“Pagpangandam alang sa Imong Pagtuga,” Alang sa Kalig-on sa mga Kabatan-onan, Okt. 2021.
Pagpangandam alang sa Imong Pagtuga
Mga young adult mipaambit sa ilang mga kasinatian kon giunsa nila sa pagpangandam ug midawat sa ilang pagtuga sa templo.
Ang pag-adto sa templo aron madawat ang inyong endowment usa ka bag-ong kasinatian alang sa tanan. Kon wala kamo masayod unsa ang mapaabot, natural ra nga makuryoso o gani makulbaan gamay. Kon mas mangandam kita sa atong kaugalingon, mas mabati nato ang Espiritu Santo samtang kita makasinati niining sagradong ordinansa sa templo alang sa unang higayon—ug sa matag higayon human niana.
Kon ikaw wala pa nakadawat sa imong pagtuga, tingali aduna kay mga pangutana—ug OK ra nga ipangutana kini! Ang nindot nga mga balita mao nga kamo makakat-on og daghang tubag sa dili pa kamo moadto. (Ang uban kinahanglan pa nga maghulat hangtod nga kamo maanaa sa templo, ug ang uban padayon ninyong kat-onan sa tibuok kinabuhi nga pagtambong sa templo.)
Mihangyo kami sa mga young adult sa tibuok kalibotan sa pagtubag sa mga pangutana nga tingali makulbaan kamo nga mangutana—ug ang uban tingali wala ninyo mahunahunai!
Unsay imong gibati sa dihang miadto ka sa templo aron modawat sa imong pagtuga? Unsa ang imong bation kon moadto ka karon?
Para nako, lisod ang pag-ila sa Espiritu tungod kay nakatutok kaayo ko sa tanang butang nga nahitabo. Apan sa matag higayon nga moadto ko sa templo sukad niana, nahimo kong mas komportable sa seremonya, ug akong nakat-onan ang mahitungod sa simbolismo ug kaimportante sa mga pakigsaad.
Johanna A., 21, Austria
Nasurprisa ko kon sa unsa diay ka komportable ang pagtuga. Adunay mga bahin sa sesyon sa pagtuga nga lahi kay sa paagi sa atong pagsimba diha sa Simbahan, apan tanan niini adunay kahulogan. Karon, gibati nako nga dali nang makatutok sa Espiritu. Hilom ug walay makabalda didto, mao nga makagahin ko og panahon uban sa Dios.
Luke E., 21, Alberta, Canada
Luke E.: Provo City Center Temple
Mga paghulagway pinaagi ni Kahee Shin
Unsay nakatabang nimo nga mobati nga andam sa pagdawat sa imong pagtuga?
Unsay nakatabang nako nga mas makasabot sa templo mao ang pagbalik og usab ngadto sa templo. Kon makahimo ka, pagdala og mga tawo nga imong masaligan ug gihigugma. Kon kamo anaa na sa lawak sa celestial human sa sesyon, makapanglingkod kamo uban nila ug maghisgot mahitungod sa mga pangutana sa balaang paagi ug sa mga butang nga inyong nakat-onan.
Hannah S., 21, Alberta, Canada
Hannah S.: Cardston Alberta Temple
Gitan-aw nako ang tanan nga mga video ug mga pamphlet kabahin sa templo diha sa website sa Simbahan. Adunay mga video kabahin sa sinina nga isul-ob diha sa templo, mga garment, ug unsa ang pagtuga ug unsay hitsura sa mga celestial nga lawak. Ang Preparing to Enter the Holy Temple nga pamphlet nakatabang usab nako nga mobati nga mas andam na.
Johanna A., 21, Austria
Johanna A.: Freiberg Germany Temple
Kanunay kong ganahan sa 2 Nephi 2 kon kabahin na sa pagsabot sa mga ordinansa sa templo. Naghatag kini og katin-awan sa mga bahin sa plano sa kaluwasan nga wala gayod nako masabti kaniadto.
