“Usa ka Sumbanan alang sa Imong Kinabuhi,” Alang sa Kalig-on sa mga Kabatan-onan, Okt. 2021.
Usa ka Sumbanan alang sa Imong Kinabuhi
Tugoti nga ang tema sa Young Women mahimong usa ka giya ug kompas alang sa tibuok nimong kinabuhi.
Ang tema sa Young Women usa ka pahinumdom sa imong pagkatawo ug katuyoan. Adunay hilabihan nga kalig-on nga moabot kon ang mga pulong sama sa “hinigugmang anak nga babaye,” “disipulo ni Jesukristo,” ug “saksi sa Dios” ang mopaila kon kinsa gayod kita. Kini nga hugpong sa mga pulong mopuno kanato sa gugma ug mohatag kanato og pagsalig sa atong abilidad sa pag-atubang sa mga hagit ug pagkaplag og kalipay. Sa samang paagi, ang mga saad sa “mahangturong padulngan,” “personal nga pagpadayag,” ug “kahimayaan” nagpahinumdom kanato nga ang atong kinabuhi adunay kahulogan ug katuyoan lapas pa sa usa ka lisod nga mga panahon. Kon imong i-recite kini nga tema, imong gipamahayag ang unsay kahulogan nga mamahimong usa ka anak nga babaye sa langitnong ginikanan, nag-andam sa imong kaugalingon ug sa kalibotan alang sa pagbalik sa atong Manluluwas, nga si Jesukristo.
Dinhi ang pipila ka batan-ong babaye gikan sa tibuok kalibotan mopaambit kon unsa ang kahulogan sa tema ngadto kanila.
“Ganahan ko sa paagi nga gisugdan ang pamahayag og ‘ako’ Kini nga mga pulong nagpahinumdom kanako nga ang akong pagpamatuod mao ang akong pagpamatuod ug nga kinahanglan nga ako gayod ang mas maningkamot sa pagtrabaho aron mamahimong sama sa Manluluwas.”
Caroline F., 15, Virginia, USA
“Usa ka butang nga gitudlo sa tema kanato nga klaro kaayo mao ang kon unsa kadako ang gugma sa langitnong ginikanan ngari kanato. Ang atong Langitnong Amahan mipadala kanato dinhi sa yuta apan wala kita biyai nga mag-inusara. Matag usa kanato adunay maanindot nga potensyal, ug tungod kay ang Dios nahigugma kanato pag-ayo, mihimo Siya og usa ka plano aron atong makab-ot kana nga potensyal. Makahupay gayod ang pagkasayod nga bisan sa labing lisod nga mga panahon kita adunay langitnong mga ginikanan nga nag abiba kanato.”
Rebecca S., 16, ug si Megan S., 14, Texas, USA
“Ang tema sa Young Women espesyal gayod kanako tungod kay kini nagpahinumdom kanako nga sa kanunay mamahimong usa ka misyonaryo bisan asa ko ug bisan asa ko moadto: sa eskwelahan o sa simbahan o sa panimalay.”
Quincy E, Connecticut, USA
“Ang tema nagpahinumdom kanako nga kinahanglan kong mangita og mga oportunidad nga mahimong mas maayo nga tawo. Usahay mobati ko og kasagmuyo kon ako dili makahimo sa pagbuhat og butang nga akong nahibaloan nga angay nakong buhaton. Apan kon ako masayop, nasayod ko nga ako makabaton usab og oportunidad nga mahimong mas maayo. Ang gasa sa paghinulsol, tingali mao, ang labing maayong butang sa kalibotan.”
Anastasiya S., 12, Moscow, Russia
“Ang pagkamiyembro sa Simbahan niining pangidarona lisod. Kita usahay mahadlok nga mabalingan sa pagtagad ug ingnon nga kita lahi. Apan ang tema nagpahinumdom kanako nga ako maningkamot nga mahisama ni Jesukristo. Ang tema makatabang nako nga kalimtan ang unsay isulti sa uban ug magpabilin nga nakatutok sa unsa gayod ang akong gusto.”
Zoe V., 16, Argentina
“Ang kapahayag [sentence] nga ‘Samtang ako naningkamot nga mahimong takos sa kahimayaan, akong hatagan og bili ang gasa sa paghinulsol ug magtinguha sa pagpalambo sa matag adlaw’ magpahinumdom kanako nga ang paghinulsol dili usa ka butang nga negatibo. Mao kini ang maanindot nga oportunidad sa pagbag-o sa atong kaugalingon ug mopahiuyon sa Dios. Ako mapasalamaton kaayo alang sa kalinaw ug kalipay nga mahatag sa paghinulsol!”
Hailey, S. 17, Arizona, USA
“Ang pagsunod sa tema nakatabang kanako nga mahimo ang labing nindot nga bersyon sa akong kaugalingon.”
Eav N., 11, Utah, USA
“Ang tema naghatag kanako og kahibalo nga ako anak sa langitnong mga ginikanan. Ang pagkahibalo niini makatabang kanako nga dili na mobati nga nag-inusara sa panahon sa kasamok. Kon naglisod ko sa pagkab-ot sa akong mga tumong, akong hunahunaon ang akong balaan nga kinaiyahan ug mahangturon nga padulngan. Kini nagdasig kanako nga mahimong lig-on ug dili moundang.”
Liza B., 12, Kyiv, Ukraine
“Ang tema sa Young Women espesyal kanako tungod kay nakatabang kini kanako nga masabtan ang akong importansiya isip usa ka batan-ong babaye ug anak nga babaye sa Dios. Akong hatagan og bili ang matag linya niini. Nagsulti kini sa mga butang nga kinahanglan nakong buhaton aron mas maduol ngadto Kaniya. Makatabang kini nako sa pagkaplag sa akong katuyoan sa kinabuhi.”
Sariah D., 14, St. Catherine, Jamaica