“Ejjeļo̧k Juon Āinwōt Kwe,” N̄an Kōkajoorļo̧k Jodikdik ro, Juļae 2022.
Itok, Ļoor Eō
Ester
Ejjeļo̧k Juon Āinwōt Kwe
Irooj ekar kōpooj Ester n̄an jerbal eo an aorōk, im E ej kōm̧m̧ane ejja in wōt n̄an eok.
Kōm̧mane jabdewōt men kiiō. Jabdewōt men! Dōn̄dōn̄te ilōn̄in bōram, kōro̧o̧loole ilo juon doulul, ak lam̧ōje jet naan bwebwe āinwōt, “Enno ippa pilawe binana!”
Ededeļo̧k? Em̧m̧an. Em̧ōj am̧ kōttōprak juon men me ejjan̄in kar kōm̧m̧ane m̧okta. Emaron̄ jameļeļe ilo an iwōj, jekdoon ta eo kwaar kōm̧m̧ane—men̄e kwaar wōt ļōmņak kōn juon men bōtaab kwaar jab kōm̧m̧ane—ejjan̄in kar kōm̧mane ilo jejjōt in jekjek eo ilo bwebwenato. Ejjab ijo kwoj pād ie, ejab ilo iien eo ejejjet, im ejjab jān eok.
Wāween kejimourur in edik im kōjak ej kalikkar juon un aorōk: ejjeļo̧k juon āinwōt kwe, barāinwōt ilo lukkuun jetjet in jekjek ko am̧. Ejjab bar ro jeim̧ im jatūm̧. Ilo aolepān laļ in, ejjeļo̧k juon en ewōr ippān jejjōt in jon̄an kapeel ko am̧, maron̄ ko, im jemjerā ko, baam̧le, menin letok ko an jetōb, im erreim̧aanļo̧k ko am̧ make.
Āinwōt Ester jān Kallim̧ur M̧okta, kōjenolo̧k im kile eok “ilo iien rot in” (Ester 4:14) n̄an kōm̧m̧an oktak eļap n̄an em̧m̧an eo ilo mour ko an ro otemjej.
Ewōr men ko raurōk n̄an am̧ kōm̧m̧ani!
Jān Jipakwe n̄an Utiej
Ilo am̧ ekkatak jān Kallim̧ur M̧okta ilo allōn̄ in āinwōt m̧ōttan Itok, Ļoor Eō, kwonaaj ekkatak kōn juon jiron̄ in Jew eo ekabwilōn̄lōn̄ etan Ester. Ilo juon iien ilo an jiron̄, Ester ekar jipakwe im kar lale jān juon an nej baam̧le, Mordikeai. Ekar rūttoļo̧k ilo juon iien ke Riju ro rekar pād ium̧win kōm̧akoko jān juon laļ oktak.
Āinwōt juon eo ejipakwe im ej jokwe ilo juon āne ejjab bun̄bun̄, ejjelo̧k an kar ļōmņak ke juon raan enaaj kar erom̧ juon lerooj. Bōtaab lukkuun menin ekar waļo̧k (lale Ester 2). Kar kāālet e bwe en m̧areiki kiin̄, Ehasuirōs.
Ak juon raan ekar jelm̧aik juon idajon̄jon̄ eļap an nana: armej ro an Ester, Riju ro, ekar jidimkij aer pād ilo kauwōtata in mej. Ļāeo pāleen, kiin̄ eo, ālikin an kar ron̄jake naan in kapilōk ko an rikōnono ro an, kar kōjjeļāik juon koņ n̄an aolep Riju ro ilo jikin eo bwe renaaj m̧an er ilo tu jejjōt in juon raan em̧ōj an kāālet e.
Kiiō, ekar kanoojin lōn̄ armej rekar jokwe ilo jikin eo. Ekar barāinwōt wōr Riju rej jokwe ilo jikin eo. Bōtaab kar juon wōt Lerooj Ester. Im e wōt armej eo emaron̄ kōm̧m̧an jabdewōt n̄an kabōjrake jorāān in.
Ejjeļo̧k oktak jān Lerooj Ester, ewōr wōt juon kwe. Kwe wōt eo komaron̄ kōm̧m̧ane men ko komaron̄ kōm̧m̧ani—men ko Irooj aikuji eok n̄an kōm̧m̧ani. Men ko remaron̄ me remaron̄ tōl n̄an mour ko an elōn̄ armej.
Uwaak ko n̄an Jar
Kom̧m̧oolol bwe koban aikuj n̄an jerbale juon men jon̄an an kauwōtata im kamijak āinwōt eo Ester ekar jelm̧aik. Bōtaab ejjab meļeļein bwe un eo am̧ ilo mour in edikļo̧k an aurōk.
