“Unsaon sa Pagpangita og Tabang sa Inyong Kinalisoran nga mga Pagsulay,” Alang sa Kalig-on sa mga Kabatan-onan, Okt. 2021.
Dali, Sunod Kanako
Unsaon sa Pagpangita og Tabang sa Inyong Kinalisoran nga mga Pagsulay
Doktrina ug mga Pakigsaad 121–122
Bisan atol sa usa sa labing miserable nga mga kasinatian sa iyang kinabuhi, si Propeta Joseph Smith nakakaplag og paglaom, tabang, ug pagkaayo.
“O Dios, hain ba ikaw?”
Tingali lisod gayod kaayo ang kahimtang nga makapangutana og desperado nga pangutana sama niana. Alang kang Propeta Joseph Smith, kinsa nag-antos didto sa Bilanggoan sa Liberty sa Missouri, USA, lisod gayod kaayo ang kahimtang.
Tuig kadto sa 1839. Si Joseph ug ang iyang mga higala nabilanggo—sa bakak nga mga pasangil—sa sobra sa upat ka bulan. Kadto mao ang kinagrabehan nga tingtugnaw nga natala, ug sila hapit walay bisan unsa nga butang aron magpabiling init. Ang iyang pamilya, iyang mga higala, ug ang uban pa sa Simbahan giabog gikan sa distrito pinaagi sa bayolente nga mga manggugubot nga panon. Si Joseph adunay gamay ra kaayo nga kontak kanila. Kadto mao ang usa sa labing lisod nga mga panahon sa kinabuhi ni Joseph.
Usa ka Kahayag diha sa Kangitngit
Sa usa ka punto, nangutana si Joseph sa kahiladman niining ngitngit nga bilanggoan, “O Dios, hain ba ikaw? Ug hain ang imong gambalay nga nagsalipod sa imong tagoanan? Hangt[o]d kanus-a ikaw mogamit sa imong kamot, ug sa imong mata, oo sa imong matin-aw nga mata, tan-awa gikan sa mahangt[o]ron nga mga langit ang mga sayop sa imong mga katawhan ug sa imong mga sulugoon, ug ang imong dunggan napuno sa ilang mga pagtuaw?” (Doktrina ug mga Pakigsaad 121:1–2).
Bisan sa kinabuhi nga puno sa mga pagsulay, adunay butang mahitungod sa Bilanggoan sa Liberty nga daw mas nakapahuyang ni Joseph Smith kay sa bisan unsa pa nga kalisod.
Apan, atol gayod sa kinalisoran niini, usa ka silaw sa paglaom ang midan-ag diha nianang bugnaw nga bilanggoan. Si Joseph ug ang ubang mga binilanggo nakadawat og pipila ka wala damha nga mga sulat gikan sa mga higala ug pamilya—ug ang kangitngit sa kasinatian mikunhod.
Ang Gahom sa Panaghigalaay
Mahitungod niana nga okasyon, si Joseph Smith miingon, “Nakadawat kami og pipila ka sulat sa miaging gabii … ang tanan niini adunay mabination ug makahupay nga mga pulong. … Sa dihang gibasa namo kadto nga mga sulat kini nakapapiskay sa among mga kalag sama sa presko nga hangin.”1
Niadtong Marso 7, 1839, si Emma Smith misulat sa iyang bana, si Joseph, kinsa nabilanggo sa Bilanggoan sa Liberty.
Siyempre, kadto nga mga sulat wala mihimo sa bilanggoan nga mas mainiton. Kini wala mihimo sa mga guwardiya nga mas mabination, ni sa pagkaon nga mas lami. Apan ang mga sulat adunay dakong epekto kalabot sa unsay gibati sa mga binilanggo. Kana nga yano nga pagpakita sa suporta gikan sa mga higala ug pamilya nakatabang nga mausab ang kinaiya ni Joseph gikan sa paghunahuna kon hain ang Dios, ngadto sa pagkadungog sa makapahupay nga mga pulong sa Manluluwas, “Akong anak, kalinaw nganha sa imong kalag” (Doktrina ug mga Pakigsaad 121:1, 7).
Si Joseph Smith mitanyag niini nga panglantaw: “Niadtong kinsa wala pa masulod nga walay hinungdan o rason diha sa mga bungbong sa usa ka bilanggoan adunay gamay lamang nga ideya kon unsa ka nindot ang tingog sa usa ka higala. Ang usa ka timaan sa panaghigala gikan sa bisan unsang tinubdan makapapukaw ug makapalihok sa matag maluluy-on nga pagbati.”2
Lagmit nakaila gayod kamo og tawo nga naglisod. Tingali naghunahuna kamo nga wala kamoy bisan unsa nga mabuhat aron sa pagtabang, apan ang kasinatian ni Joseph sa Bilanggoan sa Liberty nagtudlo kanato sa lahi nga paagi. Ang inyong mga pulong mahimong adunay sama nga epekto diha niadtong inyong gimahal sama sa nabuhat sa mga sulat alang kang Joseph. Makapadala kamo og sulat o text, motawag sa telepono, o mobisita og kadiyot.
