“Aot long Foldaon i go long Glad,” Blong Ol Yut Oli Kam Strong, Julae 2024.
Aot long Foldaon i go long Glad
Yu no mas givap, iven taem yu foldaon. Bilivim mi.
Foto blong 2023 Toyota USATF Outdoor Championships long 8 Julae 2023, we i kam long USATF
Long 2022 mi bin ron long 3,000 mita resis wei ol man blong resis oli jam ova long pul blong wota, hemia long ol Yunaetem Stet nasonal jampionsip. Resis ia hem i kolosap seven mo haf raon long wan fil blong resis, mo i gat faef wud we i blokem rod long evri raon ia, we yu mas jam ova long hem, hemia i tekem tu wan we i stap stret afta we man i krosem pul blong wota.
Mi stap long namba tu raon blong mi long resis, taem wan man long fored blong mi i bangem mi, mo kolosap mi ron antap long hem. Hem i jam ova long wud we i blokem rod ia, be mi no save—mi foldaon.
Mi stanap sloslo from mi filim se mi nomo save gohed blong ron. Mi tingting, ?“Bambae mi stop mo kamaot nomo long fil blong resis ia?” Be mi bin rere. Mi bin disaed bifo long resis ia se bae mi gohed sapos mi foldaon, mekem se mi statem blong ron bakegen. Mi wantem yet blong givim bes blong mi iven sapos mi no win.
Hem i tekem mi tu raon blong resis bifo bae mi save kasem grup blong ol man long fored. I no longtaem, bae mi gat tri moa raon blong resis, mo afta tu raon blong finisim. Mi stat blong tingting se ating bae mi save kam namba tri ia. Be mi bin taet tumas, mo sam man oli kam pasem mi i go fored, we oli gat haf blong raon ia i stap, blong finisim resis ia. Mi mi namba fo, be afta mi bin gat wan gudfala las jam ova long wota. Mo mi tingting se, “O man, maet mi save winim samting ia.”
Taem mi finisim las 50 mita, mi kam blong luksave se bambae mi win. Hem i no tru nomo. Mi tingting, ?“Wao, i tru, mi mi winim samting ia naoia?” Mo mi bin mekem. Mi bin winim resis ia afta we mi foldaon.
Afta, mi kam blong luksave se i gat sam lesen we yumi save lanem aot long wanem we i hapen.
1. Gat Fasin blong Save Wet Longtaem wetem Yuwan
Taem mi foldaon, mi wantem blong kasem ol narawan kwiktaem. Be mi mas kontrolem miwan blong mekem se mi no lusum tumas eneji. I gat wan skripja we i talem se, “Nao yumi mas mekem tingting blong yumi i strong, blong yumi resis long rod ya we i stap long fes blong yumi” (Hibrus 12:1). Long laef, yu no save win hariap nomo olsem. Samtaem i tekem taem.
2. Stap Gogohed
Hem i nomol blong yu filim olsem se yu wantem givap samtaem. Taem mi foldaon, mi no bin ting se bae mi save win, be mi disaed blong stap gohed. Oltaem i gat hop taem yu foldaon—yu nid nomo blong stanap mo traem bakegen. Sevya bae i helpem yu tru ol jalenj we yu gat. Holemtaet strong long wanem we yu save se i tru, mo lukluk raon mo askem ol narafala man blong help. Ol samting bae oli kam gud yet.
3. Dipen long Jisas Kraes
Mi no bin save se bae mi winim resis ia afta we mi bin foldaon. Be taem yumi foldaon long gospel, taem yumi mekem ol mistek o sin, oltaem yumi save kam long Kraes wetem tru fasin blong sakem sin, mo kasem fogivnes. Hem bae i helpem yumi girap bakegen. Yumi gat bigfala paoa— paoa ia blong kam moa gud, blong mekem moa gud. Iven sapos yumi foldaon bakegen mo bakegen, sapos yumi gohed blong sakem sin mo stap traem blong folem Sevya, afta, Hem i promesem yumi se yumi save winim resis blong laef.