“Open Hat Eksperiens blong Mi,” Blong Ol Yut Oli Kam Strong, Julae 2024.
Open Hat Eksperiens blong Mi
Ol pikja droing oli kam long Adam Nickle
Mi givim plante taem mo hadwok long atletik, speseli basketbol. Mi laekem blong kompit. Mo from hemia, mi bin fesem wan eit aoa open hat operesen taem mi gat 14 yia.
Mi bin bon wetem wan sik insaed long rod blong blad we i go insaed long hat blong mi. Taem i jes stat, ol dokta oli talem se bae mi nidim wan operesen taem mi kam olfala—ating, afta we mi finis long wok long olfala yia blong mi. Be taem i pas, problem i kam moa nogud, hemia from we mi bin stap plei spot tumas.
Long wan visit blong mi long ol manis blong sno, dokta i talem long mi se, mi nidim wan operesen long nekis wan o tu yia. Bifo long taem ia, mi bin ron long kros kantri long skul. Nomata long hemia, ol taem blong mi blong ron oli nomo kam gud, be oli stap kam nogud moa. Hemia nao olsem wanem mi save se i gat wan samting we i rong bigwan.
Mifala i visitim dokta bakegen long Maj. Long taem blong visit, mi bin filim se mi mas go long operesen kwiktaem, be i no long taem olsem we i mifala i bin plan from. Mi stat blong gat wan wom filing long saed blong spirit insaed long mi. Revelesen ia blong miwan i bin givim mi sam kamfot. Mi sek blong harem miwan mi stap talem se mi wantem operesen kwiktaem. Papa mo mama blong mi tufala i bin fraet smol long stat, be mi talem long tufala se, “Mi mi gat pis. ?Wanem taem nao yumi save mekem hemia?” Mifala i mekem plan blong operesen ia long Epril.
Long ol hadtaem, mi save se Jisas Kraes i oltaem stap wetem mi. Mi save prea oltaem long Papa long Heven, mo hemia i help.
Mi bin gat fet se evri samting bae go gud, be yet dei blong operesen i mekem mi fraet. Fraet i kilim mi taem mi stap wokbaot i go insaed long rum ia. Mi tingbaot we mi stap seksek. Dokta blong mi we i lukluk blong help sore long bodi i rili helpem mi long taem ia. Mi talem tangkyu from evri pipol we oli bin helpem mi tru long ful operesen ia. Mi bin gat help tu we i kam long heven. Eksampol, ful wod blong mi oli bin fas from mi, mo mi filim tru paoa blong fasin blong lego kaekae mo prea.
Famli blong Tomas i givim raet long pikja ia.
Naoia hat blong mi i wok gud. Sapos mi no bin gat operesen ia, bae mi save ded long tu yia taem. Naoia mi save laef kasem mi olfala.
Ful ekspresen ia i bin jenisim lukluk blong mi. Mi luk evri man oli defren taem oli stap go tru ol hadtaem blong olgeta. Mi filim bigfala sore from olgeta. Samtaem bae mi luk wan man mo filim se olgeta oli stap go tru wetem wan samting we i strong, mo afta mi go from olgeta mo helpem olgeta.
Long mi, blong stap wan disaepol blong Jisas Kraes i rili minim blong stap wan eksampol long ol narafala man mo tritim evriwan olsem we bae Hem i mekem. Yumi evriwan i stap go tru long hemia tugeta. God hem i Papa blong yumi, mo yumi i ol pikinini boe mo gel blong hem. Evriwan i gat stamba tingting mo valiu. I gat plante oli no gat hop, mekem se mi traem blong helpem ol pipol oli smael mo gat hop.
Mi testifae se mi save kasem gaed blong miwan long Lod evri dei. Hem i save mekem mi strong moa olsem wan man mo givim mi paoa ia blong winim hadtaem. Mi save mekem evri samting long paoa blong Kraes (luk long Philippines 4:13).