“Lahi kay sa Uban Didto sa Ireland,” Alang sa Kalig-on sa mga Kabatan-onan, Okt. 2021.
Lahi kay sa Uban Didto sa Ireland
Si Evan K. mao lamang ang batan-ong lalaki nga miyembro sa Simbahan sa iyang eskwelahan—apan wala gayod siya mag-inusara.
Mga litrato pinaagi ni Ashley-Ann K.
Nakadungog na ba sa panultihon nga “Ang sagbot sa pikas habig sa koral kanunayng mas berde”? Ang kinse anyos nga si Evan K. sa Ireland tingali dili makaingon niana bisan kanus-a. “Ang among sagbot berde kaayo!” miingon siya.
Adunay usa ka maayong rason nga ang Ireland gianggaan isip “Ang Esmeralda nga Isla.”
“Maanindot kaayo dinhi,” miingon si Evan. Natagbaw gayod siya sa katahom, kasagaran samtang magsakay sa bisikleta. “Ganahan kong magbisikleta sa pipila sa daghang hilom nga mga karsada sa among palibot.”
Ang esmeralda nga berdeng sagbot ug ang ubang natural nga katahom nagpalibot niini. Unsay nagkulang, hinoon, mao ang ubang mga miyembro sa Ang Simbahan ni Jesukristo sa mga Santos sa Ulahing mga Adlaw nga iyang kaedad. Si Evan ug ang iyang manghod nga mga babaye mao lang ang miyembro sa Simbahan sa ilang eskwelahan.
Ang Bugtong Tawo nga Nalahi
Sa Ireland, kadaghanan sa mga eskwelahan mga relihiyosong eskwelahan. Si Evan ug ang iyang mga igsoong babaye nagtambongan sa lokal nga eskwelahan sa Katoliko kauban ang ubang mga batan-on kinsa nagpuyo sa ilang bahin sa Ireland.
Kon kabahin na sa mga pagpili sa estilo sa kinabuhi, adunay pipila ka butang nga si Evan lahi kay sa uban. “Lisod usahay tungod kay ang tanan mamalikas,” miingon siya. Ang pagpamalikas komon didto, mipasabot si Evan. Apan adunay usa ka bahin sa kultura nga Irish nga gisulti ni Evan nga mahimong mas dako pa nga hagit.
“Ang mga batan-ong lalaki gusto nga magpundok ug manggawas aron mag-inom,” mipasabot siya. “Sa kanunay ako lang ang nalahi.”
Naghisgot siya mahitungod sa mga higala sa eskwelahan nga iyang kaedad. Ang pag-inom og ilimnong makahubog sa batan-ong edad komon sa gipuy-an ni Evan. Kining mga sosyal nga kalingawan sagad kaayo nga mahitabo nga miingon si Evan nga usahay naghunahuna siya nga mokuyog aron dili siya kanunay nga walay labot. Apan sa matag higayon, magpabilin ra siya sa panimalay.
“Naghunahuna ko, ‘Unsa kaha ang mahitabo kon mokuyog ko nila?’” miingon siya. “Nasayod ko nga kon mopili ko nga dili mouban, mapanalanginan ko tungod niini. Ang mga panalangin sa pagsunod sa mga sugo mas labaw pa kaayo kay sa kasakit nga mahimong mao lang ang nalahi.”
Si Evan nagsalig sa Espiritu Santo sa pagtabang kaniya pinaagi sa inadlaw-adlaw nga pagpili. Agig dugang, aduna usab siyay kakuhaan nga ubang mga tinubdan sa kalig-on.
Ang iyang mga higala nga Irish diha sa Simbahan dali rang mapadalhan og text.
Mga Higala sa Online ug Inadlaw-adlaw nga Kalig-on
Kon asa nagpuyo si Evan, tungod kay ang kabatan-onan sa Simbahan nagkatag sa lagyong dapit, nagbuhat sila og daghang panagtigom nga virtual. Alang sa usa ka butang, magkatigom sila diha sa online nga seminary.
“Ang sinemana nga seminary maayo kaayo miingon si Evan. “Dili lang kami magkat-on mahitungod ni Kristo ug sa ebanghelyo samtang naghimo sa seminary, apan pagkahuman ang magtutudlo ipabilin nga bukas ang Zoom alang kanamo.”
Nianang bukas nga tawag, maglingaw-lingaw sila, magpasiaway, magdula, ug basta maghigalaay lang sa usag usa kinsa adunay samang mithi. Alang ni Evan, ang pipila sa iyang suod nga mga higala namugna pinaagi niining panagkita sa Simbahan.
