Ang Gahom sa usa ka Ngalan

Ni Elder Ulisses Soares

Sa Korum sa Napulog Duha ka Apostoles

Importante ang mga ngalan—ilabi na kon kini adunay kalabotan sa ngalan sa gipahiuli nga Simbahan ni Jesukristo.

Nakahunahuna ba kamo kon unsa ka importante ang usa ka ngalan? Hunahunaa ang inyong kaugalingong ngalan nga gihatag kaninyo sa dihang natawo kamo—usa ka ngalan alang ninyo aron mailhan sa tibuok ninyong kinabuhi. Ang inyong ngalan sagad mao ang unang butang nga ipangutana kon sila inyong ikahimamat. Ug kini ang pinakasayon nga paagi alang sa pamilya, mga higala, ug sa uban sa pagsangpit kaninyo ug pagduol kaninyo. Samtang bata pa, daghan usab ninyo ang adunay prebilihiyo sa pagdawat og ngalan ug panalangin pinaagi sa gahom sa pagkapari.

Sa inyong bunyag, kamo naghimo og pakigsaad uban sa Dios sa pagpakita nga kamo andam sa pagdala diha sa inyong kaugalingon sa ngalan ni Jesukristo. Matag higayon nga kamo moambit sa sakramento, inyong gibag-o ang pakigsaad ug saad nga sa kanunay mohinumdom Kaniya (tan-awa sa Mosiah 18:8–9; Doktrina ug mga Pakigsaad 20:77, 79).

Mao nga, ang mga ngalan importante. Dili lang nga ang usa ka ngalan mokonektar sa matag usa kanato sa atong kaugalingong pagkatawo ug sa pagka-indibidwal, apan kini usab makadala og gahom, responsibilidad, ug mga panalangin. Kini tinuod gayod ilabi na kon kini may kalabotan sa ngalan sa gipahiuli nga Simbahan ni Jesukristo, gani Ang Simbahan ni Jesukristo sa mga Santos sa Ulahing mga Adlaw.

Ang Manluluwas ang Mihatag og Ngalan sa Iyang Simbahan

Ang atong pinalanggang propeta, si Presidente Russell M. Nelson, nagtudlo nganong ang ngalan sa Simbahan sa Manluluwas importante kaayo. Siya miingon: “Kini mao ang sugo sa Ginoo. Si Joseph Smith wala maghatag sa ngalan sa Simbahan nga gipahiuli pinaagi niya; si Mormon wala usab. Ang Manluluwas Mismo ang nag-ingon, ‘Kay sa ingon ang akong simbahan pagatawgon sa katap[o]san nga mga adlaw, gani Ang Simbahan ni Jesukristo sa mga Santos sa Ulahing mga Adlaw’ [Doktrina ug mga Pakigsaad 115:4].”¹

Dili kini ang unang higayon nga gihatag ang instruksiyon bahin sa unsay ingalan sa Simbahan ni Jesukristo. Sa dihang ang nabanhaw nga Manluluwas mipakita sa mga Nephite human sa ilang pag-ampo ngadto sa Amahan diha sa Iyang ngalan, ang mga tawo nangutana Kaniya kon unsay ilang itawag sa Iyang Simbahan. Ang Manluluwas mitubag:

“Busa kamo motawag sa simbahan sa akong ngalan. …

“Ug unsaon kining akong simbahan kon kini dili pagatawgon sa akong ngalan? Kay kon ang usa ka simbahan pagatawgon sa ngalan ni Moises niana kini simbahan ni Moises; o kon kini pagatawgon sa ngalan sa usa ka tawo niana kini simbahan sa tawo; apan kon kini pagatawgon sa akong ngalan niana kini mao ang akong simbahan, kon kini mao nga sila natukod diha sa akong ebanghelyo” (3 Nephi 27:7–8).

Alang niini nga mga rason, si Presidente Nelson mipahayag, “Ang ngalan sa Simbahan dili mausab. Sa dihang ang Manluluwas klaro nga namahayag unsay ngalan sa Iyang Simbahan ug gani giunhan sa Iyang pamahayag sa, ‘Kay sa ingon ang akong simbahan pagatawgon,’ Siya seryoso.”²

Si Presidente Nelson misaad nga kon kita mobuhat sa atong labing maayo sa pagpahiuli sa saktong ngalan sa Simbahan sa Maluluwas, “Siya kansang Simbahan mao kini mobu-bu sa Iyang gah[o]m ug mga panalangin diha sa mga ulo sa mga Santos sa Ulahing mga Adlaw, sa mga paagi nga wala nato makita sukad.”³

Kita Makatabang sa Uban nga Masayod Kon Unsay Atong Gituohan

Usa sa mga panalangin sa paggamit sa hustong ngalan sa Simbahan moabot kon seryusohon nato ang atong responsibilidad sa pagsangyaw sa ngalan sa Manluluwas sa tibuok kalibotan.