Ejjeļo̧k oktak jān Ester, em̧ōj tōl eok im kōpooj eok jan erom̧ wōn kwe eo kiiō. Im kōbpopo in enaaj wōnm̧aanļo̧k wōt ilo am̧ ļoor Jisōs Kraist. Komaron̄ in uwaak eo n̄an jar ko an elōn̄ armej kajjojo raan.
Ejjeļo̧k kajjitōk, em̧ool ippān aolepān kapeel ko im maron̄ ko am̧, em̧m̧antata n̄an iien otemjej kajjitōk n̄an jipan̄ ilo jetōb ilo iaļ in m̧aanļo̧k āinwōt an kar Ester kōm̧m̧ane.
Tōmak, Peran, im Kwe
Ester ekar jeļā bwe ej aikuj kar kajjeon̄ n̄an kōjparoke armej ro an. Ekar barāinwōt jeļā bwe ekar aikuj kakkobaba in tōmak im rie jān armej ro an ilo an kappukot jipān̄ jān Anij. “Kwōn ilọk im kokweilọktok ro ri Ju otemjej rej pād i Shushan, im jitlọk kōn n̄a, im koṃwin jab m̧ōn̄ā ak idaak iuṃwin jilu raan, raan ak bon̄; n̄a barāinwōt im liṃaro ri karijera kōmnaaj barāinwōt jitlọk; āindein inaajdeļo̧n̄ n̄an ippān kiin̄ eo, men̄e e jab ekkar n̄an kien, im eļan̄n̄e I jako, ekwe, Ijako.” (Ester 4:16).
Ester, jān James L. Johnson
N̄e mour ej penļo̧k, ro retiljek rej kōļapļo̧k aer jitļo̧k n̄an Anij. Ester ekar aikuji aolepān jipan̄ ko emaron̄ kar bōk. Ekar jab aikuj wōt jipan̄ ilo kenono n̄an kabōjrak ļāeo pāleen jān kakien eo an, ak ekar barāinwōt likūt mour eo an make ilo kauwōtata ilo wōt an jibadōkļo̧k kiin̄ eo ilo ejjeļo̧k kūr (eo ekar menin jum̧ae kakien, em̧ool bar n̄an lerooj eo).
Kwar ke loe peran im tōmak eo an? Ewōr tokjen riiti ruo alen: “eḷaññe I jako, ekwe, Ijako,” Ester ekar ba. Naan kein rekajoor kar bar kōpan̄ūjn̄ūji jān, Shadrach, Meschach, im Abed-nego n̄an Kiin̄ Nebuchadnezzar ke rekar m̧akoko in kabun̄ n̄an ekjab gold eo an kiin̄ eo.
Men̄e kar kamijak er ke renaaj joļo̧k er n̄an urur in kijeek kōn aer jab pokake, rekar ba kōn peran, “Eļan̄n̄e enaaj āindein, am Anij Eo kōmij karijer ñan E, E maroñ in lo̧mo̧o̧ren kōm jān upaaj in kijeek e bwil, im Enaaj lo̧mo̧o̧ren kōm jān peiṃ, ā O kiin̄.
“Ak eļan̄n̄e jab, kwōn jeḷā O kiin̄ bwe kōm ban karijer n̄an anij ro aṃ ak kabun̄ n̄an ekjab gold eo kwaar kajutake” (Daniel 3:17–18, eoon ko kar kobaikitok).
“Eļan̄n̄e I jako, ekwe, Ijako,” rej kam̧ool ko reļļap kōn tōmak. Tōmak rōt in ekajoor ewōr merkarta ta eo enaaj waļo̧k. Peran eo an Ester ekar kōjparok armej ro an! Aet men̄e, ekar jeļā jān, ejjeļo̧k oktak jān Shadrack, Meshach, im Abed-nego, bwe jekdoon ta eo enaaj wāļo̧k jān kāālet tōmak ejjab aolep iien alikkar, kōm̧m̧ane men eo ejim̧we ej iien otemjej kāālet eo ejim̧we.
Enaaj wōr iien rōt kein ilo mour eo am̧ make n̄e kāālet iaļ eo ejim̧we emaron̄ in ben. Ejjeļo̧k iaad eban ioon ļan̄ in mālijjon̄ ko an mour in. Bōtaab ijin bar kwe komaron̄ kāālet āinwōt kar Ester. Kāālet mour jim̧we; kōtļo̧k bwe ta eo en waļo̧k en waļo̧k tokālik.
Āliktata, kwe wōt kwe enaaj wōr iien—im am̧ “iien rōt in” n̄an kōm̧m̧an bwe laļ in en juon jikin em̧m̧anļo̧k jān kiiō.