon maoy husto, ug ang sayop sa gihapon maoy sayop, bisan unsa pay gisulti o gibuhat sa mga idolo sa sine, sa mga personalidad sa telebisyon, o sa mga bantogan sa mga paugnat og kusog [sports]. Ang mga sumbanan diha sa mga kasulatan, sa mga pagtulun-an sa buhing mga propeta, ug ang mga hiyas diha sa Alang sa Kalig-on sa mga Kabatan-onan nga booklet mao gihapon ang inyong labing maayo nga giya alang sa personal nga mga pagpili sa sekswal nga kaputli, pisikal nga kahimsog, pagkamatinuoron, sinina ug panagway, ug tanan sa ubang mga hilisgotan niini. Sunda kini sa matinud-anong paagi, ug kamo mapanalanginan. “Ang booklet nga giulohan og Alang sa Kalig-on mga sa Kabatan-onan kinahanglan nga maoy inyong sumbanan,” si Presidente Russell M. Nelson mitudlo kanato. “Kini ang sumbanan nga gila[o]man sa Ginoo nga sundon sa tanan Niyang kabatan-onan.”⁵

Sa iyang puno sa gahom nga tibuok kalibotan nga debosyonal sa kabatan-onan, ang atong propeta misaad:

“Kon sinsero ug kanunay kamong mobuhat sa espiritwal nga buhat nga gikinahanglan sa pagpalambo sa importante, espiritwal nga kahanas sa pagkat-on unsaon sa pagkadungog sa mga paghunghong sa Espiritu Santo, makadawat kamo sa tanang direksyon nga gikinahanglan ninyo sa inyong kinabuhi. Hatagan kamo og mga tubag sa inyong mga pangutana sumala sa kaugalingong paagi sa Ginoo ug sa Iyang kaugalingong panahon.”⁶

Iapil nako ang akong saad ngadto sa iyaha, samtang ako mopamatuod sa atong Manluluwas nga si Jesukristo, kansang mga pagtulun-an ug Pag-ula naghimo niining tanan nga posible, sa ngalan ni Jesukristo, amen.