“Kein Taktō Jidikdik n̄an Bōbrae Aer in Kōmalij,” N̄an Kōkajoorļo̧k Jodikdik Ro, Juļae 2024
Jipan̄ Mour
Kein Taktō Jidikdik n̄an Bōbrae Aaer In Kōmalij
Erkein rej jet meļeļe ko n̄an kōjparok eok make ilo ājmour ilo en̄jake.
Kwomaron̄ koļmenļo̧kjeņ kōn elōn̄ wāween ko n̄an dāpij an ānbwinnūm̧ ājmour ilo am̧ rūttoļo̧k. Kwojeļā bwe Jemedwōj Ilan̄ im Jisōs Kraist rej iakwe eok im kōņaan bwe kwōn kōjparok ānbwinnūm̧. Im “kōjparok ānbwinnūm̧ ekoba kōjparok am̧ ājmour ilo koļmenļo̧kjeņ im en̄jake” (N̄an Kōkajoorļo̧k Jodikdik Ro: Juon Unin Tōl n̄an Kōm̧m̧ane Kālet ko [2022], 29). Erkein rej jet meļeļe ko n̄an kōjparok eok make ilo ājmour ilo en̄jake barāinwōt!
-
Kōmeļeļe ko jān Emily E. Jones
Jerbal ippān ro jet. Eļaptata n̄e kwoj en̄jake būromōj, kwomaron̄ in kōņaan make iaam̧ Em̧m̧an men ņe ilo jet iien, ak ebarāinwōt aorōk n̄an joļo̧k am̧ iien ippān armej ro rej kōketak eok. Makeļo̧k iaad aolep iien ej kōm̧m̧an an apan̄ ko penļo̧k.
-
Kwaļo̧k en̄jake ko am̧. Kammineneik m̧ool kōn ewi wāween am̧ en̄jake. Kōnono kōn en̄jake ko am̧ ilo juon wāween ejenolo̧k. Im kōn m̧ool, em̧m̧an wōt n̄e jej jan̄! Ļōmņak kōn iien eo Jisōs ekar jan̄ (lale Jon 11:32–35).
-
Kile bwe en̄jake ko rej meļeļe ko. Men̄e en̄jake ko ad remaron̄ in jab kaenōm̧m̧an kōj, en̄jaki im kōn er make remaron̄ kōmetak eok. Kajjieon̄ in kakilene en̄jake ko am̧ make im kile ta eo rej jiron̄ eok.
-
Kammineneiki kapāāl ko. N̄e kwoj būrom̧ōj ak inepata, ekkatak n̄an dāpij en̄jake kein ilo juon wāween ājmour. N̄an waanjon̄ak, elōn̄ armej ro rej loe bwe ejipan̄ n̄an etetal, ron̄jake al, jin̄a, jar, ak jeje ilo juon jōnōļ.
-
Kōm̧m̧an bwe en̄jake ko rejjab em̧m̧an ren itok im etal. Bōk kitwōm̧ im pijaiklo̧k an kōdo̧ ko em̧m̧akūtļo̧k imejatoto, ak dān ko rej to̧o̧rļo̧k ilo juon reba. Kile ļōmņak ko am̧ im en̄jake ko im kajjieon̄ kōm̧m̧an bwe ren etal jān eok.
-
Naajdik wōt jetōb eo am̧. Jeje ko rekwojarjar, al, jar, m̧ōnjar—aolep men kein rej jipan̄ kōkajoorļo̧k jetōb eo am̧, eo enaaj jipan̄ eok ājmour.
-
Kajjieon̄ wōt bwe kwon ājmour. Ājmour ilo en̄jake eo am̧ im ānbwin rej ekkejel ippān doon. Mōn̄ā m̧ōn̄ā ko n̄an kaddōkļo̧k, ļap iien kiki, im ejaake juon imminene n̄an kōm̧akūtkūt ānbwin bwe en ļapļo̧k am̧ ājmour ilo en̄jake barāinwōt eddōkļo̧k.
-
Kajjitōk kōn jipan̄ n̄e kwoj aikuji. Ānbwinnid jet iien ej aikuj jipan̄ ko retijem̧ļo̧k n̄an maron̄ ājmour im em̧m̧anļo̧k aer pād. Jipan̄ kein rej juon kōjeraam̧m̧an jān Jemedwōj Ilan̄, eo ekōņaan jipan̄ kōj. Ilo juon wāween āinwōt in, jemaron̄ aikuji jipan̄ eo jān taktō ro im rikapilōklōk ro bwe en em̧m̧an ad en̄jake aolep iien. Elan̄n̄e kwoj en̄jake am̧ būrom̧ōj ilo juon iien eaitok, ak ewōr am̧ ļōmņak ko rej kōmetak eok make, jouj im kajjitōk juon rūtto bwe en jipan̄. Kwojjab aikuj kōm̧m̧ane menin makeļok iaam̧! Pukōtļo̧k kōjeraam̧m̧an ko Jemedwōj Ilan̄ ekar kōpooji n̄an eok.