“Gikan sa Referral alang sa Misyonaryo nga nahimong Milagro,” Alang sa Kalig-on sa mga Kabatan-onan, Okt. 2021.
Gikan sa Referral alang sa Misyonaryo nga nahimong Milagro
Gugma. Pagpaambit. Pagdapit. Ug karon, mas sayon na kini kay sa kaniadto.
Nakabaton na ba gayod kamo og kaisog sa pagpaambit sa inyong pagpamatuod ngadto sa usa ka tawo? Tingali nakadawat kamo og impresyon nga ang usa ka paryente o higala nagkinahanglan nga makadungog sa ebanghelyo.
Ang pagsunod sa ebanghelyo maghatag kanato og kahayag sa sulod, ug si Jesukristo naghangyo kanato sa pagpaambit niana nga kahayag ngadto sa kalibotan (tan-awa sa Mateo 5:16). Kon buhaton nato, makakita kita og usa ka tawo kinsa andam sa pagkat-on gikan sa mga misyonaryo. Kon mao, adunay usa ka feature diha sa Member Tools nga app sa Simbahan nga makatabang sa mga misyonaryo sa pagkonektar ngadto kanila. Ang mga istorya sa ubos nagpakita kon sa unsang paagi ang mga tawo migamit niini nga feature—ug sa unsang paagi kini makapanalangin niadtong inyong gidapit sa pagpakigkita sa mga misyonaryo.
Si Jason Mitubag sa usa ka Pag-ampo
Mga paghulagway pinaagi ni Michael Mullan
Dili pa lang dugay, si Jason mibisita sa San Diego, California, USA, alang sa pagtambal sa kanser. Bisan tuod kini lisod nga panahon alang kaniya, si Jason miingon, “Sa buntag sa akong pagbiyahe sa eroplano nag-ampo ako nga makabaton og kahigayonan sa pagpaambit sa ebanghelyo ngadto sa usa ka tawo kinsa andam na.”
Misakay siya og taxi padulong sa airport ug misugod og pagpakig-istorya sa drayber, si Robert. Sa wala madugay si Jason mipahayag sa iyang hugot nga pagtuo sa Dios ug mipaambit nga siya usa ka miyembro sa Ang Simbahan ni Jesukristo sa mga Santos sa Ulahing mga Adlaw. “Nahimong mahinamon si Robert ug miingon kanako nga siya nakakita sa atong templo duol sa highway,” miingon si Jason. “Nag-ampo ug naghangyo siya nga makat-on pa og dugang mahitungod sa atong mga gituohan. Giingnan nako siya nga natubag ang iyang pag-ampo.”
Mitanyag si Jason nga ipailaila si Robert ngadto sa mga misyonaryo, ug miuyon dayon siya. Gigamit ni Jason ang “Magpadala og Referral” nga feature diha sa Member Tools nga app aron sa pagpadala sa impormasyon ni Robert. Pipila ka bulan ang milabay, nakadawat si Jason og mensahe gikan sa mga misyonaryo sa San Diego. “Mipahibalo sila kanako nga nabunyagan si Robert sa miaging adlaw. Nindot kaayo kana!”
Nagpadala og Kahupayan si Karen
Si Karen ug ang iyang ig-agaw nga si Amy nagpuyo sa sobra sa 2,000 ka kilometro gikan sa usag usa. Nasayod si Karen nga si Amy nagkinahanglan og paghupay, ug samtang dili siya mahimong moadto didto, ang mga misyonaryo sa lungsod nga gipuy-an ni Amy mahimong moadto didto! Gigamit ni Karen ang referral nga himan aron sultihan ang mga misyonaryo sa Siyudad sa Salt Lake, Utah, USA, mahitungod ni Amy. “Mitawag sila kanako, ug gipasabot nako giunsa pagpadako si Amy, kasamtangang sitwasyon, ug nga gibati niya nga ang Dios nasuko kaniya,” miingon si Karen.
Sa wala madugay, ang mga sister missionary mikontak kang Amy. Samtang gitawagan siya sa telepono, nag-ampo sila alang kaniya. Nianang gabhiona, nagbakho, si Amy mitawag kang Karen aron sa pagsulti kaniya mahitungod sa mga misyonaryo nga nag-ampo alang kaniya. “Natandog gayod siya sa ilang pagkamabination,” miingon si Amy.
Bisan tuod kon si Amy wala pa makasugod sa pagtambong sa simbahan, nagsugod na siya sa pag-ampo kada adlaw ngadto sa Langitnong Amahan. Wala masayod si Karen kon unsay mahitabo sa umaabot, apan miingon siya, “Nagkaduol si Amy ngadto kang Kristo.”
Si Eduarda Mipaambit sa Iyang Kahayag
“Sa sinugdanan, wala gayod ako masayod kon unsaon sa pagpaambit sa ebanghelyo ngadto ni bisan kinsa o unsaon sa pagpailaila sa mga misyonaryo ngadto sa akong mga higala,” mipasabot si Eduarda. Si Eduarda gikan sa Brazil ug, bisan wala siya gipalibotan og daghang miyembro sa Simbahan, nasayod siya nga “ang Ginoo kanunayng mag-andam og paagi alang sa Iyang mga anak nga masayod sa kamatuoran.”
Mipaambit si Eduarda og video sa Simbahan ngadto sa usa ka higala, kinsa naganahan sa iyang nakita. Sa dihang nahimong mas interesado sa Simbahan ang iyang higala, si Eduarda midapit kaniya sa pagpakigkita sa mga misyonaryo ug gigamit ang feature sa referral alang sa misyonaryo diha sa website sa Simbahan. Midugang si Eduarda og komentaryo nga nag-ingon nga gusto niya nga moapil sa pag-uswag sa iyang higala sa pagkat-on sa ebanghelyo. Malipayon nga miuyon ang mga misyonaryo. Gani miapil si Eduarda sa bunyag.
Miingon si Eduarda nga nabati niya ang gugma sa Dios alang sa Iyang mga anak nianang higayona. Siya mipasabot usab nga, “Kitang tanan adunay usa ka tawo nga nakakita sa Kahayag ni Kristo dinhi kanato. Kita kinahanglan lang modapit kanila aron makakita kon unsa kana nga kahayag!”
Imbitasyon alang sa Tanan
Sa sunod nga higayon nga kamo adunay impresyon nga ang usa ka tawo makabenepisyo sa pagpaminaw sa mga misyonaryo, ayaw pagpanuko sa paggamit niini nga himan aron makatabang sa pagkonektar sa inyong mga higala ngadto sa mga misyonaryo. Ang mga misyonaryo magmahinamon sa pagdapit kaninyo sa pag-apil samtang ang inyong mga higala makigkita kanila. Ug kinsay nasayod? Basin makasaksi pa gani kamo og milagro samtang magpadayon.