Usa sa mga koneksyon mao ang iyang buotan nga higala si Rob. “Daghan kami og makit-ang susama nga mga butang nga kataw-anan miingon si Evan. “Si Rob makakita og butang nga kataw-anan sa social media nga kahibalo siya nga akong magustohan, ug iyang ipadala nako. Dayon magbawsanay kami sa pagpadala og text. Mga pipila ka oras ang molabay, makakita ko og butang nga kataw-anan ug ipadala kini ngadto kaniya.”
Normal ra nang butanga, di ba? Apan kining ginagmay nga inter-aksyon dako na nga tabang sa tibuok semana. “Nindot kini kaayo tungod kay magkinataw-anay kami sa usag usa, apan dili kinahanglan nga adunay bisan unsang pagpamalikas o bisan unsa pang butang.” Maka-text usab sila sa usag usa bisan unsang orasa nga magkinahanglan lang sila og dugang kalig-on sa ebanghelyo.
Usa ka Irish nga Panagpundok
Bisan tuod og ang batan-ong mga Santos sa Ulahing mga Adlaw lagyo, maningkamot gihapon sila sa pagpundok sa pisikal nga paagi sa tibuok tuig—usahay lakip ang kabatan-onan sa tibuok nasod.
Kini nga mga kalihokan naglakip sa tanang butang gikan sa mga proyekto sa pagserbisyo sa pag-abang og mga paburoton nga isul-ob sa sumo wrestling. “Makalingaw kaayo sila!” Miingon si Evan.
Panagsa sa kataposan sa mga kalihokan adunay mahimong disco (panagsayaw). Lahi kaayo kini sa mga disco sa eskwelahan ug komunidad nga mahitabo sa duol. Pananglitan, sa disco sa komunidad, kon ang usa ka batan-ong lalaki mohangyo sa usa babaye nga makigsayaw kaniya, sama ra kini sa paghangyo sa babaye og usa ka pakigdeyt—o gani mahimong niyang hinigugma. Usab, tipik lang kini sa kutura didto.
Lahi ang mga disco sa Simbahan, hinoon. Didto, miingon si Evan, “makahangyo mi sa usa ka tawo sa pagsayaw ug dili sila maghunauna nga naghangyo mi nila nga mabutang sa seryoso nga pagkigrelasyon uban namo. Mas maayo kaayo kini.”
Kini nga mga panagpundok uban sa laing kabatan-onan sa Simbahan didto sa Ireland adunay malungtaron nga epekto sa tibuok tuig. Gipadayon nila ang ilang panaghigalaay pinaagi sa pagdula og mga online game, pag-text ug pakig-istoryahanay diha sa telepono, ug pagsuporta sa usag usa hangtod nga sila magkapundok pag-usab.
Ganahan si Evan nga mogahin og panahon uban sa iyang pamilya, lakip ang pagdungan sa pagbisikleta ug pagpanganta og mga himno diha sa panimalay.
Pagtubo ug Kahayag sa Ebanghelyo
Adunay gamayng tambag si Evan alang sa ubang mga batan-on nga anaa sa sitwasyon nga sama sa iyaha. “Kon imong bation nga ikaw lang ang batan-on nga miyembro sa Simbahan diha sa imong eskwelahan, ayaw usba ang imong mga sumbahan aron sa paningkamot nga mohaom. Kon ikaw mamalikas, moinom, o manigarilyo aron mohaom, daghan ang mawala kanimo. Ang mga panalangin mas maayo kaayo kay sa katagbawan sa pagpaningkamot aron mohaom!”
Ug kon ugaling kamo nabalaka nga si Evan nag-inusara sa eskwelahan tungod kay siya mipili nga magpakabuhi nga lahi, dili kana tinuod. Siya miingon nga ang mga tawo nahibalo sa iyang mga gituohan ug morespeto kaniya bisan og siya gikan sa lahi nga relihiyon. “Akong gidawat ang ilang mga gituohan ug ilang gidawat ang akong mga gituohan,” mipasabot siya. “Ako talagsaon nga higala sa tanan diha sa akong eskwelahan.”
Sa kataposan, mahimong wala mapaliboti si Evan sa mga kabatan-onan sa Simbahan matag adlaw, apan siya mipadan-ag sa iyang kahayag sa ebanghelyo sa tanan nga managsama. Gawas pa, kinsay nasayod kon pila ka binhi sa ebanghelyo ang iyang natisok pinaagi lang sa pagpakita og maayong ehemplo? Total, ang mga panghitabo maayo didto sa Ireland!