Sulod sa mga katuigan, ang mga angga sama sa “LDS nga Simbahan” ug “Simbahan sa Mormon” gigamit isip puli sa ngalan nga gipadayag sa Manluluwas. Ang problema sa mga angga nga sama niini mao nga giwagtang niini ang ngalan ni Jesukristo gikan sa Iyang Simbahan. Sa pagbuhat sa ingon, sayop ang pagrepresentar niini kon si kinsa kita ug unsa ang atong gituohan.

Nagatuo kita nga si Jesukristo mao ang Manluluwas ug Manunubos sa kalibotan. Subo lang, pipila ka tawo naghunahuna nga kita wala motuo diha Kaniya o nga kita nagsimba sa usa ka tawo gawas Kaniya. Pinaagi sa pagpakigbahin sa uban kutob sa mahimo nga kita nahisakop sa Ang Simbahan ni Jesukirsto sa mga Santos sa Ulahing mga Adlaw, atong giklaro nga kita nagsimba ni Jesukristo. Dayon kadtong atong mga gikauban magsugod sa pagkakita nga si Jesukristo mao gayod ang sentro sa atong mga gituohan ug sa atong kinabuhi.

Kita Makadala sa Gahom ni Jesukristo sa Atong Kinabuhi

Si Presidente Nelson nagtudlo, “Si Jesukristo mitudlo kanato sa pagtawag sa Simbahan pinaagi sa Iyang ngalan tungod kay kini Iyang Simbahan, nga puno sa Iyang gah[o]m.”⁴

Si Jesukristo nagpuyo og kinabuhi nga walay sala. Siya mibuntog sa tanang tintasyon, kasakit, mga hagit, ug mga kasakit sa kalibotan. Mipaagas Siya og dugo didto sa Getsemani ug diha sa krus samtang Siya miantos og tumang kasakit lapas pa sa bisan unsang paghulagway sa gahom. Iyang gidala ang tanan natong mga kasakit ug mga balatian. Pinaagi sa Iyang maulaong sakripisyo, Siya andam sa pagtabang sa matag usa kanato. Samtang kita mopakita og hugot nga pagtuo diha Kaniya ug moduol ngadto Kaniya, kita “mapanalanginan og dugang gah[o]m sa pag-atubang sa tintasyon, mga pakigbisog, ug kahuyang.”⁵

Kon kita klaro nga mosulti nga kita mga miyembro sa Ang Simbahan ni Jesukirsto sa mga Santos sa Ulahing mga Adlaw, kita usab miila nga Siya mao ang Usa kinsa adunay gahom sa paglig-on kanato, sa pagpagaan sa atong mga palas-anon, ug sa pagdala og kalipay ug kalinaw sa atong kinabuhi. Dugang pa niana, kita gisaaran usab nga makabaton “sa kahibalo ug gah[o]m sa Dios aron matabangan kita sa pagdala sa mga panalangin sa gipahiuli nga ebanghelyo ni Jesukristo ngadto sa matag nas[o]d, kaliwatan, pinulongan, ug katawhan ug sa pag-andam sa kalib[o]tan alang sa Ikaduhang Pag-anhi sa Ginoo.”⁶

Dugang nga mga Panalangin Moabot

Akong mga higala, hunahunaa lang ang epekto sa yanong paggamit sa hingpit nga ngalan sa Simbahan sa Manluluwas. Ako mopamatuod nga si Jesukristo nagbarog isip ang pangulo sa Iyang Simbahan ug nagdumala niini pinaagi sa Iyang mga propeta, mga manalagna ug mga tigpadayag. Dapiton ko kamo sa pagtinguha sa mga panalangin sa Simbahan sa Manluluwas ug sa pagpaambit sa bililhong mga kamatuoran niini ngadto sa uban. Nasayod ko nga ang Iyang Simbahan, Ang Simbahan ni Jesukirsto sa mga Santos sa Ulahing mga Adlaw, mopanalangin kaninyo, sa inyong mga higala, ug sa inyong pamilya karon ug ngadto sa kahangtoran.