“Ang Inyong Bandila sa Kalingkawasan,” Alang sa Kalig-on sa mga Kabatan-onan, Okt. 2021.
Ang Inyong Bandila sa Kalingkawasan
Ang dinasig nga mga pulong sa bag-ong Tema sa Korum sa Aaronic nga Pagkapari makapalig-on kaninyo sa mahagiton nga kalibotan.
Sa panahon sa gubat ug mga panagbingkil, ang karaang propeta nga si Kapitan Moroni mipataas sa bandila sa kalingkawasan ug mitawag sa iyang kauban nga mga Nephite sa pagpanalipod sa ilang relihiyon, kagawasan, kalinaw, ug mga pamilya (tan-awa sa Alma 46:12). Ang bandila sa kalingkawasan mipahinumdom sa katawhan sa ilang mga katungdanan ngadto sa Dios ug niadtong mga butang nga angay nga pakigbisogan.
Sama sa panahon ni Moroni, daghang mga tawo ang mipalayo gikan sa mga pagtulon-an ni Jesukristo. Aron matabangan ang mga batan-ong lalaki sa pagbarog nga lig-on sama ni Moroni, ang mga lider sa Simbahan nagmugna og tema, usa ka modernong bandila sa kalingkawasan, sa pagtabang kaninyo mga batan-ong lalaki nga moatubang sa mga hagit karon.
Samtang kamo magkat-on ug magsunod sa mga pulong sa Tema sa Korum sa Aaronic nga Pagkapari, kamo makabarog nga lig-on ug mahiusa sa ubang mga batan-ong lalaki sa tibuok kalibotan aron sa pagpanalipod sa kamatuoran. Basaha kon sa unsang paagi nga ang Tema sa Korum sa Aaronic nga Pagkapari nakadasig sa uban aron mahimong mas maayo nga mga anak nga lalaki sa Dios samtang sila maningkamot sa pag-andam sa kalibotan alang sa pagbalik sa Manluluwas dinhi sa yuta.
“Ang bag-ong Tema sa Korum sa Aaronic nga Pagkapari makatabang kanako sa paghinumdom kon kinsa ko ug kon kinsa ko kinahanglang mamahimo aron makauban ni Kristo. Nagpahinumdom kini kanako nga ako usa ka hinigugmang anak nga lalaki sa Langitnong Amahan ug nga ako kinahanglan gayod nga moserbisyo uban sa hingpit nga kakugi ug motrabaho pag-ayo sa pagpanalangin sa akong kaugalingon ug niadtong mga nagpalibot kanako. Naglaom siya sa akong labing maayo, ug mohatag niini. Naglaom siya nga ako motabang sa pag-andam sa kalibotan alang sa pagbalik sa Manluluwas pinaagi sa pagpagsangyaw sa ebanghelyo bisan asa.”
Anderson E., 14, Brazil
“Naghimo ko og tumong aron sugdan sa pagsag-ulo ang tema aron nga kini dili basta lang usa ka butang nga basahon inig ka Dominggo. Gusto ko nga kini mahimong usa ka butang nga anaa sa akong kasingkasing aron mahimo kining kabahin sa akong kinabuhi.”
Andrew, 17, Utah, USA
“Ganahan kaayo ko sa tema. Ang pagsulti sa mga butang sama sa ‘Ako mangandam sa pagserbisyo og misyon’ ug ‘pagkahimong usa ka maayong bana’ nag-awhag sa tanan, bisan sa mga wala magbuhat niini, aron mahimo nga maayong mga misyonaryo ug maayong mga bana. Nakatabang kini kanako sa akong inadlaw-adlaw nga pagsulay nga mamahimo nga mas maayo ug mas mapasaligon nga tawo nganha sa ebanghelyo ni Jesukristo.”
Ricardo P., 15, Brazil
“Ganahan ko sa gihatag nga gibug-aton sa Tema sa Korum sa Aaronic nga Pagkapari diha sa panimalay ug sa kaimportante sa pagserbisyo diha sa panimalay. Kini nakatabang sa pagpahinumdom kanako nga usa sa labing importante nga mga dapit sa pagserbisyo mao ang akong panimalay ug ang akong pamilya.”
Mitchell B., 16, Australia
‘“Ako hinigugmang anak nga lalaki sa Dios, ug Siya adunay ipabuhat kanako.’ Kanunay gayod nga ato lang ibaliwala ang mga pamahayag, apan sa dihang nag-ampo ko panahon sa kalisod, nabati nako ang presensiya sa Dios nga naghupay kanako ug ang Iyang gugma sa akong kasingkasing. Kon ako makahimo og kasaypanan ug matipas, ang Dios motuyhad sa Iyang mga kamot ug motawag kanako sa pagpabalik. Ako Iyang anak, ug gusto Niya ang labing maayo alang kanako. Adunay usa ka buhat nga kinahanglan Niyang ipabuhat kanako.”
Eli S., 18, New Jersey, USA
“Ang bag-ong tema nakatabang kanako sa pagpamalandong sa mga butang nga akong mahimo diha sa buhat sa Ginoo. Nagtudlo kini kanako nga ang gagmay nga mga butang nga gikinahanglan ug mahinungdanon usab.”
Mateus S., 14, Brazil