“Kajoor eo Jej Ņae Etan Tūriam̧o,” N̄an Kōkajoorļo̧k Jodikdik ro, Juļae 2022.
Mour Jipan̄
Kajoor eo Jej Ņae Etan Tūriam̧o
Tūriam̧o eo an Anij emaron̄ jipan̄ kōj, jekdoon ta mālijjon̄ ko jej jelm̧aeik.
Pija ko jān Getty Image ko
Ikar etal n̄an juon mej an juon iaan kar membōr ro ilo ward eo ekar bōk mour eo an make ālikin an kar idajon̄jon̄ e nan̄inmej in inepata ilo kōmāļij. Būruō ekar rūb ilo aō liājļōļ kōn jako eo an ippān ro m̧ōttan im baam̧le eo an.
Inepata ilo kōmālij im apan̄ ko jet ilo kōmālij remaron̄ pok im pen n̄an armej ro rej iooni im n̄an aolep ro rej iakwe er. Nuuj eo em̧m̧an an gospel in ej bwe Kraist ej letok kōjatdikdik im jipan̄ kōj kōn menin letok eo an tūriam̧o eo An.
Juon ekkatak ekar pād 600 jodikdik ro ilo Brigham Young University ekar kwaļo̧k bwe ro rekar meļeļe bwe tūriam̧o an Jisōs Kraist rekar dik aer inepata ilo kōmālij, ikūm̧kum̧, kōņaan wāppen aolep iien, im jook.1 Ta eo armej rein em̧m̧an drettāer rekar meļeļe kōn tūriam̧o me ekar kōm̧m̧an oktak eļap ilo mour ko aer?
Anij ej Iakwe Kōj Indeeo
Ilo ekkatak eo, jet armej rej tōmak bwe Anij im Jisōs Kraist renij iakwe im jipan̄ er m̧ae rej kab wānōk. Armej ro rej apan̄ eļapļo̧k jān ro jet ro remeļeļe bwe Anij im Jisōs Kraist ej iakwe er indeeo im rej pād n̄an jipan̄ er aolep iien.
Ilo Kajin Pālle, naan eo grace ekanooj lōn̄ meļeļein. Emaron̄ meļeļein erre, jouj, im kautiej. Ilo Hibru, naan eo ej meļeļein jerbal in jouj ak jerbal in jouj lelo̧k kōn iakwe. Bōlen menin ej kōmeļeļeik etke Rikūrijin ro jān epepen ko rekar kōjerbal naan eo grace n̄an kōmeļeļeik an Anij jerbal, jouj, im iakwe.
Anij Ekōņaan Jipan̄ kōj
Armej ro Rekwojarjar ilo Raan Ko Āliktata remeļeļe bwe grace eļapļo̧k jān wōt juon m̧wil an Anij. Grace ej bar āinwōt kōmeļeļeik wāween An ekkeijel wōt ippād ilo ad kate kōj n̄an erom̧ āinwōt E (lale Moronai 10:32). Būreejtōn Dieter F. Uchtdorf, kiiō Rikakkpilōklōk eo Kein Karuo ilo Būreejtōnji eo Kein Kajuon, kar kōmeļeļeik bwe tūriam̧o ej “jipan̄ eo ekwojarjar im menin letok an kajoor eo jej eddōk jān ad kar armej ro remōjņo̧ im relikjab im kiiō rej wanlōn̄ļo̧k kōn m̧ool im meram.”2
Ilo ekkatak eo kar ba m̧oktaļo̧k, armej ro em̧m̧an dettāer ro rekar loe jon̄an an Anij im Kraist pojak, kōņaan, im maron̄ n̄an jipan̄ er bōk māllijo̧n̄ ko in nan̄inmej ilo kōļmenļo̧kijeņ jān ro rej en̄jake bwe rej make iaer.
Anij Ej Ioon Kōj Ijo Jetōpar E
Ekanooj lōn̄ armej rej en̄jake bwe jipan̄ eo an Anij ettoļo̧k jān er kōnke rejjan̄in kōm̧m̧an tōprak. M̧ool eo ej, tūriam̧o ej juon menin letok. Kwojjab aikuj jerbal n̄an bōk juon menin letok. Men eo de eo kwoj aikuj kāālet n̄an bōk e.
Ilo ekkatak eo, ekar iietļo̧k nan̄inmej ilo kōļmenļo̧kijeņ ilubwilijin ro remeļeļe bwe Anij ej jipan̄ kōj jabdewōt jikin jej pād ie im jekdoon ta eo em̧ōj ad kōm̧m̧ane. Elder D. Todd Christofferson jān Doulul eo an Jon̄oul Ruo Rijilōk ro ekar katakin, “jej aikuij jino bōk eddo, iuun kōj make, ukweļo̧k, im kāālet Anij bwe En eoon wōt juon An maron̄ em̧akūtkūt ilo mour ko ad kōn jim̧we im anemkwōj in kāālet.”3
Ilo mej eo an eo m̧ōtta, ikar kam̧m̧oolol kōn naan in kam̧ool ko me rekar kwaļo̧ki kōn kōjatdikdik im kōmour eo eppeļo̧k n̄an aolep kōn Pinmuur eo an JIsōs Kraist. Em̧ool, Kraist ej uwaak eo n̄an aolep būraabļōm̧ im un eo in lan̄lōn̄ em̧ool.