“Tekem Evri Samting,” Blong Ol Yut Oli Kam Strong, Julae 2024.
Tekem Evri Samting
Fasin blong agens i pat blong plan blong Papa long Heven. ?Be wanem nao yu yu mekem taem i hapen we yu no rere from?
Ol pikja droing oli kam long Paulina Wyrt
Moa bitim wan taem, long nogud moning ia, mi bin save se bae mi ded. Tugeta, blong luk, evri blad ia—we i blad blong mi—we i mekem rod i wetwet, mo kros blong braon bea ia we i strong i kam long mi long evri saed wetem tut blong hem mo han we en i sap, i livim mi wetem harem nogud mo mi lusum hop .
Wan Naesfala Moning
Wan bigfala difens long pas tu aoa afta. Mi bin gat wan gudfala stat long wan smol rod blong ronron long wan long ol naesfala dei we mi bin luk long sesen blong taem we i hot long hae kantri blong westen Waeoming, YSA. Skae i givim set olsem wan blu ston, ol wael flaoa i kavremap saed blong hil, mo win blong moning i kolkol mo i fres. Hem i wan stret mo gud dei blong wan 15-mael (24 km) ronron long ol maonten.
Trening ia hem i wan gudfala trening blong ronron. Mi bin stap traem blong bildimap paoa blong mi mo stap strong from wan maraton we bae i hapen long tu manis taem. Ol man blong ronron oli ron blong leftemap paoa tru long ol ripit ronron blong sot eria blong ronron. Hemia i bildim paoa blong olgeta blong ron kasem en, we bae i mekem olgeta oli kam strong long tingting blong win.
Mi no bin save se i no longtaem bae mi nidim evri paoa we mi gat blong gat strong tingting from we bae mi stap long wan resis from laef blong mi.
Wan Sapraes Atak
Taem mi stap lukluk i go bak, mi sud luk ol saen. Be, Lod i talem long yumi se Hem bae i “soem [yumi] ol samting we bae kam” tru long paoa blong Tabu Spirit (Jon 16:13). Olsem we Elda Gary E. Stevenson blong kworom blong Olgeta Twelef i bin tijim, “Tabu Spirit i save help blong givim woning long yu abaot ol denja long saed blong bodi mo spirit bifo oli hapen.” Mo Hem i mekem.
Sam minit i pas long ronron blong mi, mi lukluk i go daon mo faenem wan samting. Hat blong mi i jam taem mi luk we mi no mestem nating, rod blong lek blong bea long sop mat long fored blong mi. Hem i wan klia woning. Krangke tingting blong mi i mekem mi tekem se i tru wan bea i bin pas long rod ia, be naoia mi mi sef. ?I stret, mi no nid blong wari? Mekem se mi go hed blong ron.
Wan aoa i no pas yet, mi ron i go antap long top blong wan smol hil, mo ron i kam daon long hil ia i go insaed long wan ples we i klia from oli katem evri wud. Taem mi swing long kona daon long hil ia, mi harem wan noes blong wan samting i stap brekem bus i kam, noes ia i kam moa strong, i mekem ol hea long bak blong nek blong mi oli stanap. Mi stop mo long semtaem lukluk sloslo i go long lef saed blong mi. Afta mi nomo muv, fraet i kilim mi. Noes ia, we mi harem save kwiktaem nomo se ol branj oli stap brok, i stap ron kwik i kam. Afta mi luk wan samting we bae mi neva fogetem—wan bigfala braon bea i stap ron i kam stret from mi!
Nogud atak we i folem i sud tekemaot laef blong mi. I klia se bea ia i wan bea we i save muv strong, we i sapraesem mi taem mi foldaon i go long wan klia ples mo ron kwik. Be long taem ia we mi save se ded bae hapen, mi mekem wan ones prea long laef blong mi we mi neva mekem bifo. Ol sore blong heven oli kam daon long taem ia.
I had blong eksplenem, bea ia i stopem wael atak long mi mo ron i go insaed long ol wud. !Hemia i gud nius! Nogud nius se mi bin gat 16 bigfala kat we ol tut mo sap han blong bea i bin terem, mo mi stap miwan long wan tik bus ia, we mi fulap long blad, mo i tekem 11 mael (18 km) blong kasem rod blong trak, antap long hem i no gat help raon.
Wan Taem blong Mekem Desisen
Mi stap long wan taem long laef blong mi we bae mi mekem wan impoten desisen long laef blong mi. Sapos yu neva gat wan taem olsem long laef, bae yu gat yet. Fasin blong agens oli pat blong plan blong papa long Heven. Be nomo se, wan atak blong bea i no pat blong hem—from i no hapen long plante long yumi! Be long wan taem long laef, bae yu filim paoa blong wanem kaen fasin blong agens we yu stap fesem i kavremap yu. Hem i wan filing blong lusum hop we Lod i bin eksplenem i klia gud se i olsem “ol stret jo blong hel” se “oli open bigwan blong solemdaon yu” (Doktrin mo Ol Kavenan 122:7).
Long ol taem ia blong trabol long laef blong yu, yu gat wan desisen blong mekem. Yu save givap, ledaon, mo ded; o yu save faenem wan wei blong putum tugeta strong tingting blong yu mo strong paoa blong yu, wetem tras ia se sapos bae yu mekem pat blong yu, Lod bae i mekem pat blong Hem. Lod i eksplenem stamba tingting blong trabol blong laef long rod long Josef Smit taem hem i stap long kalabus long Libeti Kalabus: “Evri samting ia bae i givim eksperiens long yu, mo bae i blong gud blong yu” (Doktrin mo Ol Kavenan 122:7).
Mo i tru oli ol blesing long yu. Oli stretem yu mo mekem yu kam moa gud, taem yu stap gro strong, mo bildim fasin blong girap kwik afta long foldaon. Hemia nao from wanem Lod i talem long Josef—mo mi talem long yu—blong “stanap long rod blong yu” long taem blong trabol mo agens (Doktrin mo Ol Kavenan 122:9). Taem yu stanap strong long laef ia—iven sapos hem i long ol sel fingga blong yu—yu faenem iven smol paoa blong yu, hem i moa bitim blong majem wetem paoa blong Lod. Folem promes blong Hem, Hem i gat “olgeta paoa blong sevem man” (2 Nifae 31:19).
Stanap strong
Hemia nao stret samting we i hapen long mi. Hem i isi blong givap, be mi disaed blong girap . Mi gat strong tingting blong laef, we i minim se mi nidim blong faenem help. Mi wokbaot long smol rod ia blong moa long wan mael, long en mi mitim sam narafala pipol we mifala nomo long dak bus ia long dei ia plante mael longwe. Merikel miting ia i mekem se wan lokol helikopta i sevem mi, tri operesen blong sevem laef, mo wan klia andastaning long blesing blong gat strong tingting blong “stanap long rod blong yu.”
Elda Dunn i faenem help, oli sevem hem, mo hem i gat tri operesen blong sevem laef.
Eksperiens ia i givim moa paoa long mi, fasin blong gat strong tingting, mo fet. Hem i givim mi tu paoa, mo rere long mi blong go tru ol narafala jalenj blong laef. Mi save se taem yu “[fesem] evri samting, [bilif] long evri samting , [hop] from evri samting, [stanap strong kasem en] long evri samting” (1 Korin 13:7), bae yu bildim wan fasin blong no givap, mo paoa we yu nidim blong fesem ol jalenj. Bae yu luk han blong Lod we i stap mekem yu semmak wetem ol samting we yu fesem long rod blong yu—iven sapos oli “ol stret jo blong hel.”