“Laekem blong Lan, Laekem blong Serem,” Blong Ol Yut Oli Kam Strong, Julae 2024.
Laekem blong Lan, Laekem blong Serem
I kam long Liam blong Denmak, gospel hem i pat blong wan gud taem mo mekem laef i kam gud.
Ol foto oli kam long Ashlee Larsen
Givim seves long ol narafala man i save minim plante defren samting. Wan wei we Liam i laekem blong givim seves hem i blong stap plei miusik blong ol narafala man.
?Skul o aktiviti we yu laekem? ?Wok o gud taem? Ating i gat wan gudfala kwestin: ?From wanem bae yu laekem wan nomo? Taem hem i save, Liam N. we gat 14 yia blong Denmak i traem blong faenem wan gud balens.
“Mi laekem blong plei miusik,” hem i talem. “Mi plei gita, ol dram, bas, piano, mo yukalele. Mi tingting se, blong stap plei miusik hem i wan naes wei blong talemaot ol filing blong mi. Mo tu, mi laekem blong plei blong ol narafala man blong mekem olgeta oli hapi.”
Taem hem i no stap glad wetem miusik, bae yu save faenem Liam i stap plei soka, basketbol, o jes wetem ol fren blong hem. “Mo tu, mi laekem saens mo stadi blong spes,” hem i talem. “Hem i gud tumas blong luk olsem wanem evri samting oli konek. God i krietem evriwan long olgeta, mo hem i naes tumas.”
Antap long hemia, ol hapi aktiviti blong hem, Liam i faenem taem blong wok had. Hem i stap givimaot niuspepa raon long neba blong hem o hem i stap stadi blong skul.
Liam i stap lanem blong balensem ol samting we hem i nidim mo wantem blong mekem. Hem i maet bisi, be i gat wan samting we hem i givim taem blong hem from evri dei—gospel blong Jisas Kraes.
Liam i stap long menlan long Denmak wetem papa mo mama blong hem, mo smol sista blong hem Filippa mo smol brata Max.
Wan Faef Minit Gol
“I no longtaem i pas, mi disaed blong ridim wan japta blong Buk blong Momon—wan japta nomo—evri dei,” Liam i talem. “I tekem mi kolosap faef minit. Be hem i givim mi moa help, mekem se mi glad blong tekem jalenj ia.”
Blong stap ridim ol skripja evri dei i bin helpem Liam moa bitim we hem i stap tingting long hem. “Samtaem, taem mi gat wan nogud dei, blong stap ridim wan samting we i stap givim kamfot i save mi glad bakegen. Be sapos hem bin wan gudfala dei, hem i save rimaenem mi tu blong talem tangkyu se ol samting oli stap go gud. Mi glad we mi save wok folem gol blong mi”
Liam i bisi wetem plante hapi aktiviti mo ol responsabiliti. Be blong mekem taem evri dei blong ridim Buk blong Momon i bin blesem laef blong mi.
?“Hu i No Wantem Glad?”
Liam i talem tangkyu tumas from sapot taem hem i stap traem blong mekem taem from gospel ia. “Ol brata mo sista blong mi mo mi, mifala nomo i memba blong Jos Ia blong Jisas Kraes blong Ol Lata-dei Sent long skul blong mifala, mekem se plante long ol bes fren blong mi oli no memba blong Jos. Be mi ting se i gat wan gudfala komuniti long Jos long Denmak. Evriwan i savsave olgeta smolsmol, mo hem i naes taem mifala evriwan i kam tugeta.”
Blong gat ol fren wetem defdefren standet i save had samtaem. “Denmak hem i wan kantri we plante yut oli dring alkohol taem oli ol gat yia blong ol yangfala nomo,” Liam i eksplenem. “Hem i save had olsem wan yut blong talem no long ol samting olsem ia.” Be Liam i traem blong serem abaot wanem hem i bilivim blong mekem se ol narawan oli save andastanem gud ol joes blong hem.
Blong stap givim seves long ol narawan i save minim plante defren samting. Wan wei we Liam i laekem blong givim seves hem i blong stap plei miusik blong ol narawan.
“Samtaem long skul taem mifala i gat ol klas abaot Kristianiti, ol tija o ol fren oli askem mi abaot fet blong mi. Mi traem blong eksplenem gud olsem we mi save mekem,” Liam i talem. “Mi invaetem tu wan long ol bes fren blong mi i kam long baptaes blong mi. Mi givim long hem mo mama blong hem wan Buk blong Momon mo tokbaot wetem tufala abaot sam long ol samting we mi bilivim. I stap long tufala blong jusum wanem bae tufala mekem wetem. Mi filim se mi bin mekem wan stret samting blong invaetem ol narafala man blong filim semmak glad we mi filim, from huia i no wantem glad ia?”
Liam mo ol brata mo sista blong hem, olgeta nomo oli ol memba blong Jos long skul blong olgeta. Oli gat plante janis blong oli stap ol gud eksampol blong ol disaepol blong Kraes.
Statem wetem Frensip
Liam i save se blong eksplenem wanem we hem i bilivim o blong givim wan fren wan Buk blong Momon i no wei ia nomo blong kam wan disaepol blong Jisas Kraes. Samtaem blong invaetem ol narafala man blong filim glad blong gospel hem i stat simpol nomo wetem wan tru frensip mo lav.
“Mi laekem tumas stori blong Amon insaed long Buk blong Momon,” Liam i talem. “Mi ting se hem i intresting we hem i no go stret long King Lamonae mo talem, ‘Bambae yu lisin long wanem we mi mi bilivim,’ be sloslo hem i kam fren wetem king kasem poen ia we king i askem Amon, ‘Olsem wanem nao yu gud tumas olsem?’”
“Yumi save bildim ol rilesensip wetem ol narafala man tu,” Liam i talem. “Maet bae oli kam long yumi mo askem wanem ia i givim long mifala moa paoa.”
Wan Blesing blong Laef
I tru Liam i filim se blong stap laef folem gospel i givim hem moa paoa. Hem i bin blesem laef blong hem iven moa bitim jes, miusik, spot o eni long ol narafala gudfala samting we hem i spendem taem wetem.
“Mi mi talem tangkyu blong gat gospel long laef blong mi from mi no ting se bae mi semmak man ia sapos i no bin gat hemia,” hem i talem. “Mi filim se Lod i save gud mi bitim we mi save miwan. Mi save se God mo Kraes i laef. Tufala i soem long yumi wei we yumi mas folem mo helpem yumi blong kam moa gud.”