“Unsay kinahanglan nakong buhaton kon ako naghinulsol na apan dili makahunong sa paghunahuna mahitungod sa unsay akong nabuhat nga sayop?” Alang sa Kalig-on sa mga Kabatan-onan, Okt. 2021.
Mga Pangutana ug Mga Tubag
“Unsay kinahanglan nakong buhaton kon ako naghinulsol na apan dili makahunong sa paghunahuna mahitungod sa unsay akong nabuhat nga sayop?”
Ilha ang Inyong Kalamboan
Ang Langitnong Amahan wala nagdahom kanato nga mahimong hingpit sa pagkakaron, mao nga gigamit nako ang akong mga sayop isip mga kasinatian sa pagkat-on. Si Satanas mosulay sa paglaglag kanato pinaagi sa pagpabati kanato nga nabug-atan tungod sa kahasol sa konsensiya, apan wala siyay bisan unsang laing gahom gawas niana. Karon nga nasayod ako niana, naningkamot ako nga makakita kon sa unsang paagi ako naglambo imbis nga magtutok sa akong mga sala.
Luke M., 14, Utah, USA
Pasayloa ang Inyong Kaugalingon
Kon pasayloon ninyo ang inyong kaugalingon, mabati ninyo ang gugma sa Manluluwas alang kaninyo, tungod kay Siya mipasaylo na kaninyo. Gusto ni Satanas nga butangan kamo og mga hunahuna nga makapawala og kadasig, apan mas lig-on kamo. Kana nga mga hunahuna wala naggikan sa Langitnong Amahan, busa papahawaa kini!
Camila A., 18, Dominican Republic
Makapabayaw nga Musika
Ganahan ko nga maminaw sa makapadasig nga mga awit aron sa pagtabang sa pagbayaw ug pagdasig kanako. Kon ako mag-ampo sa Langitnong Amahan aron mangayo sa Iyang tabang, ug dayon maminaw og pipila ka makapabayaw nga musika, kusog gayod nako nga mabati ang Espiritu ug kini nakatabang kanako nga magpadayon.
Elma P., 18, Negros Occidental, Philippines
Kalinaw diha sa mga Kasulatan
Kon gibati ninyo nga nakahinulsol na kamo, pangita og kalinaw diha sa mga kasulatan. Ang mga pulong sa Ginoo gihatag ngari kanato aron makabati kita og kalinaw sa atong mga kinabuhi. Kon mag-ampo kamo aron makabaton sa Espiritu Santo uban kaninyo samtang magbasa kamo, Siya mogiya kaninyo.
Emma M., 19, Spain
Makatabang ang Paghinumdom
Sa Alma 36:17–19, si propeta Alma mihulagway sa paghinumdom sa iyang mga sala, apan kana mas nakapahinam lamang kaniya mahitungod kon unsa na kadako ang iyang kausaban ug paglambo. Sama ni Alma, ang paghinumdom sa atong nangaging mga sayop makatabang kanato nga dili na kini masubli.
Júlia M., 18, Bahia, Brazil
Ang Dios Dili na Mahinumdom sa Atong mga Sala
Ang mga kasulatan nagsulti kanato nga human kamo naghinulsol gikan sa sala, ang Dios dili na mohinumdom niana nga sala (tan-awa sa Doktrina ug mga Pakigsaad 58:42). Bisan og ang Dios wala na mahinumdom niini, kita makahinumdom gihapon. Mahimong sakit nga makahinumdom sa nangaging mga sayop, apan imbis nga hunahunaon nga palas-anon ang nangagi nga kahasol sa konsensiya, hunahunaa kini isip usa ka pahinumdom nga buhaton ang inyong labing maayo.
Elijah W., 17, Utah, USA
Ang Pag-ula ni Kristo—Alang Kaninyo
Kon maghunahuna ako mahitungod sa akong nangagi nga mga sala, sayon ra nga mobati nga daw ako wala nakahinulsol sa hingpit o nga ako dili angayan sa kapasayloan sa Dios. Apan importante nga hinumdoman nga gusto sa Langitnong Amahan nga molambo kita. Dili Siya gusto nga magpabilin kita sa nangagi o dad-on ang kahasol sa konsensiya diha sa atong kasingkasing hangtod sa kahangtoran. Ang Langitnong Amahan mihatag kanato sa Iyang Anak, si Jesukristo, isip usa ka Manluluwas aron nga kita makahinulsol ug mahimong malimpyohan pag-usab pinaagi sa Iyang Pag-ula.
Chloe W., 16, Arizona, USA
Motutok sa Panginahanglan sa Uban
Tingali maghunahuna kamo nga sa higayon nga kamo nakahinulsol, ang inyong mga problema ug mga hunahuna sa inyong mga sayop mohunong. Apan dili kana kanunayng tinuod. Usahay ipabilin sa Dios kadto nga mga pagbati aron makakat-on kamo sa pagbuntog niini. Kon kamo sinserong nakahinulsol apan ingon og dili makalimot sa inyong mga sayop, sulayi nga motutok sa panginahanglan sa uban, sama sa buhaton ni Kristo, pinaagi sa pagserbisyo niadtong naglibot kaninyo ug sa pagpaambit sa inyong pagpamatuod. Makatabang kini nga dili na kamo maghunahuna sa inyong kaugalingong mga kakulangan, ug makatabang kamo sa laing tawo niana nga pamaagi.
Jacob W., 21, Utah, USA