Jet Men ko Reļļap

Jān David A. Edwards

Māākjiin ko an Kabun̄ in

Em̧ool bwe men ko reddik im reļam waan remaron̄ jet men ko watōki reļļap.

Jen ba ewōr juon am̧ būraabļōm̧ ilo ājmour me eban jako. Juon armej eiwōj im ba kōn juon em̧m̧aan eo emaron̄ kōmour eok. Ej jokwe ettoļo̧k, bōtaab kwar jeje n̄ane im jibadōkļo̧k bwe kwon maron̄ loe im ron̄ ta eo ej aikuj ba n̄an eok.

Ke kwoj tōprakļo̧k ilo m̧weo im̧ōn, rijipan̄ eo an ej diwōjtok im ba bwe bo̧o̧j eo an ej ba en etal im tuwaak ilo juon reba eipaak.

Innem Rijipan̄ eo ej bar oktaklikļo̧k, im kiiō kolikkuun inepata. Kwoj ļōmņak, “Ikar itok ilo iaļ aetok n̄an men eo?”

Kōtmāne ko

En̄in ej ta eo ekar waļo̧k n̄an Neaman. Ekar juon kapen in jarin tariņae an Siria—juon em̧m̧aan eo eļap kautiej e im eo eļap eddo ko an. Bōtaab ekar lepa, juon kūj in kūl eļap an nana.

Men̄e ekar jab juon riisrael, ekar ron̄ kōn rikanaan Ilaisha kōn juon rijerbal leddik edik eo ekar jān Israel. Neaman ekar tōmake naan in kam̧ool eo an kōn Ilaisha im Anij eo an Israel. Kōn menin ekar etal im pukotļo̧k Ilaisha. Ke Neaman ekar tōprakļo̧k ilo m̧weo im̧ōn Ilaisha, Ilaisha ekar jilkinļo̧k juon rikoj meļan, eo ekar ba n̄an Neaman bwe en etal im tutu ilo reba Jordan jiljilimjuon alen bwe en mour.

Pija

Neaman ej ron̄jake rijerbal eo

Kōmeļeļe ko jān Corey Egbert

Neaman ekar illu. Ekar ļōmņak bwe en kar ioon Ilaisha im bwe Ilaisha enkar likūt pein ioon nan̄nmej eo an ilo kūlin, kūr etan Anij, im kōmour e ilo kabwilōn̄lōn̄. Em̧ool ekar barāinwōt ļōmņak bwe ekar wōr reba ko rem̧m̧anļo̧k ilo ijo jikūn me emaron̄ kar tutu ie.

Neaman ekar ļap ippān kōtmāne ko. Ekar kōtmāne bwe Ilaisha en diwōjtok im lale e. Bōlen kōnke Neaman ekar utiej jerbal eo an im ekar iminene kōn jon̄an an armej kautiej e. Ekar barānwōt kōtmāne juon uaak eo ekabwilōn̄lōn̄ im ļap n̄an būraabļōm̧ eo an jān jon̄an eo kar leļo̧k n̄an e. Bōlen kōn bwebwenato ko ekar ron̄ kōn Ilaisha. Kōn menin en̄jake eo an ekar kōm̧m̧an menin an illu.

ettā bōro

Ak bwebwenato in an Neaman ekar jab bōjrak ijin. Juon iaan rijerbal ro an ekar leļo̧k jet naan in kapilōk ko rejim̧we.

“Eļan̄n̄e rikanaan eo ear jiron̄ eok bwe kwōn kōm̧m̧an jabdewōt men eo eļap, kwō jāmin kar kōm̧m̧ane ke? Etke e jab em̧m̧anļo̧k ke ear ba n̄an eok ,‘Kwōn tutu im kwōnaaj erreo?” (2 Kiin̄ Ro 5:13).

Neaman ekar kile bwe rijerbal eo ekar jim̧we. Eļan̄n̄e rikanaan eo ekar kajjitōk ippān n̄an kōm̧m̧ane juon men eļap, enkar kōm̧m̧ane. Kōn menin etke jab kōm̧m̧ane men in edik? Ekar kōttāiki e make. Ekar tulo̧k jiljilimjuon alen ilo reba Jordan im ekar mour.

Pija

Neaman ej tutu ilo reba Jordan

Men ko Reddik im Relam Waan

Elōn̄ iien Irooj emaron̄ kajjitōk ippān juon armej n̄an kōm̧m̧ane “jet men ko reļļap” Bōtaab ejjab wāween de in an Irooj jerbal aolep iien. Eiten aolep iien E ej kōjerbal “men ko reddik im reļam waan” n̄an bōktok “men ko reļļap” ilo mour kein ad (Alma 37:6).

Jet iien kōtmāne ko ad ak utiej bōro emaron̄ kōm̧m̧an ad lōmņak bwe wāween eo an Irooj elikkuun ļam waan ak dik n̄an wōr tokjen n̄an iien ko ad. (lale 1 Nipai 17:40–41). Bōtaab Irooj emaron̄ jipan̄ kōj anjo̧ jān en̄jake kein im kōttāik kōj make. E ej iakwe kōj im ekōņaan kōjeram̧m̧an kōj im jipan̄ kōj erom̧ eļapļo̧k āinwōt E (lale Moses 1:39).

Erkein jejjo waanjon̄o̧k in men ko reddik im lam̧ waan Irooj ej kajjitōk ippād n̄an kōm̧m̧ani n̄an ipaakeļo̧k E im bōk kōjeram̧m̧an ko An.

Jar im riiti jeje ko rekwojarjar kajjojo raan (lale 2 Nipai 32:3, 9).
N̄e kwar jerawiwi, ukweļo̧k (lale Katak im Bujen Ko 1:31–32).
Kobaļo̧k n̄an jikin jar im bōk kwojkwoj eo kajjojo wiik (lale Moronai 6:5–6).
Kōļļā juon m̧ōttan jon̄oul (lale Malakai 3:8–10).
Ļoor Naan in Mālōtlōt eo (lale Katak im Bujen Ko 89).
Kwon m̧ool (lale Katak im Bujen Ko 51:9).
Kwon jouj (lale Epsōs 4:32).
Jerbal n̄an ro jet (lale Matu 25:34–40).

Komaron̄ ļōmņak kōn elōn̄ļo̧k.

Kōn menin, n̄e kwoj ioon juon men eddik im ļam waan, likkuun lale. Emaron̄ juon unin tōl ilo N̄an Kōkajoorļo̧k Jodikdik Ro bok jidikdik eo, jet naan in kapilōk ilo juon katak jān kweilo̧k eo eļap, ak juon men bisop eo am̧ ekar kajjitōk bwe kwon kōm̧m̧ane. Jekdo̧o̧n ta eo, keememej Neaman, im baj kōm̧m̧ane wōt. Emaron̄ dik, ak kōjeram̧m̧an ko renaaj ļap.