Kinsa ang nagkinahanglan sa inyong pangamosta karon? Isulat ang pipila ka ideya sa unsay inyong masulti:
Dali ra Maangkon ang Pagpadayag
Lain nga kamatuoran nga atong makat-onan gikan sa Bilanggoan sa Liberty mao nga, sama ni Joseph, makadawat gihapon kamo og kahupayan ug pagpadayag gikan sa Langitnong Amahan ug sa Manluluwas bisan kon nagsinati kamo og grabeng kalisod.
Si Elder Jeffrey R. Holland sa Korum sa Napulog Duha ka Apostoles sa makausa namulong kabahin sa Bilanggoan sa Liberty ug mitudlo: “Kon gikinahanglan ninyo, mahimo kamong makabaton og sagrado, mapadayagon, tiunay nga matulon-anong kasinatian uban sa Ginoo sa bisan unsang sitwasyon nga anaa kamo. Sa pagkatinuod, tugoti ko sa pagsulti niini sa mas kusganong paagi: Mahimo kamong makabaton og sagrado, mapadayagon, tiunay nga matulon-anong kasinatian uban sa Ginoo diha sa labing pait nga mga kasinatian sa inyong kinabuhi—diha sa labing grabe nga mga sitwasyon, samtang nag-antos sa labing sakit nga mga inhustisya, samtang nag-atubang sa labing lisod nga mga problema ug oposisyon nga inyong naatubang sukad.”3
Kon nakasinati kamo og kalisod nga makapahimo ninyong mas maayo nga tawo, o naggahin sa inyong kagabhion diha sa usa ka matang nga daw sama sa Bilanggoan sa Liberty, tingali matintal kamo sa paghunahuna nga ang Dios layo gikan kaninyo. Apan mao kadto ang mga higayon nga Siya mahimong mas duol gayod!
Kitang Tanan Nakasinati Niini
Sama sa gipakita sa panahon ni Joseph Smith sa Bilanggoan sa Liberty, ang mga pagsulay moabot kanatong tanan bisan kon kita nagsunod ni Jesukristo.
Lain nga pagpadayag diha sa Bilanggoan sa Liberty mipahinumdom ni Joseph Smith nga siya dili ang unang tawo nga grabeng nag-antos. Ang Ginoo, human nga naghulagway sa tanang matang sa pag-antos, miingon: “Ang Anak sa Tawo mikunsad ubos kanilang tanan. Labaw pa ba ikaw kay kaniya?” (Doktrina ug mga Pakigsaad 122:8).
Ang mga pagsulay moabot sa matag usa kanato. Apan tungod kay ang Manluluwas nag-antos alang sa atong mga sala ug mga kasakit, kita makaangkon og kahupayan sa pagkasayod nga Siya makatabang kanato latas sa atong pag-antos. Ang Ginoo misulti kang Joseph, “Ayaw kahadlok unsa ang mahimo sa tawo, kay ang Dios mouban kanimo hangt[o]d sa kahangt[o]ran” (Doktrina ug mga Pakigsaad 122:9). Ang panabang sa langit kanunay nga anaa alang sa matag usa kanato.
Sa unsang paagi nga ang Langitnong Amahan ug si Jesukristo mitabang kaninyo sa inyong mga pagsulay? Pagsulat mahitungod sa pipila ka kasinatian:
Gilunsay ug mas Lig-on
Si Propeta Joseph Smith wala nahimuot sa iyang mga kasinatian diha sa Bilanggoan sa Liberty. Apan milambo siya pinaagi niadto nga mga kasinatian. Ug ang mga leksiyon nga iyang nakat-onan ug ang mga pagpadayag nga iyang nadawat nakapadasig sa matag usa kanato latas sa atong mga pagsulay.
Si Elder Gary E. Stevenson sa Korum sa Napulog Duha ka Apostoles mitudlo: “Ako nagtuo nga usa ka adlaw niana, matag usa kaninyo mohinumdom sa gi-kanselar nga mga hitabo, sa kaguol, sa mga kasagmuyo, ug sa pag-inusara nga kauban sa mahagitong mga panahon nga kita nagsinati nga nagtan-aw niini nga gipand[o]ngan og mga pinili nga mga panalangin ug nagtubo nga hugot nga pagtuo ug mga pagpamatuod. Nagtuo ako nga niini nga kinabuhi, ug sa umaab[o]t nga kinabuhi, ang inyong mga kasakit, … ang inyong Bilanggoan sa Liberty, ihalad alang sa inyong kaayohan. Nag-ampo ako nga, uban ni Nephi, kita makadawat sa mga kasakit sa atong kinabuhi samtang sa samang higayon makahibalo nga kita pinangga sa Ginoo.”4
Kon kamo anaa karon sa tunga-tunga sa inyong kaugalingong mga pagsulay sa hilabihang kasakit, palihog hibaloi nga, uban sa tabang sa Dios, human niini nga mga pagsulay kamo mahimong mas lig-on ug mas balaan.