Zachary M., 21, Alberta, Canada
Zachary M.: Los Angeles California Temple
Unsa pa kaha ang nakatabang nimo nga makabaton og mas nindot nga unang kasinatian?
Wala ko masayod nga makakat-on ko og daghan kaayo diha sa pagtuga! Unta nakapangandam pa ko og dugang alang sa kasinatian sa pagkat-on pinaagi sa pagsulay sa pagkat-on og dugang pa mahitungod sa mga simbolismo diha sa mga ordinansa nga pamilyar na ko.
Luke E., 21, Alberta, Canada
Unta nahibaloan nako nga dunay piho nga mga tawo sa sulod sa templo nga makatabang nako alang sa akong unang sesyon sa pagtuga. Nindot kaayo sila! Mihatag sila nako og name tag nga gibutang sa akong polo aron ang tanan makakita nga mao kadto ang akong unang higayon, ug ang mga tawo mipabati nako og dugang paghangop sa dihang ilang nakita kana nga name tag. Ang masayod niini og mas sayo nakatabang unta nako nga mas kalma.
Anna G., 24, Île-de-France, France
Anna G.: London England Temple
Unsay imong isulti ngadto sa usa ka tawo kinsa nabalaka mahitungod sa pag-adto sa templo aron modawat sa ilang pagtuga?
Ang balay sa Ginoo usa ka maanindot nga dapit. Napanalanginan kaayo ko, ug ganahan ko nga ang tanang sakop sa akong pamilya mahimong kabahin niining talagsaong panalangin.
Vida G., 29, Greater Accra, Ghana
Vida G.: Accra Ghana Temple
Ako moawhag nila sa pagtuon sa mga pakigpulong sa komperensiya ug sa mga kasulatan mahitungod sa templo, mangutana, ug mopahayag mahitungod sa ilang mga kabalaka. Ang video sa open house sa Rome Italy Temple nakapatin-aw usab og daghan alang kanako. Gitan-aw nako kini human ko nakadawat sa akong pagtuga.
Johanna A., 21, Austria
Andama ang imong kaugalingon sa espirituhanong paagi sa dili ka pa moadto sa templo. Nag-ampo ko aron makadawat og pagpadayag atol sa pagtuga, aron mabuksan ang akong hunahuna, ug aron makakita gamit ang espirituwal nga mga mata. Nasayod ako nga andam na ko sa dihang gusto na ko nga moadto sa templo aron mas mapaduol sa Langitnong Amahan, ug dili lang tungod kay nakuryoso.
Anna G., 24, Île-de-France, France
Unsa ang nakapadugang sa imong pagsabot mahitungod sa pagtuga?
Ang pagbisita sa templo kanunay kutob sa akong mahimo nakatabang kanako nga mas makasabot niini. Matag higayon nga mobiya na ako sa templo, mogahin ko og panahon sa pagpamalandong ug pag-ampo mahitungod sa bag-ong mga butang nga akong nakat-onan atol niana nga sesyon.
Michelle L., 24, Ecuador
Michelle L.: Guayaquil Ecuador Temple
Ang paghinumdom nga ang tanan diha sa seremonya sa templo nagpasabot ngadto ni Kristo nakatabang kanako nga mas makasabot sa pagtuga. Sukad nga akong nadawat ang akong kaugalingong endowment, nagbasa ko og mga pakigpulong, nagtuon sa mga kasulatan, ug nangutana og daghang pangutana.
Johanna A., 21, Austria
Ang Templo Mahitungod sa mga Kalinaw
Ang templo mao ang balay sa Dios, ug Siya malipay nga anaa ka didto. Tingali ikaw adunay mga pangutana bisan human sa paghimo og pipila ka sesyon sa pagtuga, ug OK ra kana! Ang importanting butang mao ang pagpadayon sa pag-adto sa templo nga bukas ang hunahuna, mapaubsanon ang espiritu, ug kaandam sa pagkat-on og bag-ong butang.